كاسىپتىك-تەحنيكالىق كوللەدجدە وقيتىن شاردارالىق ازامات ەڭبەك دوداسىندا ەشكىمگە ەسەسىن جىبەرمەدى
وڭتۇستىك قازاقستان وبلىسى, شاردارا اۋدانىنداعى №16 كوللەدجدىڭ ءىى كۋرس ستۋدەنتى جانارىس تاۋباي ءبىلىم جانە عىلىم مينيسترلىگى ۇيىمداستىرۋىمەن استانادا وتكەن «Worldskills Kazakhstan – 2016» ۇلتتىق چەمپيوناتىندا ءىى ورىندى يەلەندى. جۇمىسشى كاسىپتەرىنىڭ بەدەلىن ارتتىرۋ, جاستاردى تەحنيكالىق جانە كاسىپتىك بىلىممەن قامتۋدى كەڭەيتۋ ماقساتىندا قولعا الىنعان جوباعا ەلىمىزدەگى 135 كاسىپتىك ءبىلىم بەرۋ مەكەمەسىنەن ۇمىتكەرلەر قاتىسقان بولاتىن. 15 ماماندىق بويىنشا ءوزارا سىنعا تۇسكەن جاستاردىڭ كاسىبي دەڭگەيىنە شەتەلدىك شەبەرلەر مەن ءىرى كاسىپورىنداعى بىلىكتى مامانداردان قۇرالعان قازىلار القاسى ءادىل دە لايىقتى باعاسىن بەردى.
ەسكە سالا كەتەيىك, جانارىس تاۋباي بۇعان دەيىن وبلىستىق دودادا ارىپتەستەرىنەن وق بويى وزىق كورىنگەن بولاتىن. كوللەدجدە قۇرىلىسشى ماماندىعى بويىنشا ءبىلىم الىپ جاتقان جانارىستى استانا قالاسىندا وتكەن بايقاۋعا توپ شەبەرى سۇندەتۋللا ماماسەرىپوۆ پەن ديرەكتوردىڭ وندىرىستىك وقىتۋ جۇمىستارى جونىندەگى ورىنباسارى ءابدىراحمان مومىنوۆ الىپ باردى. ءبىر اپتاعا سوزىلعان ۇلتتىق چەمپيوناتتا تۇلەكتەر وزدەرىنە جۇكتەلگەن مىندەتتەردى مۇلتىكسىز ورىنداۋعا تىرىسىپ باقتى. «قۇرعاق قۇرىلىس جانە سىلاق جۇمىستارى» بويىنشا سىنعا تۇسكەن جانارىس وسى كونكۋرستاعى 4 ساتىدان تۇراتىن بايقاۋ شارتتارىنىڭ بارلىعىن ءوز دەڭگەيىندە ورىندادى, ياعني ەلەمەنتتەردىڭ كاركاسىن جيناپ, ونى گيپسوكارتونمەن قاپتاي وتىرىپ, سىلاق جۇمىسىن شەبەرلىكپەن جاساي ءبىلدى. ەركىن تاقىرىپ بويىنشا قابىرعاعا جاسالعان راۋشان گۇلدەرىنىڭ اللەياسى دا كاسىبي مامانداردىڭ نازارىن وزىنە اۋدارتتى. ناتيجەسىندە قازىلار القاسى شاردارالىق ۇمىتكەردىڭ ەڭبەگىنە جوعارى باعا بەرىپ, مارتەبەلى جۇلدەمەن ماراپاتتادى.
جاسىراتىنى جوق, بۇدان بۇرىنعى بايقاۋلاردا بۇل جۇلدە كوبىنە وزگە ەتنوس وكىلدەرىنىڭ قانجىعاسىندا كەتەتىن. جانارىستىڭ جەڭىسى بىزگە بۇل تۇسىنىكتىڭ الدەقاشان ەسكىرگەن ۇعىم ەكەنىن دالەلدەدى. ويتكەنى, قازىر باياعىداي اۋىل بالالارىنىڭ جاپپاي جوعارى وقۋ ورنىنا تۇسۋگە جارىسى تىيىلعان. سول ءۇشىن دە اۋىل جاستارى تاراپىنان ەتىكشى, مونتەرشى, دانەكەرلەۋشى, اعاش ۇستاسى, ت.س.س قازاق جاستارى ءۇشىن تىڭ سانالعان سالالاردى, بۇگىندە قوعامعا اسا قاجەتتى ماماندىقتاردى مەڭگەرۋگە ۇمتىلىس ءجيى بايقالادى.
ۇلتتىق چەمپيوناتتىڭ قورىتىندىسىندا جانارىس تاۋباي مەن ۇستازى سۇندەتۋللا ماماسەرىپوۆكە ارنايى سەرتيفيكات تابىس ەتىلدى. «KNAUF» نەمىس فيرماسى اقشالاي-زاتتاي سىيلىق بەردى. تۇركيانىڭ «Tiko» فيرماسىنىڭ وكىلدەرى الداعى ۋاقىتتا جانارىس پەن ونىڭ ۇستازىنا وزدەرىندە ءبىر اپتالىق تاجىريبە الماسۋعا ارنايى شاقىرتۋ بەرەتىن بولدى.
ءادىل ءابدىرامانوۆ
وڭتۇستىك قازاقستان وبلىسى,
شاردارا قالاسى