KAZRC گەولوگيالىق بارلاۋ جۇمىستارىنىڭ ناتيجەلەرى, مينەرالدى رەسۋرستار مەن قورلار جونىندەگى جاريا ەسەپتىلىكتىڭ قازاقستاندىق كودەكسىن CRIRSCO حالىقارالىق ستاندارتتار جونىندەگى كوميتەتى ماقۇلداعان. بۇل تۋرالى كەشە ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ينۆەستيتسيالار جانە دامۋ مينيسترلىگىنىڭ گەولوگيا جانە جەر قويناۋىن پايدالانۋ كوميتەتىنىڭ توراعاسى بازارباي نۇراباەۆ حابارلادى.
اتالعان ءباسپاسوز ءماليحاتىنا «KAZRC گەولوگيالىق بارلاۋ جۇمىستارىنىڭ ناتيجەلەرى, رەسۋرستار مەن قورلار تۋرالى بۇقارالىق ەسەپتىلىكتىڭ قازاقستاندىق قاۋىمداستىعى» زاڭدى تۇلعالار بىرلەستىگىنىڭ اتقارۋشى ديرەكتورى ساۋلە ورازاەۆا, «جتسكب» جەر قويناۋىن پايدالانۋداعى تاۋەلسىز ساراپشىلار كاسىبي بىرلەستىگى اتقارۋشى كوميتەتىنىڭ مۇشەسى نيكولاي ەنشين قاتىستى.
گەولوگيا جانە جەر قويناۋىن پايدالانۋ كوميتەتى توراعاسى وسىلايشا ەلىمىزگە قاتتى پايدالى قازبالار قورى جونىندە ەسەپ بەرۋدىڭ حالىقارالىق ستاندارتتار جۇيەسى ەنگىزىلگەنىن اتاپ ءوتتى. گەولوگيالىق بارلاۋ جۇمىستارىنداعى بۇل جەتىستىك «100 ناقتى قادام» ۇلت جوسپارىنىڭ اياسىندا جۇزەگە اسىرىلىپ وتىر. كودەكس كومپانيالاردىڭ مينەرالدى-شيكىزات اكتيۆتەرىن تاۋەلسىز باعالاۋدى دايارلاۋعا, سونداي-اق, جەر قويناۋىن پايدالانۋ جوبالارىن قارجىلاندىرۋ ماقساتىمەن وتاندىق جانە شەتەلدىك الاڭداردا ينۆەستيتسيالار تارتۋعا ارنالعان.
«ءىس جۇزىندە جەر قويناۋىن پايدالانۋ سالاسىنداعى الەمنىڭ بارلىق بيرجالارى CRIRSCO ستاندارتتارى بويىنشا ازىرلەنگەن ەسەپتىلىكتى قابىلدايدى. ويتكەنى, بۇل ستاندارتتار ينۆەستورلار ءۇشىن نەگىزگى قاۋىپ – كومپانيالاردىڭ ەسەپتىلىگىندە كورسەتىلگەن رەسۋرستار مەن قورلاردى راستاي الماۋ قاۋپىن ەداۋىر ازايتۋعا سەبەپشى بولادى», دەدى ب.نۇراباەۆ. ونىڭ ايتۋىنشا, CRIRSCO كوميتەتىنە قازاقستاننان KAZRC قاۋىمداستىعى مۇشە بولدى.
ەسەپتىلىكتىڭ حالىقارالىق ستاندارتتارىنا كوشۋ قازاقستاندا يۋنيورلىق كومپانيالار نارىعىن قۇرۋعا جانە دامىتۋعا ىقپال ەتەدى جانە بارلاۋ جۇمىستارىنىڭ كولەمىن ارتتىرۋ ارقىلى جاڭا كەن ورىندارىن اشۋعا مۇمكىندىك تۋدىرادى, سونداي-اق, حالىقارالىق بيرجالارعا شىعۋ ءۇشىن ۇسىنىلاتىن اقپاراتتىڭ اشىقتىعى مەن دۇرىستىعىن قامتاماسىز ەتەدى دەپ كۇتىلۋدە.
قازىرگى ۋاقىتتا قازاقستاندا 24 قانا جەر قويناۋىن پايدالانۋشى كومپانيا قازاقستان قور بيرجاسىندا ينۆەستيتسيالىق قاراجات تارتادى جانە نەبارى 7 كومپانيا عانا شەتەلدىك بيرجالاردا تىركەلگەن.
يدم گەولوگيا جانە جەر قويناۋىن پايدالانۋ كوميتەتى وسى رەتتە بىرنەشە باعىت بويىنشا جۇمىس جۇرگىزۋدى جوسپارلاۋدا. ماسەلەن, KAZRC ستاندارتتارى بويىنشا بيرجاعا ۇسىنۋ ءۇشىن ەسەپتىلىكتى قۇراستىرۋ ماسەلەسىن جەر قويناۋىن پايدالانۋشى كومپانيالارمەن تالقىلاۋدى قولعا الماق. سونداي-اق, ۇلتتىق كومپانيا رەتىندە «قازگەولوگيا» اق-تا KAZRC ستاندارتتارى بويىنشا بىرلەسكەن ينۆەستيتسيالىق بارلاۋ جوبالارى جونىندەگى ەسەپتىلىكتى قۇراستىرا باستاۋى ءتيىس. ويتكەنى, «قازگەولوگيا» كومپانياسىنىڭ ينۆەستيتسيالىق سەرىكتەستەرى – ءوز تاجىريبەسىندە حالىقارالىق ستاندارتتاردى پايدالاناتىن, كەن وندىرەتىن الەمنىڭ ءىرى كومپانيالارى.
دينارا بىتىكوۆا,
«ەگەمەن قازاقستان»