قاراعاندى وبلىسىندا مەتاللۋرگيا سالاسى بويىنشا ەكى بىردەي ينۆەستيتسيالىق ءىرى جوبا ىسكە اسىرىلماقشى. جالپى قۇنى 14,5 ملرد تەڭگە بولاتىن بۇل جوبالار وبلىس اكىمدىگىندە وتكەن مەملەكەتتىك يندۋستريالىق-يننوۆاتسيالىق دامۋ باعدارلاماسى جونىندەگى كەڭەس وتىرىسىنىڭ قاراۋىنا ۇسىنىلعان بولاتىن.
اتالعان كەڭەس ءوندىرىس سالاسىن وركەندەتۋگە سەپتىگى تيەتىن بۇل جوبالاردى 2015-2019 جىلدارعا ارنالعان كاسىپكەرلىكتى قولداۋ كارتاسىنا ەنگىزۋدى ءبىراۋىزدان ماقۇلدادى.
وبلىستىڭ شەت اۋدانىندا ورنالاساتىن «كاتودتى مىس شىعارۋ بويىنشا زاۋىت قۇرىلىسى» جوباسىن «Saryarka Copper processing» جشس جۇزەگە اسىرماقشى. جاڭا زاۋىت سالىنىپ بىتكەن سوڭ, ول ءوندىرىستىڭ تولىق تسيكلىن اتقاراتىن كەشەنگە اينالادى. مىسالى, كەندى قازىپ الىپ, شيكىزاتتى وڭدەۋگە دايىنداپ, سونان سوڭ بارىپ كاتودتى مىس ءوندىرۋ سىندى جۇمىستاردىڭ بارلىعى دا زاۋىتتىڭ ءوز ىشىندە اتقارىلاتىن بولادى.
كاتودتى مىس وندىرەتىن كەشەن ىسكە قوسىلعاننان كەيىن بۇل جەردە 350 ادام جۇمىسپەن قامتىلادى. ءوندىرىسى جوعارى تەحنولوگياعا لايىقتالعان زاۋىتتىڭ ءونىمىن بولاشاقتا قىتاي مەن ەۋرووداق ەلدەرىنىڭ نارىعىنا شىعارۋ كوزدەلگەن.
مەتاللۋرگيالىق ءوندىرىستى دامىتۋ جانە كاتودتى مىس ەكسپورتىن ارتتىرۋعا باعىتتالعان تاعى ءبىر جوبا بالقاش قالاسىندا ىسكە اسىرىلادى. قازىردىڭ وزىندە بۇل جەردە «ەدۆانس ماينينگ تەحنولودجي» فيرماسى ساياق كەن ورنىنداعى قالدىقتاردان SX-EW ءادىسى بويىنشا مىستى سىلتىسىزدەندىرىپ ايىراتىن تاجىريبەلىك زاۋىتتىڭ قۇرىلىسىن باستاپ كەتتى. جوبانىڭ جالپى قۇنى 513 ملن تەڭگە. جاڭا زاۋىتتىڭ ونىمدەرى الدىمەن ەل ىشىندەگى قاجەتتىلىكتى وتەيتىن بولادى. سونىمەن قاتار, رەسەي, قىتاي, تۇركيا جانە ەۋرووداق ەلدەرىنە ەكسپورتقا شىعارۋ دا جوسپاردا بار.
قايرات ءابىلدينوۆ,
«ەگەمەن قازاقستان»
قاراعاندى