تمد اتقارۋ كوميتەتى جانىنداعى بۋحگالتەرلىك ەسەپ بويىنشا ۇيلەستىرۋ كەڭەسىنىڭ توراعاسى قىزمەتىنە قازاقستان رەسپۋبليكاسىنىڭ وكىلىن تاعايىنداۋ تۋرالى شەشىم بۇگىن استانادا وتكەن كەڭەستىڭ XIII-وتىرىسىندا داۋىس بەرۋ كەزىندە جاسالدى.
بۇل لاۋازىمدى 2017 جىلدان باستاپ, قر قارجى مينيسترلىگى بۋحگالتەرلىك ەسەپ جانە اۋديت ءادىسناماسى دەپارتامەنتىنىڭ ديرەكتورى ارمان بەكتۇروۆا اتقاراتىن بولادى.
ونىڭ كانديداتۋراسى كوپشىلىك تاراپىنان قولداۋ تاپتى. كەڭەس قۇرىلعالى بەرى (2001 جىلدان بەرى) بۇل لاۋازىمدى رەسەي فەدەراتسياسىنىڭ وكىلى باسقارىپ كەلگەن بولاتىن.
كەڭەستىڭ وتىرىسى 18-19 قازان كۇندەرى ازەربايجان, بەلارۋس, قىرعىزستان, مولدوۆا, رف جانە وزبەكستان وكىلدەرىنىڭ قاتىسۋىمەن ءوتتى. سونىمەن قاتار وتىرىسقا اسسا ( ۇلىبريتانيا, لوندون) رەتتەۋشى ورگاندارمەن قارىم-قاتىناستارىن دامىتۋ جونىندەگى ديرەكتورى شاحرۋح الي كحان قاتىستى.
«قر قارجى مينيسترلىگىنىڭ كەڭەس توراعاسى قىزمەتىنە تاعايىندالۋى - بۋحگالتەرلىك ەسەپ سالاسىنداعى وتاندىق مامانداردىڭ كاسىبي بىلىكتىلىگىنە بەرىلگەن جوعارى باعا جانە قۇزىرلى ورگانداردىڭ ۇيلەستىرۋ كەڭەسى اياسىنداعى بەلسەندى ءارى ءتيىمدى ارىپتەستىگىنىڭ جەمىسى», - دەدى مينيسترلىكتىڭ جاۋاپتى حاتشىسى ناتاليا كورجوۆا.
قر قارجى مينيسترلىگىنىڭ مالىمەتتەرى بويىنشا, تمد اتقارۋ كوميتەتى جانىنداعى بۋحگالتەرلىك ەسەپ بويىنشا ۇيلەستىرۋ كەڭەسىنىڭ جۇمىسى اۋديتورلىق قىزمەتتى رەتتەۋدىڭ ۇلتتىق جۇيەسىنىڭ ارتۇرلىلىگىنە قاراماستان, بۋحگالتەرلىك ەسەپ جانە اۋديت سالاسىنداعى ماماندارعا قويىلاتىن جالپى تالاپتاردى بىرىزدەندىرۋگە باعىتتالىپ وتىر.