ەلىمىزدە بيىل «وڭىرلەردى دامىتۋدىڭ جول كارتاسى-2020» باعدارلاماسى مەن مەملەكەتتىك «نۇرلى جول» باعدارلاماسى اياسىندا وتاندىق قۇرىلىس كومپانيالارىنىڭ قولداۋىمەن 326 مىڭ شارشى مەتردى قۇرايتىن جالعا بەرىلەتىن تۇرعىن ءۇي پايدالانۋعا بەرىلەدى دەپ جوسپارلانۋدا.
اتالعان باعدارلامانىڭ دەم بەرۋىمەن بىرقاتار تۇرعىن ۇيلەر تۇركىستان قالاسىنان دا بوي كوتەرۋدە. بۇگىندە بۇل قالادا جالپى الاڭى 7,8 مىڭ شارشى مەتردى قۇرايتىن 144 پاتەردە قونىس توي تويلانادى دەپ كۇتىلۋدە. ونىڭ تەڭ جارتىسى ەكى بولمەلى بولسا (72 ءپاتەر), قالعان جارتىسى ءبىر ءجانە ءۇش بولمەلى پاتەرلەر (36 پاتەردەن). قازىرگى كەزدە اينالىم جولدىڭ بويىندا ورنالاسقان تۇرعىن ءۇي الاڭقايىندا قۇرىلىس جۇمىستارى قىزۋ ءجۇرىپ جاتىر.
– ەرەكشە اتاپ وتكىمىز كەلەتىنى, قۇرىلىسقا پايدالانىلاتىن ماتەريالداردىڭ بارلىعى دەرلىك قازاقستاندا شىعارىلعان وتاندىق ونىمدەر. مىسالى, تسەمەنتتەن باستاپ, ەسىك بلوكتارى, سىرلاۋ, جىلىتۋ ماتەريالدارى مەن بەتون, گازوبلوك, پوليەتيلەن قۇبىرلار, تەرەزە جانە پۆح ۆيتراجدارى, قۇرعاق, اسفالت-بەتوندى قوسپالار, تەمىر-بەتون ونىمدەرى سىندى ماتەريالداردىڭ بارلىعى دا ءوز ەلىمىزدە جاسالعان. ال ەندى پاتەرلەردىڭ تاپسىرىلۋ مەرزىمىنە كەلسەك, شاتتىققا تولى ونداي كۇن تاۋەلسىزدىك مەرەكەسىمەن تۇسپا-تۇس كەلەدى دەپ جوسپارلانعان, – دەيدى «وتاۋ-ستروي» كاسىپورنى باس ينجەنەرى ابجات اكيموۆ.
رەسپۋبليكا كولەمىندە تۇرعىن ءۇي قۇرىلىسىنىڭ قارقىندى جۇرۋىنە مۇرىندىق بولىپ كەلە جاتقان «بايتەرەك» حولدينگىنىڭ ەنشىلەس ۇيىمى – «قازاقستان يپوتەكالىق كومپانياسى» يپوتەكالىق ۇيىمى باعدارلامانىڭ ماڭىزدىلىعى مەن الەۋمەتتىك سيپاتىن ەسكەرە وتىرىپ, بارلىق قاجەتتى ءىس-شارالاردى قابىلداۋدا. وسى ماقساتتا اعىمداعى جىلى كومپانيا باعدارلاما اياسىندا بولىنەتىن نىساندار بويىنشا ارنايى تۋرلار وتكىزۋدە. وسىنداي جوبالار ارقىلى رەسپۋبليكا ازاماتتارى باعدارلامانى ىسكە اسىرۋ بارىسى مەن قۇرىلىس جۇمىستارىنا, الداعى ۋاقىتتا باعدارلاماعا قاتىسۋشىلار تۇراتىن تۇرعىن ءۇي ساپاسىنىڭ ساقتالۋىنا تىكەلەي باقىلاۋ جۇرگىزە الادى.
سونداي-اق, «قازاقستان يپوتەكالىق كومپانياسى» يپوتەكالىق ۇيىمى اتالعان باعدارلاما اياسىندا شىمكەنتتە جالپى الاڭى 54,7 مىڭ شارشى مەتر بولاتىن 900 پاتەرلىك تۇرعىن ءۇي قۇرىلىسىن جۇرگىزۋدە. سونىمەن قاتار, وسى كۇندەرى مەملەكەتتىك-جەكەمەنشىكتىك سەرىكتەستىكتەر ارقىلى استانا قالاسىندا دا 538 پاتەرلى تۇرعىن ءۇي بوي كوتەرۋدە.
نۇرلىبەك دوسىباي,
«ەگەمەن قازاقستان»