ەلوردادا تۇڭعىش قازاق عارىشكەرى توقتار اۋباكىروۆتىڭ عارىشقا ۇشۋىنىڭ 25 جىلدىعىنا ارنالعان «عارىشقا عىلىم ارقىلى» تاقىرىبىمەن حالىقارالىق عىلىمي-ءتاجىريبەلىك كونفەرەنتسيا ءوتتى. شاراعا الىس-جاقىن شەت مەملەكەتتەردىڭ عالىمدارى مەن وتاندىق عارىش سالاسىنىڭ ۇزدىك ماماندارى جانە ۋنيۆەرسيتەت ستۋدەنتتەرى قاتىسىپ, ادامزاتتىڭ اسپان الەمىن تانىپ-ءبىلۋ مەن عارىشتى يگەرۋگە قاتىستى سونى جاڭالىقتاردى ءسوز ەتتى.
حالىق قاھارمانى, كسرو-نىڭ ۇشقىش-سىناقشىسى, تەحنيكا عىلىمدارىنىڭ دوكتورى, «تۇران-استانا» ۋنيۆەرسيتەتىنىڭ پروفەسسورى توقتار وڭعارباي ۇلىنىڭ عارىشقا العاش ۇشۋى مەن تاۋەلسىزدىگىمىزدىڭ 25 جىلدىق مەرەيتويىنىڭ تۇسپا-تۇس كەلۋى ايرىقشا اتاپ وتەرلىك جايت. سوعان سايكەس, جاستاردىڭ عىلىمعا بەت بۇرۋىندا باسپالداق سانالاتىن ۋنيۆەرسيتەت شاڭىراعىندا ۇلت باتىرىمەن ارنايى كەزدەسۋ وتكىزۋدىڭ استارىندا تەرەڭ ءمان جاتىر.
«بۇل جەردە ءبىزدىڭ كوزدەگەنىمىز, بۇگىنگى جاستارىمىزعا ءوز عارىشكەرلەرىمىزدى ۇلگى, ونەگە ەتە وتىرىپ, عىلىمدى ناسيحاتتاۋ. وسىلايشا, ولاردىڭ زەرتتەۋلەرى مەن ينتەللەكتۋالدىق الەۋەتتەرىن كەيىنگى تولقىن ءىنى-قارىنداستارىمىزعا وقىتىپ, ۇيرەتسەك دەگەن نيەتپەن جۇزەگە اسىرىلىپ جاتقان شارا», – دەيدى اتالمىش وقۋ ورنىنىڭ عىلىمي جۇمىستار جونىندەگى پرورەكتورى تەمىرحان تولقىنباەۆ.
حالىقارالىق دەڭگەيدە ۇيىمداستىرىلىپ وتىرعان كونفەرەنتسيا بولعاندىقتان, مۇندا باس-اياعى 122 بايانداما تاقىرىپتىق سەسسيالارعا ءبولىنىپ, تىڭدالدى. وتىرىسقا جەتەكشىلىك ەتكەن «تۇران-استانا» ۋنيۆەرسيتەتىنىڭ رەكتورى, پروفەسسور گۇلجامال جاپاروۆا: «قوس مەرەكەنىڭ قاتار كەلۋىنە وراي, جاستارىمىز ءۇشىن ءبىز وسىنداي تانىمدىق تۇرعىدا بەرەرى مول كەزدەسۋ ۇيىمداستىرۋدى ءجون كوردىك. بۇگىنگى جيىنعا ۇلتىمىزدىڭ قوس ماقتانىشى – توقتار وڭعارباي ۇلى مەن ءۇشىنشى عارىشكەرىمىز ايدىن ايىمبەتوۆ عانا كەلگەن جوق, رەسەيدى ايتپاعاننىڭ وزىندە, ۇلىبريتانيا مەن تۇركيا, بولگاريا, قىتاي, ۋكراينا سىندى مەملەكەتتەردىڭ دە عارىش سالاسىنا ەڭبەگى سىڭگەن ۇزدىك عالىم, ماماندارى شاقىرىلىپ, ارنايى ءدارىس وقۋدا. ءبىز ءۇشىن بۇل – زور جەتىستىك. جاستارىمىزدىڭ عىلىمعا بەت بۇرىپ, وتاندىق عارىش سالاسىنىڭ, جالپى عىلىمنىڭ دامۋىنا ۇلەس قوسۋى وسىنداي كونفەرەنتسيالاردان باستاۋ السا كەرەك», – دەدى.
«قازاقستان عارىش ساپارى» قك» اق پەن ەلىمىزدەگى بىرقاتار جوعارى وقۋ ورىندارىنىڭ جانە رەسەي, ۋكراينا, بولگاريا, تۇركيا, قىتاي ۋنيۆەرسيتەتتەرىنىڭ اتسالىسۋىمەن وتكەن جيىنعا عارىش سالاسى بويىنشا تانىمال وتاندىق جانە شەتەلدىك عالىمدار, قازاقستان مەن رەسەي جوو رەكتورلارى دا قاتىستى. سونداي-اق, ازاماتتىق اۆياتسيا وكىلدەرى مەن ءماجىلىس دەپۋتاتتارى جانە قوعام قايراتكەرلەرى ءۇن قوسىپ, پىكىر الماسقان القالى جيىندا توقتار وڭعارباي ۇلىنىڭ قۇرمەتىنە مەرەكەلىك كونتسەرت ۇيىمداستىرىلىپ, ارنايى سىي-سياپات جاسالدى.
نۇرلىبەك دوسىباي,
«ەگەمەن قازاقستان»