بۇگىن ەكسپو-2017 حالىقارالىق مامانداندىرىلعان كورمەسىنىڭ ۇيىمداستىرۋشى كەڭسەسىندە «استانا ەكسپو-2017» ۇلتتىق كومپانياسى» اق باسقارما توراعاسى احمەتجان ەسىموۆ ۆەنگريانىڭ ۇلتتىق ەكونوميكا جونىندەگى ءمينيسترى ميحاي ۆارگامەن كەزدەستى. باسقوسۋ بارىسىندا ەكى جاق «استانا ەكسپو-2017» كورمەسىنە ۆەنگريانىڭ قاتىسۋى بارىسى تۋرالى تالقىلادى.
احمەتجان ەسىموۆ قازاقستان مەن ۆەنگريانى تەرەڭ تاريحي تامىر مەن مادەني ءداستۇردىڭ بايلانىستىراتىندىعى اتاپ ءوتتى. باسقارما توراعاسى ەكسپو نىساندارىنىڭ دايىندىعىنا جانە پاۆيلونداردىڭ حالىقارالىق قاتىسۋشىلارعا وتكىزۋگە دايىن ەكەندىگىنە توقتالدى, دەپ حابارلايدى «استانا ەكسپو-2017» ۇلتتىق كومپانياسى» اق ءباسپاسوز قىزمەتىنەن.
«ءبىز ۆەنگر پاۆيلونىن كوردىك, بارلىق جۇمىستاردىڭ مەرزىمىنە سايكەس جۇرگىزىلىپ جاتقاندىعىن بىلدىك. ءبىز وسى ءىس-شاراعا مەيلىنشە كوپ ۆەنگريا كاسىپورىندارىن تارتۋعا تالپىندىق. بۇل رەتتە, ءبىزدىڭ وسى دەلەگاتسيا قۇرامىنا 60 بيزنەسمەن قوسىلدى», - دەدى ۆەنگريانىڭ ۇلتتىق ەكونوميكا جونىندەگى ءمينيسترى.
ەكسپو-2017 قاتىسۋشىلارى مەن قوناقتارىن تاسىمالداۋ ءۇشىن ۆەنگرلىك ارىپتەستەر كورمەگە سوناۋ كەڭەس وداعى كەزىنەن بەلگىلى يكارۋس جاڭا زاماناۋي ەلەكتروبۋستارىنىڭ شۋسىز, قورشاعان ورتانى لاستامايتىن تۇرلەرىن اكەلۋگە دايىن ەكەندىگىن جەتكىزدى.
ايتا كەتۋ كەرەك, بۇگىندە استانا ەكسپو-2017 كورمەسىنە ءوزىنىڭ قاتىساتىندىعىن 104 مەملەكەت پەن 17 حالىقارالىق ۇيىم راستادى, 98 مەملەكەت كوميسسارلارىن تاعايىنداپ, 82 قاتىسۋ كەلىسىمشارتىنا قول قويىلدى.