ۇلت جوسپارىن جۇزەگە اسىرۋ اياسىندا جاسالعان پروباتسيا تۋرالى جاڭا زاڭ قۇقىق بۇزۋشىلار ءۇشىن سوتقا دەيىنگى جانە پەنيتەنتسيارلىق پروباتسيانى ەنگىزەدى, دەپ مالىمدەدى قر ىشكى ىستەر ءمينيسترى قالمۇحانبەت قاسىموۆ قر ۇكىمەتى وتىرىسىندا. بۇل تۋرالى پرەمەر-ءمينيستردىڭ رەسمي سايت حابارلادى.
ق. قاسىموۆ «پروباتسيا تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە پروباتسيا ماسەلەسى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭداردىڭ جوبالارى تۋرالى باياندادى.
مينيستر حابارلاعانداي, پروباتسيا قىزمەتىنىڭ ەسەبىندە تۇرعان تۇلعالارعا الەۋمەتتىك-قۇقىقتىق كومەك كورسەتۋدىڭ دەربەس باعدارلاماسى جەكە تۇلعانى جانە ونىڭ ومىرلىك جاعدايىن كەشەندى زەردەلەۋگە نەگىزدەلىپ, جەرگىلىكتى اتقارۋشى ورگانداردىڭ, ۇيىمدار مەن ازاماتتاردىڭ تاراپىنان كورسەتىلەتىن شارالار كەشەنىن قامتيتىن بولادى.
«پەنيتەنتسيارلىق پروباتسيا قىزمەتىنىڭ نەگىزىنە بوساتىلۋ كەزەڭىندە ماماندىق الۋدى ۇيىمداستىرۋ, ەڭبەك داعدىسىن يگەرۋ, قۇجاتتارىن قالپىنا كەلتىرۋ, ەڭبەك جانە تۇرمىستىق جاعدايىن جوسپارلاۋ ءتارىزدى پارامەترلەر الىندى», - دەدى ق. قاسىموۆ.
مينيستر اتاپ وتكەندەي, پروباتسيانىڭ ەكى ۇلگىسى بولعان جاعدايدا, تەك ءبىر جىلدىڭ ناتيجەلەرىنىڭ ءوزى جاڭا قىلمىستاردىڭ الدىن الۋدا ايتارلىقتاي تيىمدىلىگىن كورسەتتى.
«ەلىمىزدىڭ قىلمىستىق زاڭىن الەمدىك تاجىريبەمەن ورايلاستىرۋ ءۇشىن قۇقىق بۇزۋشىلارعا قىلمىستىق-قۇقىقتىق ىقپال ەتۋدى ارتتىرۋ سالاسىن كەڭەيتۋ ماقساتىندا 2012 جىلدان بەرى قولدانىستا بولىپ كەلە جاتقان ۇكىمدىك جانە پەنيتەنتسيارلىقتان كەيىنگى كەزەڭدەرمەن قاتار سوتقا دەيىنگى جانە پەنيتەنتسيارلىق پروباتسيا ەنگىزىلەدى», - دەپ ناقتىلادى ق. قاسىموۆ.
سوتقا دەيىنگى پروباتسيا كەزەڭىندە جۇرگىزىلىپ جاتقان جۇمىستار ناتيجەلەرى بويىنشا پروباتسيا قىزمەتى بايانداما جازاتىن بولادى, وندا كۇدىكتىنىڭ جەكە باسىنىڭ ەرەكشەلىكتەرى تۋرالى سوتقا ارنالعان اقپارات, سايكەس شارالاردىڭ ورىندالۋى نەمەسە ولاردى ورىنداۋعا دەگەن ۇمتىلىسى قامتىلادى. سوت باس بوستاندىعىنان ايىرۋ تۋرالى ۇكىم شىعارعان جاعدايدا پروباتسيانىڭ كەلەسى ۇلگىسى – پەنيتەنتسيارلىق پروباتسيا قولدانىسقا ەنگىزىلەدى.
ءىىم باسشىسى اتاپ وتكەندەي, ۇلت جوسپارى – بەس ينستيتۋتتىق رەفورمانى جۇزەگە اسىرۋ بويىنشا 100 ناقتى قادامنىڭ 33 قادامىن ورىنداۋ ماقساتىندا قر ءىىم ازىرلەگەن زاڭ جوباسىن قابىلداۋدىڭ ماقساتى قىلمىستىق سوت تورەلىگىن الەۋمەتتەندىرۋ الەۋەتىن كەڭەيتۋ, قىلمىستىق ساياساتتى ودان ءارى ىزگىلەندىرۋ بولىپ تابىلادى.