بيىلعى جىلعى 30 قازاندا ەلىمىزدىڭ 30 سايلاۋ وكرۋگىندە وتەتىن ءماسليحاتتاردىڭ شىعىپ قالعان دەپۋتاتتارىنىڭ ورنىنا سايلاۋدا كانديداتتاردى ۇسىنۋ اياقتالدى.
ورتالىق سايلاۋ كوميسسياسىنان الىنعان اقپاراتقا قاراعاندا, سايلاۋ ناۋقانى بارىسىندا 101 كانديدات ۇسىنىلدى, ولاردىڭ 31-ءىن ساياسي پارتيالار, 70-ءسى ءوزىن-ءوزى ۇسىنىپ وتىر. ۇسىنىلعان كانديداتتاردىڭ 83-ءى ەر ادام, 18-ءى ايەل. ولاردىڭ ىشىندە 31 كانديدات قازاقستان رەسپۋبليكاسىنداعى ساياسي پارتيالاردىڭ مۇشەسى بولىپ تابىلادى, 50-ءى پارتيا قاتارىندا جوق, 20-سى پارتياعا تيەسىلىگىن كورسەتپەگەن.
كانديداتتاردىڭ ىشىندە 6 ۇلتتىڭ وكىلى بار, ورتاشا جاسى – 41 جاس. سونداي-اق, 84 كانديداتتىڭ جوعارى ءبىلىمى, 12-ءسىنىڭ ورتا كاسىپتىك ءبىلىمى جانە 5-ەۋىنىڭ ورتا ءبىلىمى بار. كانديداتتاردىڭ 43,6 پايىزى – مەملەكەتتىك مەكەمەلەردە, ۇيىمداردا جانە كاسىپورىنداردا, 41,6 پايىزى كوممەرتسيالىق قۇرىلىمداردا جۇمىس ىستەيدى, 12,8 پايىزى – ساياسي پارتيالار مەن ۇەۇ-نىڭ قىزمەتكەرلەرى, 2 پايىزى – جۇمىسپەن قامتۋدىڭ وزگە توپتارىنىڭ وكىلدەرى.
قازىرگى كەزدە ءماسليحاتتاردىڭ شىعىپ قالعان دەپۋتاتتارىنىڭ ورنىنا كانديداتتاردى تىركەۋ جالعاسۋدا. اقتوبە, شىعىس قازاقستان, قاراعاندى, قوستاناي, پاۆلودار, سولتۇستىك قازاقستان جانە وڭتۇستىك قازاقستان وبلىستارىندا تىركەۋ 4 قازاندا, ال الماتى, جامبىل جانە باتىس قازاقستان وبلىستارىندا 5 قازاندا اياقتالادى.
ءبىرىنشى قازان كۇنگى جاعداي بويىنشا وكرۋگتىك سايلاۋ كوميسسيالارى 87 كانديداتتى تىركەدى. تىركەۋ مەرزىمى اياقتالعان سوڭ, تىركەلگەن بارلىق كانديداتتار 28 قازان كۇنگى ساعات 24.00-گە دەيىن جۇرەتىن سايلاۋالدى ۇگىتكە كىرىسەدى. ال 15 قازاننان باستاپ سايلاۋ بولاتىن وكرۋگتەردىڭ سايلاۋشىلارى ۋچاسكەلىك سايلاۋ كوميسسيالارىنىڭ ءۇي-جايلارىندا سايلاۋشىلار تىزىمدەرىمەن تانىسىپ, ولارداعى ءوزى تۋرالى مالىمەتتەردى تەكسەرىپ جانە وندا جىبەرىلگەن دالسىزدەكتەردى انىقتاعان جاعدايدا, تۇزەتۋلەر ەنگىزە الادى. سايلاۋ ناۋقانى قاجەتتى قارجىلىق جانە ماتەريالدىق-تەحنيكالىق رەسۋرستارمەن قامتاماسىز ەتىلگەن جانە سايلاۋ زاڭناماسىنىڭ نورمالارىنا سايكەس وتۋدە. ورتالىق سايلاۋ كوميسسياسىنا شاعىمدار مەن وتىنىشتەر كەلىپ تۇسكەن جوق.
ءاليسۇلتان قۇلانباي,
«ەگەمەن قازاقستان»