الماتىدا قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسى اياسىندا ستراتەگيالىق جوسپارلاۋ جونىندەگى بىرلەسكەن توبىنىڭ كەزەكتى وتىرىسى ءوتتى. ەكى تاراپ تا تابىستى تارقاسقان جيىنعا قازاقستان مەن تۇركيا سىرتقى ىستەر مينيسترلەرى ەرلان ىدىرىسوۆ پەن مەۆليۋد چاۆۋشوگلى توراعالىق ەتتى.
كەشە تاشكەنتتە وتكەن يسلام ىنتىماقتاستىق ۇيىمىنىڭ وتىرىسىنان كەيىن ىلە-شالا بۇگىن الماتىدا توعىسقان ەكى ەلدىڭ سىرتقى ىستەر مينيسترلەرى بۇل جيىندا وڭىرلىك قاۋىپسىزدىك ماسەلەلەرىنەن باستاپ, وزگە دە جايتتەردى كەڭىنەن كەلىسىپ الۋعا قول جەتكىزدى. جابىق ەسىك جاعدايىندا وتكەن جيىننان كەيىن مينيسترلەر ەكى مەملەكەتتىڭ باق وكىلدەرىمەن ءباسپاسوز ءماسليحاتىن وتكىزىپ, جۋرناليستەردىڭ ساۋالدارىنا جاۋاپ بەردى.
«قازاقستان مەن تۇركيا – ەرەكشە ارىپتەستەر. ءبىزدىڭ باۋىرلاستىعىمىزدان بولەك, كەزدەسۋلەرىمىز دە جاسامپاز سيپاتقا يە» دەگەن قازاقستاننىڭ سىرتقى ىستەر ءمينيسترى بۇل جيىندا كەلەسى جىلى تۇركيادا وتەتىن اتالمىش كەڭەستىڭ كەزەكتى وتىرىسىنىڭ كۇنتارتىبى كەڭىنەن تالقىلانعانىن اتادى.
«ءبىزدىڭ بۇگىنگى كەزدەسۋىمىزدىڭ ماقساتى – قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ كەزەكتى وتىرىسىنىڭ كۇنتىزبەسىن تالقىلاۋ بولدى. بۇگىنگى كەزدەسۋدەن كەيىن جانە الدا كەلە جاتقان كەڭەس وتىرىسى ەكى ەلدىڭ قارىم-قاتىناسىن جاڭا ساتىعا كوتەرەدى دەپ سەنەمىز. كەڭەستىڭ ءىىى وتىرىسى كەلەسى جىلى تۇركيادا وتەدى. بۇگىنگى جيىندا ءبىز ساياسي, اسكەري, مادەني سالاداعى تاقىرىپتاردى جان-جاقتى تالقىلادىق, سونىمەن قاتار, كونسۋلدىق قارىم-قاتىناستار دا جيىننىڭ كۇنتارتىبىندە بولدى», دەدى مەۆليۋت چاۆۋشوگلى.
ءوز تاراپىنان مينيستر ەرلان ىدىرىسوۆ: «ءبىز ەكى ەلدىڭ ءوزارا ىنتىماقتاستىعىنداعى ماسەلەلەرگە جەكە-جەكە توقتالدىق. ونىڭ ىشىندە, ساۋدا-ەكونوميكالىق, ينۆەستيتسيالىق سۇراقتار كوتەرىلدى. ناقتىراق ايتقاندا, «جاڭا سينەرگيا» بىرلەسكەن ەكونوميكالىق باعدارلاماسى مەن قازاقستان-تۇركيا اراسىندا يندۋستريالىق ايماقتار تۋرالى ءىرى جوبالارىمىز بار. سونىمەن قاتار, اۋىل شارۋاشىلىعى جانە ينفراقۇرىلىمدىق جوبالارعا باعىتتالعان ينۆەستيتسيالىق كەلىسىمدەر بار. البەتتە, بۇگىنگى جيىننىڭ ناتيجەسى رەتىندە قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ ءىىى كەزەكتى وتىرىسىن وتكۋزگە كەلىسكەنىمىزدى ايتا كەتۋ كەرەك. كەڭەسكە ەلباسى نۇرسۇلتان نازارباەۆ قاتىسادى. سونداي-اق, بۇگىن ەكسپو-2017 تاقىرىبى دا كوتەرىلدى. وزدەرىڭىز بىلەتىندەي, تۇركيا بۇل كورمەگە بەلسەندى قاتىسۋشى. ءبىزدىڭ دەلەگاتسيالار ساراپشىلار دەڭگەيىندە تۇستەن كەيىن وتىرىستى جالعاستىرادى» دەدى.
ەرلان ىدىرىسوۆ قازاقستان تۇرىك كومپانيالارى مەن ءوندىرىس ورىندارىنا ەۋرازيالىق ەكونوميكالىق وداقتىڭ, ورتالىق ازيا مەن رەسەي, قىتاي نارىعىنا شىعۋدا ايماقتىق حاب بولا الاتىندىعىن اتاپ ءوتتى. ال ەاەو اياسىندا تاۋار, كاپيتال, جۇمىس كۇشى مەن قىزمەت تۇرلەرىنىڭ ەركىن اينالىمىنا كەپىلدىك بەرىلگەن. سوندىقتان تۇركيانىڭ ىسكەر ورتاسى قازاقستاندى 180 ميلليون حالقى بار ورتاق رىنوك رەتىندە قاراستىرۋى ءتيىس دەدى.
مەۆليۋت چاۆۋشوگلى تۇرىك ىسكەرلەرىنىڭ قازاقستاندىق ارىپتەستەرىمەن بەلسەندى قارىم-قاتىناسقا قاشان دا دايىن ەكەندىگىن اتاپ ءوتتى.
ايناش ەسالي, الماتى