شۆەيتساريالىق ىسكەرلەر اگروتۋريزمدى دامىتپاق

الماتىدا مەگاپوليستىڭ كاسىپكەرلەرى مەن شۆەيتساريالىق ىسكەرلەر قاۋىمى كەزدەستى. ورتاق اۋانداعى اڭگىمەگە ينۆەستيتسيا­لىق تارتىمدىلىق, قارجى-قاراجات, قۇرى­لىس, كولىك لوگيستيكاسى, مەديتسينا مەن حيميا ونەركاسىبى, تۋريزم جانە قوناق ءۇي بيزنەسى سالاسىنداعى ارىپتەستىك بايلانىستاردى دامىتۋ ارقاۋ بولدى. جەنەۆا كانتونىنىڭ ەكونوميكا جانە قاۋىپسىزدىك ءمينيسترى پەر مودە باستاعان بيزنەسمەندەر توبىنىڭ قۇرامىندا شۆەيتساريانىڭ ەڭ ءىرى 28 ينۆەستيتسيالىق كومپانيالارىنىڭ وكىلدەرى بار ەكەن. الەمدەگى ادامنىڭ ءومىر سۇرۋىنە قولايلى دەپ تانىلعان مەملەكەتتەردىڭ كوشىن باستاپ تۇرعان شۆەيتساريا ىسكەرلەرىنىڭ ىقىلاسى الماتىعا شىنداپ اۋعانعا ۇقسايدى. اسىرەسە, الاتاۋ باۋرايىنداعى تۇمسا تابيعات پەن ىڭعايلى تىرشىلىك ورتاسى اگروتۋريزم ءۇشىن تاپتىرمايتىن دايىن جول ەكەنى ايتىلدى. تۋريزم دامىعان جەردە بىرنەشە ساباقتاس باعىتتىڭ دا العا باسۋىنا جول اشىلاتىنى ايان. قوناق ءۇي, قىزمەت كورسەتۋ, كولىك تاسىمالى, ازىق-ت ۇلىك بەلدەۋىن قالىپتاستىرۋ سياقتى جىمداسىپ, جالعاساتىن سالانىڭ ءورىسى كەڭەيەدى. الماتىنىڭ كاسىپكەرلەرى ءۇشىن جاڭا مۇمكىندىكتەردىڭ ەسىگى اشىلعالى تۇر. جەرگىلىكتى بيلىك تە كاسىپ­كەرلەر پالاتاسىنىڭ باستاماسىن قولداپ وتىر. سول ارقىلى قالانىڭ الەۋ­مەتتىك ماسەلەلەرىنىڭ وڭتايلى شەشىلۋىنە مۇددەلى. ۋاعدالاسقان جوبالار ءساتتى جۇزەگە اساتىن بولسا, قوسىمشا جۇمىس ورىندارى اشىلىپ, حالىقتىڭ ءال-اۋقاتىن تۇزەۋگە سەبىن تيگىزبەك. جالپى, قازاقستان مەن شۆەيتساريا اراسىنداعى ىسكەرلىك بايلانىستاردىڭ تامىرى تەرەڭدە جاتىر. اسىرەسە, ەكى ەل اراسىنداعى تاۋار الماسۋ جاقسى جولعا قويىلعان. مىسالعا, بيىلعى جىلدىڭ باسىنان بەرى سىرتقى ساۋدا ارىپتەستىگىنىڭ ناتيجەسىندە 2,1 ملرد اقش دوللارىنا تەڭ تاۋار الماسۋ جۇزەگە اسقان. ونىڭ 2,09 ملرد دوللاردان استامى ەكسپورت ونىمدەرىنىڭ ۇلەسى بولسا, يمپورت مولشەرى 58,6 ميلليوندى قۇراپ وتىر. الماتى قالاسى كاسىپكەرلەر پالاتا­سىنىڭ مۇرىندىق بولۋىمەن وتكەن ىسكەر­لىك باسقوسۋدىڭ ناتيجەسىندە ەكى ەل ارا­سىنداعى ساۋدا ىنتىماقتاستىعى جاراسىپ, تابىس ەكى ەسەگە دەيىن ەسەلەنەدى دەپ كۇتىلۋدە. ءسويتىپ, الداعى جىلدارى جەنەۆادان قازاقستانعا باعىتتالعان قار­جىلىق, تاۋارلىق ءونىمنىڭ ۇلەسى باس­تاپقى ساناتقا شىقپاق. قازىرگى كۇنى شۆەي­تساريانىڭ ءبىزدىڭ ەلمەن تاۋار الماسۋى رەسەي, قىتاي, يتاليا, گوللانديا جانە فرانتسيادان كەيىنگى ورىندا. قالماحانبەت مۇقامەتقالي, «ەگەمەن قازاقستان» الماتى