كەڭشىلىك اقىن – سوعىستان سوڭ تۋعان ۇرپاق وكىلى. ونىڭ شىعارماشىلىعى – ءوزى ءومىر سۇرگەن ۋاقىتتىڭ قاسىرەتى مەن قايعىسى, قۋانىشى مەن شاتتىعى.
تارلان اقىن سۋ جورعاداي تايپالعان شاعىندا تاسكوز تاعدىردىڭ وعى ءتيىپ كوزدەن كەتسە دە, كوڭىلدە قالىپتى, ماڭگىلىك عۇمىرىنىڭ باستالعانىنا دا جىلداردىڭ ءجۇزى اۋىپتى.
...كوپ مەنىڭ جۇرگەن جولدارىم
كەڭىستىك كوك ىزدەپ, كەربەز كول ىزدەپ.
مەن – قارلىعاش!
قايدا ۇشپادىم, قايدا قونبادىم.
باۋىرىما باسقان بالاپان
تالمايتىن جەم ىزدەپ...
اقىننىڭ قارلىعاش جىرى كەڭىستىك كوگىندە شارق ۇرىپ, كەربەز كولدىڭ ايدىنىندا جۇزگەلى قاشان. ول كول دە, كەڭىستىك تە قازاقتىڭ قارا ولەڭىنەن قاسيەت, كيە تانىعان قاراكوزدەردىڭ پاتشا كوڭىلىندە.
كەڭشىلىك پوەزياسىندا سىرماقتىڭ ويۋى, تەكەمەتتىڭ تۇرىندەي سونى ورنەك, قانىق بوياۋ كوپ. سوناۋ 1972 جىلى جارىق كورگەن «ىڭكار دۇنيە» اتتى تۇڭعىش جىر جيناعىمەن-اق ەلىن ەلەڭدەتكەن ەرەن اقىننىڭ ىزگىلىك, تازالىق, ادالدىق اتاۋلىعا ىڭكار جۇرەگىنىڭ ءلۇپىلىن سەزبەۋ مۇمكىن ەمەس ەدى. اسىرەسە, «انار» دەپ اتالاتىن ولەڭ العاۋسىز ايتار سىرىمەن, تابيعي تۇتاستىعىمەن سەزىمنىڭ سەرى پەرنەلەرىن تاپ باسىپ, جانىڭدى بىردە كۇيدىرىپ, بىردە ىسىتا الاتىن قازاقى ولەڭ, ايماڭداي جىر.
بار ما ەكەن سەنىڭ ەسىڭدە,
بالقايماق كۇندەر شايقاۋسىز.
بۇلتيىپ ءبىر زات توسىڭدە,
بۋلىعىپ ءوستى بايقاۋسىز.
وسىلاي باستالاتىن ولەڭ تىلگە دە, وي-سەزىمگە دە سەلكەۋ تۇسىرمەي عاجاپ ورىندالعان. نەبىر توسىن تەڭەۋ ۇلتتىق بوياۋمەن استاسىپ, ولەڭنىڭ باعىن جاندىرىپ, ءسوزدىڭ اجارىن اشقان. ءار جولىن وقىعان سايىن اقىننىڭ ءتىل شۇرايىنا سونشا جەتىكتىگىنە, ءسوز قولدانىستاعى ەرەكشەلىكتەرىنە ءتانتى بولاسىڭ. بۇل – ونىڭ كەز كەلگەن ولەڭىنە شىراي كىرگىزىپ, رەڭ بەرەر قاسيەتتەر.
وسى ولەڭدەگى:
قۇراقتاي قاۋلاپ قولاڭ شاش...
...توماردان تۇسكەن شوققا ۇقساپ
تومسارىپ كوزىڭ جانعاندا....
...ەكىندى قۇلاپ ەڭكۋگە,
ەلگەزەك سامال ەلپىلدەپ...
...كودەنىڭ ءتۇبى قاراڭداپ,
كىرەۋكە تارتتى نارت ءىڭىر.
جالقى اياق, جالقىن تالاۋراپ
جۋاسىپ جاتتى جالقى قىر...
ساناڭا بىردەن كىرىگىپ كەتەتىن ءساتتى تەڭەۋ, ءتاتتى جولدار ولەڭ ءسوزدىڭ بەكزات بولمىسىن ايقىندايدى. «توماردان تۇسكەن شوققا ۇقساپ كوزىڭ جاندى» دەگەن جالعىز جولدىڭ ءوزى قاي-قايداعىڭدى قوزعاپ, سوناۋ الىستا... تىم الىستا قالعان بال داۋرەنىڭدى كوز الدىڭا اكەلىپ, ساعىنىش سازى بولىپ سارنايدى ەكەن. توماردان تۇسكەن شوقتىڭ جەل ۇرلەگەندە جايناپ جانعانىن, ەكىندىنىڭ ەڭكۋگە قۇلاعان كەزىن, نارت ءىڭىر كىرەۋكە تارتقاندا كودەنىڭ ءتۇبى قاراڭداعانىن كوزبەن كورىپ, كوڭىلگە ءتۇيىپ, كيىز تۋىرلىقتى ۇيدە وسكەن قىر بالاسىمىز. ماسەلە وندا ەمەس, ماسەلە وسى سۋرەتتەردى كەڭشىلىكشە كورە بىلۋدە.
سول ولەڭدى:
ودان سوڭ قانشا جىل ءوتتى,
اۋىلىڭا تالاي باردىم دا,
ءسابيىڭدى كوردىم الدىڭدا.
اڭقيتىپ ءتوسىڭدى ءيىتىپ
رازى بوپ سوندا وتىردىڭ,
ايىمىز باسقا تاعدىرعا, –
دەپ تۇيەدى اقىن. قىز توسىندە «بۋلىعىپ وسكەن بايقاۋسىز ءبىر زات» جىلدار جىلجىعان سوڭ انانىڭ ءتوسى بولىپ ءيىپ تۇرعان باقىتتى كەزدى كورەسىڭ.
وسى ساناتتا «شالعىندا», «اپا, سەن ەرتە قارتايما», تاعى باسقا ولەڭدەردى ايتۋعا بولار ەدى. مۇنىڭ ءبارى اقىننىڭ العاشقى جىر جيناعىنا ەنگەن دۇنيەلەر. بۇدان كەڭشىلىكتىڭ قازاقتىڭ قاسيەتتى جىرىنا شاكىرت بوپ يمەنە ەنبەي, بىردەن ءوز ءسوزىن ايتىپ, ءوز الەمىن اشا كەلگەنىن پايىمدايمىز. جالپى, كەڭشىلىك مىرزابەكوۆ شىعارماشىلىعى – بايىپتى دا بايسالدى مىنەزدى, زەردەلەپ, زەرتتەپ وقۋدى قاجەت ەتەتىن قۇبىلىس.
تابيعاتى كەستەلى ءتىلىنىڭ سونشا جاقىندىعىنان بولار, كەڭشىلىك اقىننىڭ ولەڭى ساناڭا ساۋلە ءسىمىرتىپ, سۇلۋ ساز, ادەمى ىرعاعىمەن جانىڭدى تەربەيدى. اۋەزدى ۇندەستىك ءار دىبىسپەن ۇيلەسىم تاۋىپ, اسەم ءان تىڭداعانداي اسەر ەتەدى.
ءتۇبىت بوكەباي,
تارتقان بوتام-اي,
ءوزىڭ بوتاداي,
كوزىڭ بوتالاي
ماعان قاراۋشى ەڭ,
مەيىرىم نۇرىنا
شولدەپ قاتالاي...
ءتۇبىت بوكەباي,
ءتۇستى-اۋ باسىڭنان.
داۋرەن بوتاداي
ۇشتى-اۋ باسىڭنان.
كەتتىڭ جات جۇرتقا
قۇشتى-اۋ قوسىلعان.
سەن دە الىستاپ,
مەن دە الىستاپ,
قۇشتار باسىلعان...
سەزىمدى ايالار اياۋلى جىر. ەكى-ءۇش شۋماق جىرعا وكىنىش, ساعىنىش, مۇڭ سياقتى ادام جانىنداعى اسىل قاسيەتى, كيەلى سەزىمدەردىڭ بارلىعى سىيىپ كەتكەن. سول اسىلداردىڭ ءبارى ءتۇبىت بوكەبايعا ورانىپ تۇرعانداي اسەر الاسىڭ. ادەبيەت تەورياسىندا الليتەراتسيا, اسسونانس دەپ اتالاتىن ۇندەستىك پەن ۇيلەسىم – اقىن جىرلارىنا ءتان قاسيەتتەردىڭ ءبىر قىرى.
اقىن ولەڭدەرىندەگى اقپا-توكپەلىك ولەڭ تابيعاتىنىڭ تامىرىن تەرەڭنەن تارتادى.
ەكى-ءۇش ءۇي كوشتى مە ەكەن دۇبىردەگى,
ەكى شي ءوستى مە ەكەن تۇبىرلەرى.
ەگىلتىپ ەگدە قىردى جاتىر ما ەكەن,
ەتەنە ەسكى مەكەن ىڭىرلەرى...
نەمەسە:
كونبەي-اق جەلدىڭ يىنە,
قونباي-اق جاپان تۇزدەرگە.
ۇشايىق, بايتاق دۇنيە
جەتكىزەر بولسا بىزدەرگە...
تاعى ءبىر جىردان ءۇزىندى:
كىمدە جوق دەيسىڭ بۇل ارمان,
مەندە دە بولدى ءبىر ارمان.
سەندە دە بولدى ءبىر ارمان
اششى ىشەك بولىپ شۇبالعان,
اششى كولىمىز سۋالعان.
اڭقامىز كەپكەن كۇندەردە,
اشىعان كوجە سەكىلدى
ارىلتىپ ەدى قۇماردان.
ارقامىز قوزىپ جۇرگەندە,
القامىز ءسوزىن بەرگەندە,
تابىسىپ ەدىك دۋاننان...
كەڭشىلىك پوەزياسىنىڭ كەلىستى كەرىمسالى وياۋ كوكىرەكتەردى ءالى تالاي جەلپيدى. جوعارىداعى جولداردان جىر جۇرەكتىڭ ءلۇپىلى دۇنيەنىڭ ءدۇبىرى مەن دۇرىلىنە ۇلاسىپ, ساعىنىشتىڭ سىرلى ىرعاعى بولىپ سىڭسىپ, ارمانىڭنىڭ ايدىنىندا اققۋلار ءان سالعانداي اردا ءبىر كۇيگە كەنەلەرىڭ اقيقات.
جىرلارىنان اقىننىڭ مۇڭىن تانىپ, سىرىن تىڭدايسىڭ. ول مۇڭ شىنايىلىعىڭا شىراي كىرگىزەر, ساناڭا سەرىك, سەزىمىڭە سەرت بولار ۇلى قاسيەتتەردەن قۇرالىپ, ماحاببات تىلىندە سويلەيدى, ولەڭدەگى ومىرشەڭ ورنەكتەردىڭ ولمەس عۇمىر كەشەرىنە سەنەسىڭ. سەنە وتىرىپ, «اقىل ايتقىش اقىندار», تاقىلداعان تاقپاق پەن ۇيقى شاقىرار ۇيقاستاردىڭ جانكۇيەرلەردى جالىقتىرا باستاعانىن مويىنداماسقا لاج قالمايدى. ال كەڭشىلىك اقىن جىرلارىنىڭ شەبەرلىكپەن سومدالعان تابيعي بولمىسى شىڭىراۋدان شىققانداي شىنشىلدىعىمەن ارباي بەرمەك.
اقىن – قاشاندا ەل رۋحىنىڭ شىراقشىسى, ءوزى ءومىر سۇرگەن ۋاقىت جۇرەگىنىڭ كارديوگرامماسى. سولاي دەسەك تە, اقىن شىعارماشىلىعى ۇرانشىلدىق پەن ماراپات, ماداق جىرلاردان ادا. بۇل قاسيەت تالانت تازالىعىن ايقىنداپ, ونى تالايلاردان وق بويى وقشاۋلاپ كورسەتەتىندەي. تاسماڭداي تاعدىردىڭ تارازىسى اقىن ءسوزىنىڭ سالماعىن سونىسىمەن ارتتىرىپ تۇرعان شىعار.
ىڭعاي دا ىڭعاي, ىڭعاي ءان,
سۋسىعان قىزىل قۇمداي ءان.
ساعىنعان كەزدە سارعايىپ,
بويىڭدى باسقان مۇنداي ءان.
بۇيىرعان بەلدىڭ شوبىندەي,
بۇيىرعان پالەڭ مىڭ بوياۋ.
بۇيىعى كوڭىل ەمىندەي
بۋلىققان سەزىم ءجۇردى وياۋ...
جىر دا, سىر دا, مۇڭ دا كيەلى ءبىر نۇرعا شومىلىپ العانداي. اقىن شەبەرلىگى ارقىلى ءومىردىڭ مىڭ سان بوياۋى مەن قۇبىلىستارى ولەڭ بولىپ ورەكپي توگىلەدى. «بۋلىققان سەزىمنىڭ وياۋلىعى» سول ولەڭ ءومىرىنىڭ ۇزاقتىعىنا كەپىل. كەڭشىلىك اقىن – سوعىستان سوڭ تۋعان ۇرپاق وكىلى. ءوزى ءومىر ءسۇرگەن ۋاقىتتىڭ قاسىرەتى مەن قايعىسى, مۇڭى مەن شەرى ونىڭ ولەڭدەرى مەن باللادالارىندا بوياۋى قانىق سۋرەتتەرىمەن, سول كەزدىڭ ورنەگىن ءورىپ, ءناشىن ايقىندار ديناميكاسىمەن, جان-جۇيەڭدى دوداعا سالار دراماتيزمىمەن تۇتاس ءبىر الەمدى كوز الدىڭا اكەلەر ۋاقىتتىڭ قان تامىرىنىڭ بۇلكىلى.
وسىنداي ورامدى ويعا جەتەلەر دۇنيەلەردىڭ ساناتىندا جيناقتاعى «تولەۋتايدىڭ ءتورت قىزى», «كوشۋ», «جولدا», «اۋباكىر تۋرالى ەلەگيا», «بوز بيە نەمەسە تىڭ كوتەرىلگەن جىل», «اق كويلەك» سياقتى جۇلدىزدى جىرلارىن اتار ەدىم. بۇل ولەڭ, باللادالارىنىڭ قاي-قايسىسىندا دا تۇتاس ءبىر بۋىننىڭ تاعدىرى بار, ساناڭا قورعاسىنداي جۇك ارتار سالماعى بار, جاميعاتقا ايتار كەڭشىلىك اقىنعا ءتان مىنەز, شيرىققان سەزىم, شىمىر ويدىڭ قوسپاسى سەكىلدى تالانتتىڭ جەمىسى ماۋەلەپ تۇر. «تولەۋتايدىڭ ءتورت قىزىنىڭ» جەمىسى – سوعىستان سوڭعى قازاق اۋىلىنىڭ كەز كەلگەنىندە كەزدەسەتىن كارتينا. وتىرىپ قالعان ءتورت قىزدىڭ تاعدىرى, مايدان كەشىپ كەلگەن توكەڭنىڭ حاراكتەرى ارقىلى ورىلەتىن ولەڭ سول جىلداردىڭ تىنىس-تىرشىلىگىمەن قوسا, بەينەتقور قازاق اۋىلىنىڭ قارەكەت, تىرلىگىن كوز الدىڭنان وتكىزەدى. تولەۋتايدىڭ قىزدارى بىرىنەن سوڭ ءبىرى مايداننان «جارىمجان» بوپ ورالعان ازاماتتارعا «قاشىپ» كەتىپ جاتادى. العاشقى قىزى كەتكەندە «سۇيەگىنە تاڭبا سالعان شولاق نەمەنى جالعىز وقپەن جۋساتپاق» نيەتتەگى توكەڭ قۇس مىلتىعىن الىپ تۇرا جۇگىرەدى. «اۋىل سىرتقى اقساي جاققا جۇگىردى, بۇكىل اۋىل جۇگىردى ونىڭ سوڭىنان...». قايماعى بۇزىلماعان قازاق اۋىلى. توكەڭە باسۋ ايتقان ەل-جۇرتپەن بىرگە سەن دە كۇيزەلەسىڭ, سوعىس اتاۋلىعا لاعنەت ايتاسىڭ. اق پەن قارانىڭ, كۇنگەي مەن كولەڭكەنىڭ الماسقانى سياقتى, قايعى مەن قۋانىش پوەزيانىڭ پاراللەل سىزىقتارى ارقىلى ساناڭا ساۋلە سەبەدى.
...كەلەر جىلى كۇيەۋىمەن كەلدى ۇلداي,
قولدارىندا ۇلدارى بار بالعىنداي.
«سۇيەگىنە تاڭبا سالعان» قىزىنىڭ
ءسۇيىپ ۇلىن توكەڭ مەيىرىن قاندىردى-اي.
تالاي اقتابان-شۇبىرىندىنى باستان كەشكەن ءبىزدىڭ حالىق وسىلاي ءوسىپ-ونگەن. قازاق ءۇشىن ءۇرىم-بۇتاعىنىڭ جاپىراق جايعانىنان ۇلكەن باقىت جوق. تاريحتاعى كەز كەلگەن قاتەلىك قىرشىنداردىڭ قانى بوپ اعىپ, قارا ورمان ەلدىڭ كوز جاسى بوپ تامادى. «تولەۋتايدىڭ ءتورت قىزى» قاراپايىم عانا جىر بولىپ كورىنگەنىمەن, وسىنداي ويدىڭ ورمانىنا سۇڭگىتەدى ەكەن.
«بوز بيە نەمەسە تىڭ كوتەرىلگەن جىل» – كوتەرەر جۇگى اسا اۋىر, بۇگىن توقىراۋ جىلدارى دەپ اتاپ جۇرگەن كەزەڭنىڭ كوزىنە سول كەزدىڭ وزىندە توپىراق شاشقان جىر. پارتيانىڭ تىڭ يگەرۋ سەكىلدى جاسالعان ساياسي ناۋقانىنىڭ استارىندا تۇتاس ءبىر حالىقتىڭ قاسىرەت-قايعىسى بارلىعىن مەڭزەيتىن شىعارما بۇل. ول «بوز بيە» ارقىلى بەرىلىپ, كەرەمەت كوركەمدىك شەشىم تاپقان. كەڭشىلىك پوەزياسى جايلى اڭگىمە قوزعالعاندا, كىم-كىمنىڭ دە وسى جىرعا سوقپاي كەتپەيتىنىنىڭ سىرى سوندا بولسا كەرەك.
ناعاشى اۋىلىمنىڭ اراسى
بىزدەن ءبىر-اق قىر,
قوزى, لاعىمىز قوسىلعان
شۇيگىن قىرات بۇل.
تىڭ جىرتقان جىلى توبەنىڭ
ءتۇبىت كودەسىن
تاراپ اكەتتى تاراق
تاباندى تراكتور, –
دەپ باستالاتىن ولەڭ «قىردىڭ كودەسىن ءبىر مەزگىل قاجاپ كەلمەسە يىمەيتىن» جانۋاردىڭ جاساندى جاسىل القاپتى جات كورىپ, كودەنىڭ اششى ءدامىن اڭسايتىنى جايلى پسيحولوگيالىق جىر. بوز بيەگە كودەنىڭ اششى ءدامىن ىزدەتكەن اقىن سول ارقىلى اششى شىندىقتىڭ بەتىن ايقارا اشادى.
ءتۇن قۇشاعىندا تۇنەرىپ
جاتتى بايتاق قىر,
بوز بيە باسىن سۇلەسوق قانا
شايقاپ تۇر.
استارى مىناۋ اۋدارىلىپ
قالعان تىڭ جەرگە
اششى كودەنىڭ شىقپاي
قالعانىن بايقاپ تۇر...
تىڭ ەمەس, «كودە شىقپاي قالعان, استارى اۋدارىلىپ قالعان جەر». يمپەريانىڭ قىلىشىنان قان تامىپ تۇرعان كەزدە بۇلاي ايتۋ ءۇشىن اقىن بولۋدىڭ ءوزى از سياقتى كورىنەرى راس.
وسى ولەڭ تۋرالى اقىننىڭ ءوزى ءومىرىنىڭ سوڭعى كەزىندە جازىلعان ەستەلىگىندە بىلاي دەيدى: «...مەن بەسىكتەن بەلىم جاڭا عانا شىعىپ,ادەبيەتكە ءالى تولىق كەلىپ ۇلگەرمەگەن كەزىمدە «بوز بيە نەمەسە تىڭ جىرتقان جىل» دەگەن دۇنيە جازدىم. وسى ولەڭدى ون سەگىز جىل جاريالاتا الماي ءجۇرىپ-ءجۇرىپ, 1985 جىلى اقىن يرانبەك ورازباەۆ «جازۋشى» باسپاسىندا مەنىڭ جيناعىما رەداكتور بولعان كەزدە ارەڭ-ارەڭ شىعاردىم.
ال قازىر تىڭنىڭ ەكولوگياسى تۋرالى ايتىپ جاتىرمىز.
...سول پروبلەمانى جيىرما جىل بۇرىن بالا اقىن كەزىمدە جازىپپىن. بىراق دەر كەزىندە باستىرا المادىم. مىنە, ادەبيەتتەگى توقىراۋ دەگەن وسى».
اقىن ەستەلىگىندەگى وسى جولداردى وقىعاندا قازاق قوعامى توقىراۋ جىلدارىنا ەسكەرتكىش قوياتىن بولسا, استىنا ولەڭنىڭ جوعارىداعى كەلتىرىلگەن سوڭعى شۋماعىن جازىپ, كوزدەرى بوتالاپ قىردىڭ كەرمەك كودەسىن اڭساعان بوز بيەنى بەينەلەسە, شىركىن, دەگەن وي ۇشقىنى جىلت ەتتى. «بوز بيە», ءسوز جوق, ازاماتتىق مۋشكاداعى بولمىسى بولەك, ءدۇلدۇل دۇنيە.
اقىننىڭ «سارىوزەك ساعىنىش», «فزو-عا كەتكەن جەڭەشەم» «ءبىرجان سال, قوياندى جارمەڭكەسى», «ءيمانجۇسىپ» سەكىلدى پوەمالارى شوقتىعى بيىك دۇنيەلەر.
بۇل شىعارمالاردان اقىننىڭ الاماندا قولتىعىن سوگە شاباتىن جۇيرىكتەي ەپيكالىق كەڭ قۇلاشىن اڭعارار ەدىك. ول كىبىرتىكسىز ەركىن كوسىلەدى. وقيعا جەلىسىن شيرىقتىرىپ, بايانداۋ مانەرىن شىمىر سومداي الادى. اقىن پوەمالارىنداعى ءبىرجان, ءيمانجۇسىپ وبرازدارى اقيقاتىنا سەندىرەر, رۋحى بيىك, جۇلدىزى جوعارى سومدالعان.
بازارى جارمەڭكەڭنىڭ انگە اينالىپ,
جان-جاقتان ءبىرجاندى ىزدەپ,
جاۋدى-اي حالىق.
اتاعىن قوياندىنىڭ وسى كۇزدە
اكەتتى ءبىرجان ءانى شالعايعا الىپ.
ەكى عاسىر ولاراسىنداعى داقپىرتى اتشاپتىرىمنان الىسقا كەتكەن قوياندى جارمەڭكەسىنىڭ ءدۇبىر-دۇرمەگىن كوز الدىڭا كەلتىرە جىرلاعان اقىن ءبىرجان سال بەينەسى ارقىلى وشپەس ونەردىڭ قۇدىرەتى مەن ماڭگىلىگىن ايقارا اشىپ كورسەتتى.
«ءيمانجۇسىپ» پوەماسى – تاقىرىپتىق جاعىنان ۇلكەن جۇك كوتەرىپ تۇرعان, ورلىك پەن ەرلىكتىڭ ەسكەرتكىشى سەكىلدى, شوقتىعى بيىك تۋىندى. تاس تۇرمەگە تاققا بولا تۇسپەگەن, «ەشقاشان دا اققا قارا جاقپاعان, ءجابىر جاساپ جوققا جالا جاپپاعان» اقىن وبرازى ايشىقتى ءتىل, تارتىسقا تولى وقيعالاردىڭ ءورىلۋى ارقىلى كوركەم شەشىم تاپقان.
...باسىنا سالدىم بۇركىت,
الدىم تۇلكى,
قىران با؟..
قۇس بولعانمەن اركىمدىكى.
تالايلار ايىپ-جالا جاپقانىمەن
كىسەنىن سالا المادى تاعدىر-قۇلپى.
...وكىلى سەگىز بولىس, ءجۇز قارالى,
تورە بي, توردە وتىرعان سىزدانادى.
سەسكەنبەي ەشتەڭەدەن ءيمانجۇسىپ
سوتتا تۇر –
قاراوتكەلدىڭ مۇزبالاعى.
ازاتتىق اڭساعان اقىننىڭ وجەت بولمىسى, جان سارايىنداعى قاقتىعىستار شىعارمانىڭ ءون بويىندا ءساتتى ءورىلىپ, سول زاماننىڭ قان-تامىرىمەن بىرگە سوعىپ تۇر.
قازاق ولەڭى تۋرالى ءسوز بولعاندا كەڭشىلىك مىرزابەكوۆ ەسىمى اتالماي قالماق ەمەس.
ونىڭ شىعارمالارىنان تەك وزىنە عانا ءتان مىنەزدى كورەسىڭ. كەڭشىلىك جىرى – تالايلى دا تاعدىرلى جىر.
عالىم جايلىباي,
اقىن, قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى