قوعامعا ءتونىپ وتىرعان قاۋىپتىڭ ءبىرى – ماسكۇنەمدىك. قازىرگى تاڭدا ماس كۇيىندە كولىك ءرولىن تىزگىندەپ, سونىڭ سالدارىنان جان تۇرشىگەرلىك جول-كولىك وقيعاسىنا سەبەپكەر بولىپ جاتقان وقيعالار قاتارى تولاستار ەمەس.
جامبىل وبلىستىق ناركولوگيالىق ديسپانسەرىنىڭ ساراپتاما كابينەتىندە جىل باسىنان بەرى كولىكتى ماس كۇيىندە باسقارعان 1412 جۇرگىزۋشى مەديتسينالىق كۋالاندىرۋدان ءوتىپ, 287-ءسى ماس كۇيدە بولعانى انىقتالدى. ونىڭ 250-ءى كولىكتى الكوگولدى ىشىمدىك ءىشىپ الىپ باسقارعان, ال, 37-ءسى ەسىرتكى قولدانعان. وتكەن جىلى بارلىعى 2696 جۇرگىزۋشى مەديتسينالىق كۋالاندىرۋدان وتكىزىلىپ, ونىڭ ىشىندە 743 ازامات ماس كۇيىندە كولىك رولىنە وتىرعانى, ولاردىڭ 653-ءى الكوگولدى ىشىمدىك ىشكەنى, ال 90 جۇرگىزۋشى ەسىرتكى قولدانعانى انىقتالعان بولاتىن. سوندا ورتاشا ەسەپپەن ساناعاندا كۇن سايىن الكوگول ءىشىپ نەمەسە ەسىرتكىگە ەلتىپ, كولىك باسقاراتىن 2 جۇرگىزۋشى ۇستالادى ەكەن. بۇل ارينە, وتە قورقىنىشتى جاعداي. وسىدان كەيىن ەشكىم كوشەدە ءوزىن قاۋىپسىز سەزىنە المايدى. كەز كەلگەن ۋاقىتتا الدىڭىزدان ماس جۇرگىزۋشى شىعىپ, سوڭى قايعىلى جاعدايمەن اياقتالۋى مۇمكىن دەگەن ءسوز.
ونى ايتاسىز, ساراپتاما كابينەتىنە ءبىر كۇندە ماس كۇيىندە كولىك باسقارعان 5-6 جۇرگىزۋشى كەلىپ تۇسكەن ساتتەر دە كەزدەسكەن. وبلىسىمىزداعى ءتۇرلى ۇيىم قىزمەتكەرلەرى ناركولوگيالىق ديسپانسەردەن ناركوتەستىلەۋدەن وتەدى. وعان تالداۋ جاسار بولساق 2015 جىلى بارلىعى 5144 ناركوتەستىلەۋ وتكىزىلگەن, ونىڭ ىشىندە ىشىمدىك, ەسىرتكى تۇتىنعانىن راستاعان تالداۋلار سانى – 84 بولدى. ال 2016 جىلدىڭ 7 ايىندا 4486 ناركوتەستىلەۋ وتكىزىلىپ, ونىڭ ىشىندە 6 ازاماتتا ەسىرتكى قولدانعانى انىقتالىپ وتىر.
بۇدان بولەك ناركولوگيالىق ديسپانسەر مامانداندىرىلعان حالىققا قىزمەت كورسەتۋ ورتالىعىندا جۇرگىزۋشى كۋالىگىن الۋ ءۇشىن ناركوتەستىلەۋ وتكىزەدى. مۇندا دا, سونداي-اق ەسىرتكىلىك زاتتاردى تۇتىنۋ دەرەگى انىقتالۋدا. 2015 جىلى بارلىعى 18991 ناركوتەستىلەۋ وتكىزىلىپ, ونىڭ ىشىندە 128 ناركوتەست تاپسىرعان ازاماتتىڭ ەسىرتكى تۇتىنعانى راستالعان بولاتىن. بيىلعى جىلدىڭ 7 ايىندا 10837 ناركوتەستىلەۋ وتكىزىلىپ, ونىڭ ىشىندە 25 ازامات ەسىرتكى قولدانعانى انىقتالىپ وتىر. مىنە, وسىدان كەيىن ەسىرتكى تۇتىنۋ, ىشىمدىك ءىشىپ كولىك رولىنە وتىرۋ ۇيرەنشىكتى جايعا اينالىپ بارا ما دەگەن قورقىنىشتى وي كەلەدى. الدە ولار ءۇشىن كولىك جۇرگىزۋ قۇقىعىنان ايىرىلۋ, 30 تاۋلىككە قامالۋ, جۇمىستان بوساتىلۋ نەمەسە ايىپپۇل تولەۋ تۇككە تۇرمايتىن جازاعا اينالىپ كەتكەنى مە؟ قالاي ايتساق تا, مۇنداي كەلەڭسىز جايتتارمەن جالعىز ەمەس, كوپ بولىپ كۇرەسۋىمىز كەرەك.
جاقىپ جەكسەمبيەۆ,
جامبىل وبلىستىق ناركولوگيالىق ديسپانسەرىنىڭ باس دارىگەرى
جامبىل وبلىسى