تاياۋدا جەزقازعان قالاسىندا تاۋەلسىزدىكتىڭ 25 جىلدىعى شەڭبەرىندە «تاۋەلسىزدىك – تۇمارىم, ماڭگىلىك ەل – تۇراعىم» اتتى مەرەكەلىك ءىس-شارا بولىپ ءوتتى. بۇل اۋقىمدى شارانى ۇيىمداستىرعان – قاراعاندى وبلىسىنىڭ جاستار ساياساتى ماسەلەلەرى جونىندەگى باسقارماسى, جەزقازعان قالاسىنىڭ اكىمدىگى, جەزقازعان بيزنەس جانە كولىك كوللەدجى.
بيزنەس جانە كولىك كوللەدجىندە وتكەن شارانىڭ رەسمي اشىلۋ سالتاناتىنان سوڭ, بۇرىنىراق جاريالانعان, باۋبەك بۇلقىشەۆ پەن مۇقان يمانجانوۆقا ارنالعان اقىندار ءمۇشايراسىنىڭ قورىتىندىسى حابارلاندى. قازىلار القاسىنىڭ شەشىمىمەن ءبىرىنشى ورىندى جەزقازعاندىق اقىن داۋرەنبەك بۇلانباەۆ يەلەنسە, ەكىنشى-ءۇشىنشى ورىنداردى, ءتيىسىنشە قاراعاندىلىق ەربولات قۋاتبەكوۆ پەن قايرات يمانبەكوۆ ەنشىلەپ, قارجىلاي سىيلىقتاردى قانجىعالارىنا بايلادى. سونىمەن قاتار, جانات ابدىعوجين, ماقسات كۇزەمحانوۆ, اباي وراز, اسەل ءدۇيسەمباەۆا, اقنۇر نۇرعازيەۆا سىندى جاس اقىندار دا العىس حاتتارمەن, اقشالاي سىيلىقتارمەن ماراپاتتالدى. سوڭىنان جەزقازعانداعى احمەت يشان ورازاي ۇلى اتىنداعى مەشىتتىڭ باس يمامى ءمادي سماعۇلوۆ ارۋاقتارعا باعىشتاپ قۇران وقىدى.
بۇدان كەيىن وسى كوللەدجدە كوپتەن كوكەيدە جۇرگەن يگى ماقسات جۇزەگە استى. وقۋ ورنىندا وسكەلەڭ ۇرپاق تاربيەسىمەن, قوعامدىق شارالارمەن اينالىساتىن «سەرپىن» جاستار ورتالىعى اشىلدى. ورتالىقتىڭ ستۋدەنتتەرگە ارنالعان ءوز اسحاناسى, باسپاحاناسى, تۇرمىستىق قىزمەت كورسەتۋ ورنى بار. بۇدان بولەك, مۇندا مونشا جۇمىس ىستەيدى, جازعى تەننيس كورتى دا وسىندا.
وبلىستىڭ جاستار ساياساتى ماسەلەلەرى جونىندەگى باسقارماسىنىڭ باسشىسى ميراس قۇتتىباي مەن استانا, قاراعاندى قالالارىنان كەلگەن ونەر تۇلعالارى جەزقازعان قالاسىنىڭ بەلسەندى ستۋدەنت جاستارىمەن كەزدەسىپ, كەلەلى ماسەلەلەردى ورتاعا سالدى. ال «نۇر وتان» پارتياسى قاراعاندى وبلىستىق فيليالىنىڭ جانىنداعى «جاس وتان» جاستار قاناتىنىڭ ءتوراعاسى نۇرجان جەتپىسباەۆ ستۋدەنتتەرگە ارناپ «كوشباسشىلىق قاسيەتتەردى دامىتۋ» تاقىرىبىندا سەمينار-ترەنينگ وتكىزدى.
بەسىن اۋا شاراعا قاتىسۋشىلار جەزقازعان قالاسىنداعى حالىقتار دوستىعى جانە مادەنيەت ۇيىندە استانا مەن قاراعاندى ونەرپازدارىنىڭ, جەزقازعان قالالىق فيلارمونياسىنىڭ, «اق اجەلەر», «جار-جار شوۋ» انسامبلدەرىنىڭ, باسقا دا جەرگىلىكتى ءانشى-بيشىلەردىڭ قاتىسۋىمەن وتكەن «تاۋەلسىزدىك – تۇعىرىم!» اتتى كونتسەرتتىك باعدارلامانى تاماشالادى.
كەشكىسىن شارا قوناقتارىن جەزقازعان قالاسىنىڭ اكىمدىگى قوشەمەتپەن قابىلداپ, يگى لەبىزدەرىن ءبىلدىردى.
ال ەكىنشى كۇنى شاعىن فۋتبولدان ونەر ادامدارى اراسىنداعى ءداستۇرلى ءVى «قاسىم» كۋبوگىنا كەزەك بەرىلدى. ءناتيجەسىندە, جەزقازعاننىڭ «مادەنيەت مايتالماندارى» جانە « ۇلىتاۋ» كوماندالارى ءبىرىنشى, ەكىنشى ورىندارعا تابان تىرەسە, قاراعاندىلىق «ارقا» كومانداسى ءۇشىنشى ورىننان كورىندى.
قوعامدىق باستامالارعا, اسىرەسە رۋحاني شارالارعا ەلەڭدەپ وتىراتىن جەزقازعان جۇرتى ءبىر سەرپىلىپ قالدى.
قايرات ءابىلدينوۆ,
«ەگەمەن قازاقستان»
قاراعاندى وبلىسى