قاراعاندىدا انجەلا شتەينگارتتىڭ اۆتورلىق ءان كەشى بولىپ ءوتتى. كەنشىلەر قالاسىنىڭ تۋماسى, قازىر يزرايلدە تۇراتىن ءانشى, اقىن, سازگەر تۋعان جەرىنە ارنايى كەلىپ, ونەر كەشىن قازاقستان تاۋەلسىزدىگىنىڭ 25 جىلدىق مەرەيتويىنا ارنادى. كەش قوناقتارىنىڭ قاتارىندا قالا مەن وبلىس باسشىلارى, قازاقستان حالقى اسسامبلەياسىنىڭ, ەتنومادەني بىرلەستىكتەردىڭ وكىلدەرى, «مارياننا» اۆتورلىق ءان كلۋبى مەن «شىعارماشىلىق ورتا» جوباسىنىڭ مۇشەلەرى بولدى.
كونتسەرت قاراعاندىداعى «بولاشاق» اكادەمياسىنىڭ زالىندا ءوتتى. جەتى جىلداي بۇرىن وسى وقۋ ورنىنىڭ بۇرىنعى رەكتورى, قازىرگى ءماجىلىس دەپۋتاتى نۇرلان دۋلاتبەكوۆتىڭ باستاماسىمەن, وقۋ-تاربيە ماسەلەلەرى الاڭداتقان جانداردىڭ باسىن قوساتىن پەداگوگيكالىق سالون اشىلعان بولاتىن. سودان بەرى بۇل بەيرەسمي بىرلەستىك كوپتەگەن يگى شارالارعا: كورمەلەر مەن سەمينارلارعا, دوڭگەلەك ۇستەل وتىرىستارى مەن كىتاپ تۇساۋكەسەرلەرىنە, ءار سالاداعى بەلگىلى تۇلعالارمەن كەزدەسۋلەرگە مۇرىندىق بولىپ كەلەدى.
انجەلانىڭ ورىنداۋىندا Youtube جەلىسىنەن كورىپ, تىڭداۋعا بولاتىن «قاراعاندى» ءانى پەداگوگيكالىق سالون مۇشەلەرىن دە تەبىرەنتىپ, جەرلەسىمىزدىڭ شىعارماشىلىعىنا دەن قويعان ولار ونەر يەسىن تۋعان قالاسىنا ارنايى شاقىرىپتى. ول ءان جازۋمەن بالا كەزىنەن شۇعىلدانادى ەكەن. انىنە ءسوزدى دە ءوزى جازادى. ءوز اندەرىمەن قاتار وزگە اۆتورلاردىڭ دا اندەرىن تاماشا ورىندايدى. لەنينگراد مادەنيەت ينستيتۋتىنىڭ رەجيسسۋرا جانە دراماتۋرگيا ءبولىمىن تامامداعان انجەلا ەڭبەك جولىن بىشكەك دراما تەاترىندا اكتريسا بولىپ باستاعان. 2003 جىلى تۇڭعىش جەكە ءان جيناعى جارىققا شىعىپتى. بۇگىندە سونداي ءۇش البومى بار. بارد انشىلەردىڭ تۇركيادا وتكەن بۇكىلالەمدىك فەستيۆالىنە قاتىسقان. 2006 جىلى بولگاريادا, 2007 جىلى يسپانيادا وتكەن فەستيۆالداردىڭ گران-پري جۇلدەلەرىن جەڭىپ العان.
قازىر انجەلا – تەل-ءاۆيۆتىڭ ەڭ ۇلكەن ونەر وردالارىنىڭ ءبىرى «گەشەر» تەاترىنىڭ اكتريساسى, «پوسيدەلكي ۋ انجەليكي» ادەبي-مۋزىكالىق جوباسىنىڭ اۆتورى ءارى جۇرگىزۋشىسى.
انجەلا شتەينگارت وسى ساپارىندا ستۋدەنتتەرمەن دە جەكە كەزدەسۋ وتكىزدى. ونىڭ اندەرىن تىڭداعان جاستار تەبىرەنىسكە بولەنىپ, رۋحاني ءلاززات الدى. ومىرگە قۇشتار اندەر ولارعا دا ءبىر تىڭ سەرپىن بەرگەن سياقتى.
قايرات ءابىلدينوۆ, قاراعاندى