وقىرمان
...ماسەلە كوتەرەدى
ەكولوگيالىق جۇيە ناشارلاپ بارادى
ورال وڭىرىندەگى سۋ رەسۋرستارىنىڭ 80 پايىزى ترانسشەكارالىق وزەندەردىڭ ەنشىسىنە تيەدى. مۇنداعى باستى نىسان وڭىردەگى وزگە سۋ رەسۋرستارىن قارجىلاندىراتىن جايىق وزەنى. ونىڭ جاعالاۋىندا 87 ەلدى مەكەن ورانالاسقان. سوڭعى ۋاقىتتا مۇنداعى ەكولوگيالىق جۇيە تومەندەپ, گيدرولوگيالىق نورمالار جويىلىپ بارادى. جايىقتىڭ ارناسى تارتىلىپ, سۋى لاستانۋى, ونىڭ ماڭىنداعى جانۋارلار مەن وسىمدىكتەر دۇنيەسىنىڭ ازايىپ بارا جاتقانى وسىنىڭ دالەلى.
وزەن سۋىن ۇقىپتى ءارى ءتيىمدى پايدالانۋ ءۇشىن ونىڭ ارنالارىن ارشىپ, ءتۇبىن تازارتۋ قاجەت. بۇل كۇردەلى جۇمىستى رەسەيدەن باستاۋ الاتىن سۋ قويمالارىنان باستاعان ءجون دەپ ويلايمىز. ترانسشەكارالىق جايىق وزەنىنىڭ ەكولوگيالىق جۇيەسىن جاڭعىرتۋ جۇمىستارى مەملەكەتارالىق ماڭىز بەن سيپات العاندا عانا ءتيىستى ناتيجە بەرمەك. سوندىقتان بۇعان كورشىلەس ەكى ەلدىڭ وكىلەتتى ورگاندارى مۇددەلى بولعانىن قالايمىز.
قازىباي بوزىموۆ,
اۋىل شارۋاشىلىعى عىلىمدارىنىڭ دوكتورى, پروفەسسور
ورال
...ريزاشىلىق بىلدىرەدى
سپورت كەشەنىن سالىپ بەردى
كاسىپپەن دەگەنىنە جەتكەن ازاماتتارعا كوڭىلىڭ تولىپ, ال ولاردىڭ اراسىندا بايلىعىن شاپاعاتتى شارۋاعا باعىتتاعاندارعا «مىنە, ازامات!» دەپ ريزا بولاسىڭ. «جاقسىنىڭ جاقسىلىعىن ايت – نۇرى تاسىسىن» دەمەكشى, اتىراۋ وبلىسى, جىلىوي اۋدانى, شوقپارتوعاي اۋىلىنىڭ تۇرعىنى, جەكە كاسىپكەر باقىتجان دوستانوۆ وسى اۋىلداعى ءوزى وقىعان №3 ورتا مەكتەپكە «ىرىس» سپورت كەشەنىن سىيعا تارتتى دەگەن حاباردى ەستىپ قۋانعانىمىز بار. بارەكەلدى دەيتىنىمىز, كاسىپكەر سپورت كەشەنىنىڭ قۇرىلىسىنا ءوز قارجىسى ەسەبىنەن 87 ملن تەڭگە جۇمساپتى. جالپى الاڭى 807 شارشى مەتردى الىپ جاتقان كەشەندە ەرلەر مەن ايەلدەرگە ارنالعان دۋش, كيىم اۋىستىرۋعا ارنالعان شكافتار, مەديتسينالىق پۋنكت جۇمىس ىستەيدى. سپورتپەن شۇعىلدانۋ ءۇشىن ترەناجەر قۇرالدارى, ۇستەل تەننيسى, باسكەتبول, ۆولەيبول ويىندارىنا ارنالعان زالدار بار. ال قاجەتتى قۇرال-جابدىقتاردى شەتەلدەن جەتكىزىپتى.
«كەشەندى ءوزىمىزدى باعىپ-وسىرگەن, ءتالىم-تاربيەسىن بەرگەن مارقۇم, اسىل اجەم ىرىس اتىمەن اتاۋدى ۇيعاردىم. بۇگىندە كەشەن ءوز جۇمىسىن باستاپ كەتتى. بالالار ءدان ريزا», – دەيدى كاسىپكەر باقىتجان دوستانوۆ.
الداعى ۋاقىتتا مادەنيەت ءۇيىن تۇرعىزىپ, اۋىلدى كوگالداندىرۋدى جوسپارلاپ وتىرعان ازاماتقا ءىسىڭ ىلگەرى وزىپ, كاسىبىڭ ورگە باسا بەرسىن دەگىمىز كەلەدى.
زامانبەك مۇحامەتحانوۆ
اتىراۋ وبلىسى
...اسەرىمەن بولىسەدى
ءابىش جانە تاۋەلسىزدىك
ماڭعىستاۋ اۋدانىنىڭ وڭدى اۋىلىندا وسىنداي تاقىرىپتا پاتريوتتىق ءىس-شارا وتكىزىلدى. ءىس-شاراعا قوعام جانە مەملەكەت قايراتكەرى, حالىق جازۋشىسى ءابىش كەكىلباەۆتىڭ سىنىپتاس دوسى, شەتپەلىك ارداگەر ۇستاز الدابەرگەن قۇرماشەۆ جانە اۋداندىق جاستار ورتالىعىنىڭ باسشىسى اللابەرگەن قونارباەۆ, وڭدى ورتا مەكتەبىنىڭ وقۋشىلارى مەن ۇستازدار قاۋىمى قاتىستى. جاستار الدىمەن الاشتىڭ اناسى بولعان اي-انا ەسكەرتكىشىنە گۇل شوقتارىن قويىپ, رۋحىنا تاعزىم ەتتى. ەسكەرتكىش باسىندا ا.قۇرماشەۆ ابەكەڭ سياقتى الەم تانىعان الىپتى دۇنيەگە اكەلگەن ايساۋلە انامىز تۋرالى ەستەلىك ايتتى.
بۇدان سوڭ شارا وڭدى ورتا مەكتەبىندە جالعاسىپ, جيىندا ارداگەر ۇستازدار ابەكەڭنىڭ ۇشتاعان اۋىلىنداعى مەكتەپتە وتكەن بالالىق شاقتارىن ايتىپ, كوپشىلىكتى وزىنە باۋراپ الدى. جيىندا ابەكەڭنىڭ تاۋەلسىزدىك العان جىلداردا پارلامەنتتە وتىرعان كەزىندەگى جەمىستى جۇمىستارى جايىندا جاستار ورتالىعىنىڭ باسشىسى ا.قونارباەۆ ايتىپ بەرسە, ءا.كەكىلباەۆتىڭ ادەبي شىعارمالارىن مەكتەپ وقۋشىلارى ناقىشىنا كەلتىرە وقىپ, جازۋشىنىڭ ونەگەلى ءومىرى تۋرالى ساۋالدارىن قويىپ, تۇششىمدى جاۋاپتارىن الدى. باسقوسۋ سوڭىندا وقۋشىلارعا سۇلتان ورازالىنىڭ «قازاق زيالىلارى» اتتى بەينەانتولوگياسىنان ءابىش كەكىلباەۆ تۋرالى دەرەكتى فيلم كورسەتىلدى.
الداش شوڭاي
ماڭعىستاۋ وبلىسى
...جاڭالىعىن جەتكىزەدى
تىگىن فابريكاسى ىسكە قوسىلدى
قىزىلوردا قالاسىندا جاڭادان اشىلعان «Dalatex» تىگىن فابريكاسى ءوز ونىمدەرىن وتاندىق نارىققا شىعارۋدى قولعا الدى. اشىلعانىنا بىرنەشە اي عانا بولعان كاسىپورىندا 30-عا جۋىق قىزمەتكەر جۇمىس اتقارادى. قىزمەتكەرلەردىڭ كوبىسى «جۇمىسپەن قامتۋدىڭ جول كارتاسى-2020» باعدارلاماسى اياسىندا جۇمىسقا ورنالاسقان جۇمىسسىز جاستار. كۇنىنە 180-200 كولەمىندە ەرلەر مەن ايەلدەر جانە بالالار كويلەگىن تىگىپ ەلىمىزدىڭ ءار وڭىرىندەگى دۇكەندەرگە تاراتىپ وتىر. حالىق تۇتىناتىن كيىم-كەشەكتەردىڭ كوبى قىتاي مەن تۇركيادان اكەلىنەتىنىن ەسكەرسەك, ەندى ءوز ءونىمىمىزدى تۇتىنۋعا مۇمكىندىك الىپ وتىرمىز.
كيىمدەردى باسقا ەلدەردەن اكەلىپ ساتۋمەن اينالىسقان كاسىپكەر دىلمۇحامەد ابىزوۆ ويلانا كەلە, تىڭ سالانى ەنگىزۋ قازىرگى بيزنەستى دامىتۋدىڭ وڭ شەشىمى دەپ تاپقان. تىگىن فابريكاسىنىڭ ونىمدەرى ازىرگە ەل نارىعىنا شىعارىلىپ وتىرسا, كەلەشەكتە الىس-جاقىن شەتەلدەرگە ەكسپورتتاۋ كوزدەلىپ وتىر. «فابريكانىڭ «Dalatex» اتالۋىنىڭ سەبەبى, ەكسپورت ماسەلەسىن كوزدەگەندىكتەن اعىلشىنشا اتاۋ بەردىك. ۇلتتىق نامىسىمىزدى قايراپ, وزىق ەلدەردىڭ الدىڭعى قاتارىنا ەنۋ, الىس-جاقىن شەتەلدەرگە «قازاقستاندا جاسالعان» دەگەن ءونىمدى تاراتۋ باستى ماقساتىمىز», – دەيدى دىلمۇحامەد ابىزوۆ. ارنايى باعدارلاما اياسىندا ۇكىمەتتەن 30 پايىز جەڭىلدىك الىپ وتىرعان فابريكانىڭ ازىرشە تاپقان تابىسىنان شىعىنى باسىمداۋ. ويتكەنى, ءبىزدىڭ ەلىمىزدە شيكىزات تاپشى, بارلىعى سىرتتان ساتىلىپ الىناتىنىن ەسكەرسەك, بىزگە ءالى دە قامبامىزدى تولتىراتىن كاسىپورىندار قاجەت-اق.
ايمان مۇقىشەۆا
قىزىلوردا