الماتى, جامبىل, قىزىلوردا, ماڭعىستاۋ جانە ونتۇستىك قازاقستان وبلىستارىندا دەموگرافيالىق ءوسىم وتە جوعارى. اۋا رايى جۇمساق وڭتۇستىك وڭىرگە سىرت جاقتان قونىس اۋداراتىندار سانى دا جەتكىلىكتى. بۇل ۇدەرىس كۇردەلى ماسەلەنى كولدەنەڭ تارتادى. بۇگىندە وڭتۇستىك وبلىستاردا جۇمىسسىزدىق ماسەلەسى بەلەڭ العان. الەۋمەتتىك نىساندار, باسپانا, مەكتەپ, بالاباقشا جەتپەيدى. اتالمىش وڭىردەگى جوعارى وقۋ ورنىن بىتىرگەن مامانداردىڭ دەنى جۇمىسسىز جۇرگەنى جاسىرىن ەمەس. جۇمىس ورنى بولماعان سوڭ, مەملەكەتتىك گرانتتار دا از بولىنە باستادى. ال بۇعان كەرىسىنشە, ەلىمىزدىڭ 8 وبلىسىندا كادر تاپشىلىعى وزەكتى ماسەلەگە اينالدى. وعان سول وڭىرلەردەگى بالا تۋ دەڭگەيىنىڭ تومەندىگى جانە سىرتقا كوشەتىندەر لەگىنىڭ توقتاماۋى سەبەپ بولىپ وتىر. «ماڭگىلىك ەل جاستارى – يندۋسترياعا!» اتتى الەۋمەتتىك جوبا وسى ۇلكەن ءىستىڭ شەشىمىن تابۋعا دەگەن تالپىنىستان تۋدى. مەملەكەتتىك باعدارلاما اياسىندا قاجەتتى ماماندارعا جاعداي جاسالىپ, ولاردىڭ تەگىن وقۋى ءۇشىن مەملەكەتتىك گرانتتار ءبولىندى. وسى الەۋمەتتىك جوباعا بيىل تاعى دا 24 جوعارى وقۋ ورنى مەن 30 كوللەدج قاتىسىپ وتىر. ەندى جاستارعا مەديتسينا سالاسى بويىنشا ماماندىق الۋعا مۇمكىندىك تۋدى.
ى.التىنسارين اتىنداعى ارقالىق مەملەكەتتىك پەداگوگيكالىق ينستيتۋتىنا «ماڭگىلىك ەل جاستارى – يندۋسترياعا», «سەرپىن-2050» الەۋمەتتىك جوبالارى بويىنشا بيىل 155 تالاپكەر قابىلداندى. بارلىعى دا جاتاقحانالارمەن, ارنايى مولشەردەگى شاكىرتاقىمەن قامتاماسىز ەتىلگەن. قازاقستاننىڭ ەرتەڭىندەي بۇگىنگى جاستار ساپالى ءبىلىم الىپ, تاڭداعان ماماندىقتارىنىڭ يەسى بولۋدى ارماندايدى. ولار ەلدەن, اتا-انا, باۋىردان جىراق كەتتىك دەپ مۇڭايىپ جۇرگەن جوق. دەمەك, قاناتىن ەندى عانا قاققان, جارقىن بولاشاققا جاڭا سەرپىنمەن ۇمتىلعان جاستارعا دۇرىس جول نۇسقاپ, بولاشاققا ءجون سىلتەۋ – ءوز تاراپىمىزدان ەلىمىزگە تيەر از دا بولسا ۇلەس دەپ ويلايمىن. ەكونوميكالىق داعدارىسقا قاراماستان, مەملەكەت ءبىزدىڭ بولاشاعىمىز ءۇشىن قاراجات بولگەنىنە مىڭ العىس. «سەرپىن» قوزعالىسىنىڭ مۇشەسى بولۋعا ارقايسىمىز ات سالىسۋىمىز قاجەت. بىزبەن قاتارلاس بولۋ اركىمنىڭ-اق ارمانىنا اينالماق. سان ەمەس ساپا ماڭىزدى بولعاندىقتان بارلىعىمىز ايانباي جۇمىس اتقارۋعا مىندەتتىمىز. وسى جوباعا قاتىسقان جاستاردىڭ بىلىمگە دەگەن قۇشتارلىعى وياندى.
بولاشاق بۇگىننەن باستالادى. ال ءبىز الدىڭعى ۇرپاق سەنىم ارتار جالىندى جاستارمىز. ەلىم, جەرىم دەيتىن جىگەرلى جاستار لەگى كوبەيە بەرسىن!
جانسەرىك بايدەنوۆ,
ى.التىنسارين اتىنداعى ارقالىق مەملەكەتتىك پەداگوگيكالىق ينستيتۋتىنىڭ II كۋرس ستۋدەنتى
قوستاناي وبلىسى