قازىر قوعامدا «داكتيلوسكوپيالىق جانە گەنومدىق تىركەۋ تۋرالى» زاڭ جوباسى قىزۋ تالقىلانۋ ۇستىندە. ىشكى ىستەر ورگاندارىنىڭ ۇيىتقى بولۋىمەن ازىرلەنىپ جاتقان بۇل زاڭعا بايلانىستى بىرنەشە رەت تىڭداۋ ءوتىپ, ونى تالقىلاۋعا مەملەكەتتىك ورگاندار مەن باق, كاسىپوداق جانە وزگە دە ۇيىم وكىلدەرى, سونداي-اق ساراپشىلار, سالا ماماندارى قاتىسقان بولاتىن.
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگ بارىسىندا ءىىم جەدەل-كريميناليستيكا دەپارتامەنتىنىڭ باستىعى سەرىك سايىنوۆ بايانداپ بەردى.
اتالمىش زاڭ جوبالارى اعىمداعى جىلدىڭ ماۋسىم ايىندا وتكەن قاۋىپسىزدىك كەڭەسىنىڭ وتىرىسىندا مەملەكەت باسشىسىنىڭ ارنايى تاپسىرماسى بويىنشا ازىرلەنۋ ۇستىندە. «سوندىقتان دا ءبىز «داكتيلوسكوپيالىق جانە گەنومدىق تىركەۋ تۋرالى», «كەيبىر زاڭنامالىق اكتىلەرىنە داكتيلوسكوپيالىق جانە گەنومدىق تىركەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن e.gov.kz اشىق نورماتيۆتىك اكتىلەر ينتەرنەت-پورتالىندا جانە ءىىم-ءنىڭ رەسمي پورتالىندا جاريالادىق. بۇل جەردە كوزدەلگەن ماقسات – زاڭنىڭ قوعام ىشىندە تالقىلانۋ ۇدەرىسىن مەيلىنشە كەڭ اۋقىمدا جۇرگىزۋ بولاتىن», – دەيدى سەرىك سايىن ۇلى.
مامان پىكىرىنە سۇيەنسەك, مۇنداي زاڭ جوباسى جەكە باستى كۋالاندىراتىن قۇجاتتارعا ادامنىڭ بيو-
مەتريالىق انىقتامالارىن سايكەستەندىرۋدىڭ زاماناۋي تەحنولوگياسىن ەنگىزۋ قاجەتتىلىگىنەن تۋىنداپ وتىرعان كورىنەدى. ال قوعامدىق كەڭەس ءمۇشەلەرى بولسا, بيومەتريالىق پاسپورتتىق-ۆيزالىق قۇجاتتارعا وسى قوسىمشا داكتيلوسكوپيالىق پارامەتر ەنگىزۋ بيومەتريالىق انىقتاۋدى سايكەستەندىرۋ جۇيەسىن قۇرۋ مەن ەنگىزۋگە ءمۇمكىندىكتەر بەرەدى. سونداي-اق, قۇجاتتاردى جالعان جاساۋدىڭ جولىن كەسىپ, ولاردىڭ يەلەرىن الاياقتىق پەن ءتۇرلى قىلمىستىق ارەكەتتەردەن قورعايتىنىن ايتادى. سونىمەن قاتار, جاڭاشا ۇلگىدەگى اقپاراتتىق جۇيە قىزمەت كورسەتۋ تۇرلەرىن كەڭەيتىپ, ۆيزالىق رەجىمدى جەڭىلدەتەدى جانە كوشى-قون قاۋىپسىزدىگىنىڭ تيىمدىلىگىن ارتتىرادى.
نەگىزىنەن, قازاقستاندا جەكە باس پەن وتباسىن كۋالاندىراتىن ون ءبىر قۇجاتتىڭ جەتەۋى قۇجات يەسى تۋرالى اقپارات بەردى. بۇل رەتتە بيومەتريالىق قۇجاتتار ICAO حالىقارالىق ستاندارتتارعا ءسايكەس كەلەتىندىگىن دە ايتا كەتەيىك.
ولاردا ادامنىڭ بەتى جاھاندىق بيومەتريالىق تەحنولوگيا ارقىلى تانىلادى ءارى وعان قوسىمشا ءاربىر مەملەكەت فاكۋلتاتيۆتى تۇردە ساۋساق ىزدەرىن تانۋ تەحنولوگياسىن پايدالانا الادى.
نۇرلىبەك دوسىباي,
«ەگەمەن قازاقستان»