داعدارىسقا قاراماستان قازاقستاندىقتار ەلىمىزدە قۇراستىرىلعان وتاندىق جەڭىل كولىكتەردى بەلسەندى ساتىپ الۋدا.
بۇل تۋرالى ورتالىق كوممۋنيكاتسيالار قىزمەتىندەگى بريفينگتە «قازاۆتوونەركاسىپ» قازاقستاننىڭ اۆتوموبيل سالاسى كاسىپورىندارىنىڭ وداعى باسقارماسىنىڭ توراعاسى ولەگ الفەروۆ ءمالىم ەتتى, دەپ حابارلايدى قازاقپارات.
«قازاقستاندىقتار اي سايىن 3200-3500, ال توقسان سايىن شامامەن 10 مىڭ جاڭا جەڭىل اۆتوموبيل ساتىپ الادى. ءبىز مۇنىڭ قانداي دا ءبىر تۇراقتى سان ەكەنىن بايقاپ وتىرمىز. سونىڭ ارقاسىندا وتاندىق اۆتوموبيل ونەركاسىبى ءوزىنىڭ قايتا قالپىنا كەلۋ قوزعالىسىن ورلەتە تۇسەر دەگەن ءۇمىتىمىز بار. مۇنىڭ اعىمداعى جىلدىڭ ءتورتىنشى توقسانىندا ورىن الۋى مۇمكىن ەكەندىگىن دە جوققا شىعارۋعا بولمايدى», - دەدى ول.
ونىڭ اتاپ وتۋىنشە, ەلىمىزدە قۇرالعان كولىكتەردىڭ اقاۋ شىعۋىنا بايلانىستى كەرى قايتارىلعاندارى جوق دەسەك تە بولادى. بولعان كۇننىڭ وزىندە ولاردىڭ سانى ساۋساقپەن سانارلىق قانا.
«بۇل وتاندىق اۆتوزاۋىتتارداعى ءوندىرىس پروتسەسى ساپاسىنا باقىلاۋدىڭ جوعارى دارەجەسىمەن قاتار شىعارىلاتىن كولىك سانىنىڭ شاعىندىعىمەن دە بايلانىستى. اتالعان جايت وتاندىق اۆتوموبيل وندىرىسىنە ءتان. ەستەرىڭىزگە سالا كەتسەك, داعدارىسقا دەيىنگى شىرقاۋ شەگىمىز جىلىنا 40 مىڭ ءاۆتوموبيلدى قۇراعان ەدى», - دەدى الفەروۆ.
سونىمەن قاتار ول باق وكىلدەرىنىڭ قازاقستاندىق اۆتوموبيل برەندىن قۇرۋ ماسەلەسىنە قاتىستى دا ساۋالدارىنا جاۋاپ بەردى. ونىڭ ايتۋىنشا, بۇل ماقساتقا جەتۋ ءۇشىن وتە مول ينۆەستيتسيالىق قارجى كەرەك. ال ول قارجىنىڭ ودان ارى قايتارىمىنىڭ بولۋى دا نەعايبىل.
«بۇعان دەيىن بولماعان جاڭا ءبىر ءونىم شىعارۋ ءۇشىن كەمىندە 800 مىڭ نەمەسە 1 ميلليون دوللار, ال كەيدە 1 ملرد. دوللار قارجى بىرەگەي تۇعىرناما قۇرۋ ءۇشىن قاجەت بولادى. بۇل تالاپ ەتىلەتىن ينۆەستيتسيا كولەمى. ال ول ءبىز ءۇشىن قولجەتىمسىز», - دەدى ول.