مەملەكەت باسشىسى نۇرسۇلتان نازارباەۆ قورعانىس جانە اەروعارىش ونەركاسىبى ءمينيسترى بەيبىت اتامقۇلوۆتى قابىلدادى.
كەزدەسۋ بارىسىندا ەلباسى جاڭا مينيسترلىكتىڭ الدىنا قويىلعان مىندەتتەردىڭ ماڭىزدىلىعىنا توقتالىپ ءوتتى. اتاپ ايتقاندا, نۇرسۇلتان نازارباەۆ جاڭا تەحنولوگيانى قولدانۋ ارقىلى وندىرىلەتىن قورعانىس جانە اەروعارىش ونەركاسىبى ونىمىنە دەگەن سۇرانىستى قامتاماسىز ەتۋ ءۇشىن وتاندىق كاسىپورىندار ءوز مۇمكىندىكتەرىن بارىنشا پايدالانۋ قاجەتتىگىنە نازار اۋداردى. ب.اتامقۇلوۆ مينيسترلىكتە جۇرگىزىلىپ جاتقان كەشەندى ۇيىمداستىرۋشىلىق ءىس-شارالاردىڭ اياقتالۋعا تاياعانى جونىندە حاباردار ەتتى. سونداي-اق, قورعانىس جانە اەروعارىش ونەركاسىبى ءمينيسترى مەملەكەت باسشىسىنا ازاماتتىق سالادا قولدانۋعا جارامدى ءونىم شىعارۋعا مۋلتيپليكاتيۆتىك اسەر بەرەتىن اەروعارىش سالاسىن دامىتۋدىڭ, قورعانىس كەشەنىنىڭ ءوندىرىس قۋاتىن ارتتىرۋدىڭ پەرسپەكتيۆاسى تۋرالى باياندادى. نۇرسۇلتان نازارباەۆ كەزدەسۋ قورىتىندىسى بويىنشا بىرقاتار ناقتى تاپسىرما بەردى.