يتاليانىڭ ميلان قالاسىندا 2017 جىلعى XXVIII قىسقى ۋنيۆەرسيادا ديرەكتسياسىنىڭ باسشىسى نايل نۇروۆ حالىقارالىق ستۋدەنتتەر جارىسىن ۇيىمداستىرۋ ماسەلەلەرى بويىنشا 2013 جىلعى قىسقى ۋنيۆەرسيادا ۇيىمداستىرۋ كوميتەتىنىڭ باس حاتشىسى فيليپپو باززانەللامەن كەزدەستى.
وسى ارادا 2013 جىلى قىسقى ۋنيۆەرسيادا يتاليانىڭ ترەنتو قالاسىندا وتكەنىن ەسكە سالا كەتەيىك. جارىسقا الەمنىڭ 700 ۋنيۆەرسيتەتىنىڭ وكىلدەرى قاتىسقان بولاتىن. سول جارىستا 51 ەلدەن 1700-دەن استام ستۋدەنت 12 سپورت ءتۇرى بويىنشا سايىسقا ءتۇسىپ, ويىندار ترەنتو قالاسىنىڭ 12 پروۆينتسياسىندا وتكەن ەدى.
ۋنيۆەرسيادالار تاريحىنداعى ەڭ ۇنەمدى سپورت سايىسى 2013 جىلعى ەكەنىن ايتا كەتكەن ءجون. ۋنيۆەرسيادانىڭ وپەراتسيالىق بيۋدجەتى 5 ميلليون 125 مىڭ ەۋرونى قۇراپ, بيۋدجەتى ەڭ از ويىن بولدى.
– ۋنيۆەرسيادانى ۇيىمداستىرۋ كوميتەتى ءۇشىن ترەنتو تاجىريبەسى وتە ماڭىزدى. ءاسىرەسە, شىعىندى ءتيىمدى جۇمساۋىن ۇلگى ەتۋىمىز كەرەك. اقشانى ۇنەمدەپ-اق, جارىستى جوعارى دەڭگەيدە وتكىزۋگە بولادى. وسى ورايدا, ترەنتونىڭ تاجىريبەسى بىزدەرگە ۋنيۆەرسيادانى اسا قىمبات ەمەس ەتىپ وتكىزۋگە كومەكتەسۋى كەرەك دەپ اتاپ ءوتتى, دەدى ديرەكتسيا جەتەكشىسى نايل نۇروۆ.
ءوز كەزەگىندە 2013 جىلعى ۋنيۆەرسيادانىڭ باس حاتشىسى الماتىداعى ۋنيۆەرسياداعا دايىندىق حالىقارالىق ستۋدەنتتەر سپورتى فەدەراتسياسىنىڭ بارلىق تالابى بويىنشا جوعارى دەڭگەيدە ءوتىپ جاتقانىن جەتكىزگەن. ال فيليپپو باززانەللا مىرزا الماتى قالاسىنىڭ FISU تاريحىنداعى ەڭ ۇزدىك ۋنيۆەرسيادانى وتكىزەتىنىنە سەنەتىندىگىن ءبىلدىردى.
– ويتكەنى, قىركۇيەك ايىندا ءداستۇرلى دەلەگاتسيا باسشىلارىنىڭ كەزدەسۋىنىڭ ءوزىن جوعارى دەڭگەيدە وتكىزدى. الماتىداعى قىسقى ۋنيۆەرسياداعا كاسىبي مامانداردان قۇرالعان توپ جۇمىس ىستەۋدە. بۇل جارىس سىزدەردىڭ قالالارىڭىزدا ستۋدەنتتىك سپورتتىڭ دامۋىنا سەرپىن بەرەدى, – دەيدى 2013 جىلعى قىسقى ۋنيۆەرسيادانى ۇيىمداستىرۋ كوميتەتىنىڭ باس حاتشىسى.
مىسال رەتىندە ول يتاليانىڭ تۋرين قالاسىن دا اتاپ ءوتتى. بۇل قالادا 2006 جىلى قىسقى وليمپيادا وتكەن. ارتىنشا 1 جىلدان سوڭ قىسقى ۋنيۆەرسيادانى قابىلدادى. وسىنىڭ ارقاسىندا سپورت اتالىمى بويىنشا تۋرين مەن ترەنتينوعا وقۋعا كەلگەن شەتەلدىك ستۋدەنتتەردىڭ سانى 10 ەسەگە ارتقان.
كەزدەسۋ بارىسىندا قوس تاراپ, كولىكپەن قامتاماسىز ەتۋ, تاماقتانۋ, ويىنداردى باسقارۋ ورتالىعىنىڭ جۇمىسى, جارىستىڭ اشىلۋى مەن جابىلۋ سالتاناتىن ۇيىمداستىرۋ, مادەني ۋنيۆەرسيادا تاقىرىبىندا اڭگىمە ءوربىتتى.
ايناش ەسالي,
«ەگەمەن قازاقستان»
الماتى