قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ گاسترولدىك ساپارىن سولتۇستىكقازاقستاندىق ونەرسۇيەر قاۋىم وتە جىلى قابىلدادى. وسىدان 7 جىل بۇرىن وڭىرگە سوڭعى رەت ات باسىن بۇرعان ىرگەلى ۇجىمنىڭ تىڭ باعدارلاماسىن اۋىل تۇرعىندارى دا ۇلكەن ريزاشىلىقپەن تاماشالاپ, رۋحاني لاززاتقا بولەندى. وركەستردىڭ ديرەكتورى نۇرعيسا داۋەشوۆتىڭ ايتۋىنشا, تاۋەلسىزدىگىمىزدىڭ شيرەك عاسىرلىق مەرەيتويىنا ارنالعان « ۇلى دالا مۇراسى» اتتى كونتسەرتتىك باعدارلاما استانادان باستاۋ الىپ, وڭىرلەردە جالعاسىن تاپقان. العاشقى تۇساۋىن اكادەميك احمەت جۇبانوۆ كەسكەن, سودان بەرگى 80 جىلدىق تاريحىندا دۇنيەنىڭ ءتورت بۇرىشىن تۇگەل شارلاپ, دۇنيەجۇزىلىك جانە حالىقارالىق كونكۋرستاردىڭ تالاي مارتە لاۋرەاتى اتانعان وركەستردىڭ ءومىربايانى وتە باي. قازاقتىڭ ۇلتتىق مۋزىكا ونەرىن تالماي ناسيحاتتاپ, ايداي الەمگە تانىتىپ كەلەدى. وركەستر قورىتىندى كونتسەرتىن وبلىس ورتالىعىنداعى جاستار سارايىندا قويىپ, قاراشاڭىراقتىڭ ابىروي-بەدەلىن اسىرعان مارتەبەلى كەش بولدى.
ءبىز مەملەكەتتىك سىيلىقتىڭ لاۋرەاتى, استاناداعى ۇلتتىق ونەر ۋنيۆەرسيتەتىنىڭ پروفەسسورى, تانىمال ءانشى شاحماردان ابىلوۆپەن سويلەسكەنىمىزدە بىلاي تولعاندى:
– قازاق دالاسى ۇلى تۇركى دۇنيەسىنىڭ قۇتتى مەكەنى سانالسا, بۇگىنگى ۇرپاقتارى ۇلى دالا پەرزەنتتەرى ەكەنى داۋسىز. التاي مەن اتىراۋ, جايىق پەن ىلە, الاتاۋ مەن سارىارقا تاۋەلسىز ەلىمىزدىڭ ءبىر-ءبىر بولشەگى رەتىندە مىزعىماس تۇتاستىعىمىزدى, بىرلىگىمىزدى ايعاقتاپ تۇر. ولاي بولسا, اركەز كورەرمەندەرىن قۋانتىپ جۇرگەن ۇجىمعا مەملەكەتتىلىگىمىزدىڭ ىرگەسىن نىقتاپ, باياندى ەتكەن 25 جىلدىق مەرەيتوي قارساڭىندا ءۇن-ءتۇنسىز وتىرۋ جاراسپاس بولار. اسىرەسە, جاس ۇرپاققا ونەردىڭ, مۋزىكانىڭ قۇدىرەتىن ۇعىندىرىپ, پاتريوتتىق, وتانشىلدىق قاسيەتتەردى ساناسىنا سىڭىرە بىلسەك,ءبىز ءۇشىن ودان اسقان مارتەبە جوق. ماڭگىلىك ەل بولۋ سەكىلدى جالپىۇلتتىق, ماڭىزدى مەملەكەتتىك مىندەتتى تالماي ءتۇسىندىرۋ ۇلاعاتتى پارىزىمىزدىڭ ءبىرى دەسەك تە بولادى.
ماعجاننىڭ «ياپىراي-اي» ءانىن جۇرتشىلىققا تۇڭعىش رەت تانىتقان شاحماردان اعامىز ءسوز اراسىندا مىنا ءبىر ۇسىنىسىن جەرگىلىكتى بيلىكتەگىلەردىڭ نازارىنا جەتكىزۋدى ءوتىندى. قۇرمانعازى اتىنداعى ۇلتتىق كونسەرۆاتوريادا 35 جىلعا جۋىق دەكان, كافەدرا مەڭگەرۋشىسى قىزمەتتەرىن اتقارعان ول قىزىلجار ءوڭىرىنىڭ تۋماسى ەرمەك سەركەباەۆپەن كوپ جىل ارىپتەس, اينىماس دوس بولىپتى. كلاسسيكالىق-اكادەميالىق مۋزىكانىڭ دامۋىنا تەڭدەسسىز ۇلەس قوسقان اتاقتى تۇلعانىڭ ەسىمى ەل جادىنان وشپەسە ەكەن, تۋعان جەرىندە ونىڭ اتىندا فەستيۆال تۇراقتى ۇيىمداستىرىلسا, كوشەلەرگە, ونەر وردالارىنا ەسىمى بەرىلسە دەگەن تىلەگىن العا تارتتى. وركەستردىڭ باس ديريجەرى, «دارىن» مەملەكەتتىك جاستار سىيلىعىنىڭ يەگەرى باتىرجان مىقتىباەۆ ەلباسىنىڭ «الىس ايماقتارداعى تۇرعىنداردىڭ مادەني ورلەۋ ىسىنە اتسالىسۋ» تاپسىرماسى نەگىزىندە مادەنيەت جانە سپورت مينيسترلىگى تاراپىنان قولداۋ تاپقان گاسترولدىك ساپار مامليۋت, قىزىلجار, اققايىڭ, ەسىل, جامبىل اۋداندارىندا ۇلكەن تابىسپەن وتكەنىن, جاڭا باعدارلاما اياسىندا وتاندىق, شەتەلدىك كلاسسيكالىق شىعارمالار قامتىلاتىنىن اتاپ ءوتتى.
كونتسەرت تۇركەشتىڭ «كوڭىلاشار» كۇيىمەن باستالىپ, قۇرمانعازى, تاتتىمبەت, دينانىڭ قۇلاق قۇرىشىن قاندىراتىن كۇيلەرى, كوپۇلتتىق جانە الەمدىك كومپوزيتورلاردىڭ ولمەس تۋىندىلارى اسقان شابىتپەن ورىندالدى. شاحماردان ءابىلوۆ تۋعان جەردىڭ ۇلىلىعىن, قادىر-قاسيەتىن ۇقتىراتىن, جۇرەك تەربەيتىن ساعىنىشتى اندەردى اۋەلەتسە, تۇڭعىش پرەزيدەنت قورى سىيلىعىنىڭ لاۋرەاتى ەرلان رىسقالي ءداستۇرلى اندەردى ناقىشىنا كەلتىرە شىرقادى. حالىقارالىق كونكۋرستاردىڭ لاۋرەاتتارى اسەل راقىمجان, گۇلنۇر كوشەنوۆا, فاحاد كۋبيەۆ تە ءوز ونەرلەرىمەن ءتانتى ەتتى.
كوپشىلىك نازارىنا ۇسىنىلعان قاي شىعارما بولسىن قازاق دالاسىنىڭ كەڭدىگىمەن, دارحاندىعىمەن بىتە قايناسىپ جاتقانداي اسەر قالدىردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى