ەكسپو-2017 قارساڭىندا شەتەلدىك تۋريستەرمەن ەركىن تىلدەسۋى ءۇشىن 1,6 مىڭ پوليتسەي اعىلشىن تىلىنە وقىتىلىپ جاتىر, دەپ حابارلايدى "ەگەمەن-اقپارات" قازاقپاراتقا سىلتەمە جاساپ.
«الدىن الا بولجامدارعا سايكەس, «ەكسپو-2017» كورمەسىنە 100-دەن استام مەملەكەت قاتىسادى دەپ كۇتىلۋدە جانە 2 ميلليوننان استام تۋريست كەلەدى دەپ توپشىلانۋدا. وسى ورايدا, شەتەلدىك تۋريستەرمەن ەركىن بايلانىس ورناتۋ ماقساتىندا ەكسپو كورمەسىنە تارتىلاتىن ىشكى ىستەر ورگاندارىنىڭ 1600 قىزمەتكەرىنە اعىلشىن ءتىلىنىڭ كۋرستارى ۇيىمداستىرىلدى», - دەپ اتاپ ءوتتى قر ىشكى ىستەر مينيسترلىگى «قازاقپارات» اگەنتتىگىنىڭ رەسمي ساۋالىنا بەرگەن جاۋابىندا.
ەسكە سالا كەتەيىك, ەكسپو كورمەسى استانادا 2017 جىلدىڭ 10 ماۋسىمىنان 10 قىركۇيەگىنە دەيىن جالعاسادى. وعان 2 ميلليوننان استام ادام كەلەدى دەپ كۇتىلۋدە. «ەكسپو-2017» كورمەسىنىڭ تاقىرىبى - بولاشاق ەنەرگياسى». ۇيىمداستىرۋشىلاردىڭ ايتۋىنشا, كورمەگە بۇكىل الەمنەن ەنەرگوتيىمدىلىك, بالامالى ەنەرگيا كوزدەرى سالاسىنداعى جاڭا تەحنولوگيالار اكەلىنەدى. بۇرىن حابارلاعانىمىزداي, قازاقستان ەكسپو مامانداندىرىلعان كورمەسىنە ەڭ كوپ قاتىسۋشى مەملەكەتتەردى تارتا بىلگەن ۇزدىك ءۇش ۇيىمداستىرۋشىلاردىڭ قاتارىنا ەنۋى ىقتيمال.