بوكسسۇيەر قاۋىم قازاننىڭ 29-ى كۇنى «الماتى ارەنا» سارايىندا وتەتىن بوكس كەشىن تىكەلەي ەفير ارقىلى «قازاقستان» ۇلتتىق ارناسىنىڭ ەفيرىنەن تاماشالاي الادى, دەپ حابارلايدى ەگەمەن-اقپارات.
اتالمىش كەشتىڭ باستى كەزدەسۋى - قازاقستاندىق قانات يسلام مەن پاتريوك اللوتەي اراسىندا وتەدى. قارسىلاستار WBA Fedelatin اتاعى مەن WBO Intercontinental دارەجەسىندەگى چەمپيوندىق بەلبەۋ ءۇشىن باق سىناسادى.
كورەرمەندەر وسى كەشتەگى بارلىق كەزدەسۋلەردى ساعات 18-00-دەن باستاپ تاماشالاي الادى.
ايتا كەتەيىك, جاقىندا عانا قانات يسلام الماتىدا اشىق جاتتىعۋ وتكىزدى.
«ءوز وتانىمدى مۇنداي كەزدەسۋ وتكىزۋ مەن ءۇشىن مارتەبە. مەنىڭ قارسىلاسىم وسال ادام ەمەس. ول ءوزى وتكىزگەن 36 كەزدەسۋدىڭ 28-ءىن نوكاۋتپەن جەڭگەن. مەن جانكۇيەرلەرىمنىڭ قولداۋ كورسەتەتىنىنە سەنەمىن»,-دەدى قانات سۇباتتارىنىڭ بىرىندە.
بۇل كەشتە كورەرمەندەر الەم چەمپيونى, ازيا جانە ازيا ويىندارىنىڭ جەڭىمپازى, ريو-دە جانەيرودا وتكەن وليمپيادا ويىندارىنىڭ قاتىسۋشىسى جانىبەك ءالىمحان ۇلىنىڭ كەزدەسۋىن دە تاماشالايدى. ول كاسىپقوي بوكستاعى العاشقى كەزدەسۋىن كولۋمبيالىق ميلتون نۋنەسكە قارسى وتكىزەدى.
سونداي-اق وسى كۇنى بوكسسۇيەر قاۋىم قازاقستاندىق تانىمال بوكسشىلار جانقوش تۇراروۆ, رۋسلان مىرساتاەۆ, ءالي احمەتوۆ, ايدار شاريباەۆ پەن ايدوس ەربوسىن ۇلىنىڭ دا جەكپە-جەكتەرىن تاماشالايدى.