فەرعانا وبلىسىندا وزبەكستان قورعانىس مينيسترلىگىنە تيەسىلى مي-171 تىكۇشاعى اپاتقا ۇشىرادى. وقيعا سالدارىنان 3 ەكيپاج مۇشەسى مەن بورتتا بولعان وزبەكستان قارۋلى كۇشتەرىنىڭ 6 اسكەري قىزمەتكەرى قازا تاپتى. وقيعا 18 قازان كۇنى جوسپارلىق ۇشۋ كەزىندە بولدى, دەپ حابارلايدى UzDaily.uz ەلدىڭ اسكەري ۆەدومستۆوسىنا سىلتەمە جاساپ.
«اپات سەبەپتەرىن انىقتايتىن ارنايى كوميسسيا قۇرىلدى. ەل بيلىگى قازا تاپقانداردىڭ تۋعان-تۋىستارى مەن جاقىندارىنا قايعىرا كوڭىل ايتادى», - دەلىنگەن حابارلامادا.
مي-171 - رەسەيدە جاسالعان ازاماتتىق تاسىمالداۋشى تىكۇشاق. ەكيپاج مۇشەسى 3 ادام, 26 جولاۋشى تاسىمالداي الادى.