ۆەنگر عالىمدارى الداعى 2-3 ايدا كەيكى باتىردىڭ كەلبەتىن قالپىنا كەلتىرۋدى جوسپارلاپ وتىر, - دەپ حابارلايدى "ەگەمەن-اقپارات" Tengrinews.kz سايتىنا سىلتەمە جاساپ.
انتروپولوگ اندراش جولت بيرو ولار بۇل جۇمىستا باتىردىڭ باس سۇيەگىن قولداناتىنىن ايتتى. ايتا كەتەيىك, 2016 جىلدىڭ 13 قازانىندا قازاقستان رەسپۋبليكاسىنىڭ ورتالىق مەملەكەتتىك مۇراجايى (ومم) قازاقستان رەسپۋبليكاسىنىڭ ۆەنگرياداعى ەلشىلىگىنىڭ قولعابىسىمەن بۋداپەشت قالاسىنا كەيكى باتىردىڭ باس سۇيەگى جەتكىزىلگەن بولاتىن.
بيرونىڭ ايتۋىنشا, جۇمىس قورىتىندىسىن قازاقستاندا تانىستىرۋ جوسپارلانعان. "عىلىمي ناتيجەلەردى ءبىز قازاقستاننىڭ تاۋەلسىزدىگى كۇنى تانىستىراتىن شىعارمىز, ارينە ءبىزدى شاقىرعان كەزدە. ءبىز ءۇش ولشەمدى ۇلگىسىن جاسايتىن بولامىز. بۇل باتىردىڭ ەسىمى ماڭگىلىك ەستە ساقتالۋ ءۇشىن جاسالادى", - دەدى بيرو. سونىمەن قاتار, ونىڭ ايتۋىنشا, باتىردىڭ باسسۇيەگىنە ساراپتاما جۇرگىزىپ, باسسۇيەككە تيگەن زاقىمداردى انىقتاپ, كەيكى باتىردىڭ قالاي قايتىس بولعانىن دا انىقتاۋدى جوسپارلاعان. "باسسۇيەكتىڭ ىشكى بولىگىنەن دنق-سىن الۋعا تىرىسامىز. ونى باتىردىڭ ۇرپاقتارىنىڭ دنق-سىمەن سالىستىرۋعا بولادى", - دەدى عالىم.
ەسكە سالايىق, انتروپولوگيالىق ساراپتامانى اندراش جولت بيرو مەن شاندور ەۆينگەر جۇرگىزەدى. ال كەيكى باتىردىڭ بەت-بەينەسىن قالپىنا كەلتىرۋ جۇمىستارىمەن اگنەش كۋشتار اينالىسادى. وسىعان دەيىن, 2011 جىلى اگنەش كۋشتار ءابىلحايىر حاننىڭ (1693-1748 جىلدارى) بەينەسىن قالپىنا كەلتىرۋ جۇمىستارىمەن اينالىسقان.