مەملەكەتتىك بۇقارالىق اقپارات قۇرالدارى تاياۋ كەلەشەكتە كورەرمەن مەن وقىرمان كوڭىلىنەن شىعاتىن بولادى. بۇل تۋرالى بۇگىن قر اقپارات جانە كوممۋنيكاتسيالار مينيسترلىگىنىڭ القا وتىرىسىندا ۆەدومستۆو باسشىسى داۋرەن اباەۆ ايتتى, دەپ حابارلايدى قازاقپارات.
«قازىرگى ۋاقىتتا «Kazakh TV» مەن «ءبىلىم جانە مادەنيەت» تەلەارنالارىن «Kazakh TV» لوگوتيپى اياسىندا بىرىكتىرۋ جۇزەگە اسىرىلۋدا. تەلەارنانىڭ تۇساۋكەسەرى تاياۋ ۋاقىتتا وتەدى. «حابار 24» تەلەارناسىنىڭ تارالىم سەبەتى بارىنشا وزگەردى, جاڭالىقتار كونتەنتى قىسقارتىلدى جانە اقپاراتتىق-ساراپتامالىق ءارى كوركەم باعدارلامالار ءوندىرىسى ارتتىرىلدى. ءدال وسىنداي جۇمىستار بارلىق مەملەكەتتىك تەلەارنالاردا, سونىمەن بىرگە ءبىزدىڭ گازەتتەردە دە جۇرگىزىلەتىن بولادى. ءبىز مۇنىڭ جۇيەلى پروتسەسس ەكەندىگىن جانە ەشكىم دە ءبىر ساتتەگى ناتيجەگە ۋادە بەرمەيتىندىگىن تۇسىنۋگە ءتيىسپىز. ءبىز قىسقا مەرزىمدى كەلەشەكتە مەملەكەتتىك باق-تار كورەرمەن مەن وقىرمان ءىلتيپاتى رەيتينگىندە بارىنشا جوعارى پوزيتسياعا شىعارىنا سەنىمدىمىز», - دەدى ول.
سونىمەن قاتار اباەۆ قازىرگى ۋاقىتتا مينيسترلىك مەملەكەتتىك اقپارات ساياساتىنا قاتىستى جاڭا ادىستەردى جۇزەگە اسىرۋعا باعىتتالعان جۇمىستاردىڭ جۇرگىزىلىپ جاتقانىن ەسكە سالدى. بۇل باعىتتا اقپاراتتىق جۇمىس ستراتەگياسى ازىرلەنگەن. وندا كونتەنت قالىپتاستىرۋدىڭ ەكى باستى پارامەترى بار.
«ول قوعامنىڭ رۋحاني تىرەگىن نىعايتۋعا, وتباسى قۇندىلىقتارىن, ءبىلىم, وتانسۇيگىشتىك جانە «ماڭگىلىك ەل» پاتريوتتىق اكتىسىندە بەلگىلەنگەن باسقا دا قۇندىلىقتاردى ىلگەرىلەتۋگە باعىتتالعان «قۇندىلىقتار كارتاسى». ەكىنشىسى - ازاماتتارعا سالالىق باعدارلامالار تۋرالى اقپارات بەرۋگە باعىتتالعان «مەملەكەتتىك PR-ستراتەگيا». بۇل ەڭ الدىمەن «100 ناقتى قادام» ۇلت جوسپارىنا قاتىستى. 2017 جىلدان ءبىز بىرىڭعاي رەسپۋبليكالىق جانە 16 وڭىرلىك مەديا جوسپارعا كوشۋدى جوسپارلاۋدامىز. مىسال ءۇشىن ايتا كەتەيىن, قازىرگى ۋاقىتتا ءبىزدىڭ اقپاراتتىق پۋلىمىز 58 مەديا جوسپار بويىنشا جۇمىس ىستەيدى. ولاردى جۇزەگە اسىرۋ الگوريتىمى ورتالىق مەملەكەتتىك ورگاندار مەن ۇلتتىق كومپانيالاردىڭ اقپاراتتىق جۇمىستارى ەرەجەسىندە بەكىتىلەتىن بولادى», - دەدى اباەۆ.
ول اقپارتتاندىرۋ سالاسى بويىنشا رەسپۋبليكالىق بيۋدجەتكە سالماق سالماي, كۆازيمەملەكەتتىك سەكتورلار, جەكە ينۆەستورلار قارجىلاندىرۋدى كوزدەيتىن «تسيفرلىق قازاقستان» مەملەكەتتىك باعدارلاماسىنىڭ جوباسى ازىرلەنگەنىن ايتتى. بۇل قادام باسقا دا الەۋمەتتىك ماڭىزدى جوبالارعا باعىتتاۋعا بولاتىن مەملەكەت قاراجاتىن ۇنەمدەۋگە مۇمكىندىك بەرەدى. وسىعان وراي, «تسيفرلىق قازاقستان» باعدارلاماسى شەڭبەرىندە ىسكە اسىرۋعا جوسپارلانعان جوبالار ءۇشىن ينۆەستيتسيالار تارتۋ قامتاماسىز ەتىلمەك.
مينيسترلىك قىزمەتىنىڭ نەگىزگى باعىتتارىنىڭ ءبىرى مەملەكەتتىك قىزمەتتەردى وڭتايلاندىرۋ مەن «ەلەكتروندىق ۇكىمەتتى» دامىتۋ بولسا, بۇل سالادا دا تالاي ءىس اتقارىلىپ جاتىر دەدى داۋرەن اباەۆ. پرەزيدەنتتىڭ تاپسىرماسىمەن, 4 مەملەكەتتىك كاسىپورىندى بىرىكتىرۋ ناتيجەسىندە مەملەكەتتىك كورپوراتسيا قۇرىلدى. ول 1 قازانعا دەيىن 29 ميلليون قىزمەت كورسەتتى. بۇگىنگى كۇنى مەملەكەتتىك قىزمەتتەر تىزبەسىندە 739 قىزمەت ءتۇرى بولسا, سولاردىڭ 530-ىن ەلەكتروندىق ۇكىمەت پورتالى نەمەسە مەملەكەتتىك كورپوراتسيا ارقىلى الۋعا بولادى. جالپى, بۇل شارالار مەملەكەتتىك اقپاراتتىق ساياساتتى بارلىق دەڭگەيدە ءتيىمدى جۇرگىزۋگە مۇمكىندىك بەرۋدە» دەدى داۋرەن اباەۆ.
ءلايلا ەدىلقىزى