پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆا ماجارستان سىرتقى ەكونوميكا جانە سىرتقى ىستەر مينيسترلىگى مەملەكەتتىك حاتشىسىنىڭ ورىنباسارى جولت چۋتورامەن كەزدەستى, دەپ حابارلادى پارلامەنت سەناتىنىڭ ءباسپاسوز قىزمەتى.
جۇزدەسۋشىلەر قازاقستان مەن ماجارستان قاتىناستارىنىڭ ستراتەگيالىق سيپاتىن اتاپ ءوتتى.
سەناتور وتكەن جىلعى جەلتوقساننىڭ اياعىندا قازاقستان مەن ەۋرووداق اراسىندا كەڭەيتىلگەن ءارىپتەستىك جانە ىنتىماقتاستىق تۋرالى جاڭا كەلىسىمگە قول قويىلعانىنا نازار اۋداردى. «ءبىز ماجارستاننىڭ مەملەكەتتىك جينالىسىمەن قوسا, ەۋروپالىق وداققا مۇشە بارلىق مەملەكەتتەردىڭ ۇلتتىق پارلامەنتتەرى كەلىسىمدى تەزىرەك راتيفيكاتسيالايتىنىنا سەنىم ارتىپ وتىرمىز»,– دەدى د.نازارباەۆا.
ساۋدا-ەكونوميكالىق ىنتىماقتاستىق تۋرالى ايتا كەلىپ, تاراپتار ەكىجاقتى تاۋار اينالىمىن ارتتىرۋ قاجەتتىگىن اتاپ ءوتتى. سەناتتاعى ماجارستانمەن ىنتىماقتاستىق جونىندەگى پارلامەنتتىك توپتىڭ جەتەكشىسى د.نازارباەۆا ەكى ەل اراسىنداعى تۋريستىك ساپارلاردى جيىلەتۋدىڭ ماڭىزدىلىعىنا توقتالدى. سەناتور استانادا وتەتىن حالىقارالىق ەكسپو-2017 كورمەسى اياسىندا ماجارلىق ساياحاتشىلاردى قازاقستانعا كەلۋگە, سونداي-اق ماجارلىق ينۆەستورلاردى قازاقستانداعى اۋىل شارۋاشىلىعى ونىمدەرىن وڭدەۋ سالاسىندا ءوندىرىس ۇيىمداستىرۋعا شاقىردى.
ج.چۋتورا د.نازارباەۆاعا بىرلەسكەن ينفراقۇرىلىمدىق جانە ءبىلىم بەرۋ جوبالارى تۋرالى حاباردار ەتتى. ول ماجارستان 200-گە جۋىق قازاقستاندىق ستۋدەنتتى, ونىڭ ىشىندە, اگرارلىق سالا ماماندىقتارى بويىنشا تەگىن وقىتۋدى جوسپارلاپ وتىرعانىن ايتتى.