بايگەنىڭ العاشقى «تۇلپارى» تانىلدى

جۇزدەن استام كينوتۋىندى ۇسىنىپ, بالالار فيلمىنە بولەك بايقاۋ ۇيىمداستىرىپ, الەۋمەتتىك تاقىرىپتاعى جوبالاردى كەڭىنەن كورسەتىپ, مول جاڭالىعىمەن كەلگەن ءحىى حالىقارالىق «ەۋرازيا» كينوفەستيۆالى مارەسىنە جەتتى. بۇل ناعىز كينو بايگەسى بولدى. سەبەبى, قالىڭ دودادا قۇيىسقان ءتۇيىستىرىپ قاتار شاپقان جۇزدەگەن جۇيرىكتىڭ ىشىنەن سۋىرىلىپ ءبىرىنشى كەلگەن ساڭلاققا العاش رەت ۇلتتىق «تۇلپار» سىيلىعى تاعايىندالدى. بارلىق بايقاۋلار سەكىلدى, بۇل بايگە دە كۇتپەگەن, توسىن جايتتارعا تولى بولدى. كينوفەستيۆالعا ۇزبەي قاتىسىپ كەلە جاتقان تۇراقتى كورەرمەندەردىڭ «سالىستىرمالى تۇردە العاندا, وسى جولى ادىلدىك بولدى» دەپ باعالاعانىن ءبىز ءوز تاراپىمىزدان قازىلار القاسى ۇلتتىق مازمۇنداعى فيلمدەر­دەن جاڭاشا ورنەك ىزدەۋگە ۇمتىلعانى, الەم­دىك كينەماتوگرافياعا نەگىزدەلگەن وزەكتى تاقى­رىپ­تاردىڭ قىزىقتىسىنا تەرەڭىرەك ۇڭىلگەنى دەپ تۇسىندىك. الامانعا قوسىلعان كۇننەن باستاپ «اناعا اپارار جول» ءفيلمى بايگەنى شاپپاي الادى دەپ,  باس جۇلدە يەسىن بەلگىلەپ, قويعانداردىڭ جورامالى دا قيسىنسىز بولىپ شىقتى, الۋان ءتۇرلى بولىپ كەلەتىن ەكراندىق ونەردى تارازىلاۋداعى بيىلعى  قازىلاردىڭ تاڭداۋ تالابى كەي تۇستا تاڭعالدىرىپ تا جات­تى. كينوفەستيۆالدە مازمۇنى, سيپاتى جاعى­نان قاراپايىم, وتە ءساندى, پالساپالىق فيلم­دەر­دەن باستاپ, قاتپارلى,  كۇردەلى جانرداعى, ەكسپەريمەنتالدى فيلمدەرگە دەيىن ۇسىنىلدى. سونىمەن, قازىلار القاسىنىڭ شەشىمىمەن بايقاۋدىڭ باس جۇلدەسىن رۋسۋدان گلۋردجيدزەنىڭ «بوتەن ءۇي» ءفيلمى يەلەندى (گرۋزيا – رەسەي – حورۆاتيا – يسپانيا). «قاراتاس اۋىلىنداعى وبا» ءفيلمىن تۇسىرگەن قازاقستاندىق ءادىل­حان ەرجانوۆ «ۇزدىك رەجيسسەر» بولىپ تا­نىل­­دى. «اپتاسىنا ءبىر رەت» فيلمىندە وي­ن­ا­عان يۋري پومەرانتسەۆ «ۇزدىك اكتەر» اتاندى. اكتريسالاردىڭ اراسىنداعى ۇزدىگى بولىپ «موككو» (فرانتسيا – شۆەيتساريا) فيلمىندەگى ەممانۋەل دەۆو مويىندالدى. ال قىسقامەتراجدى فيلمدەردىڭ ىشىنەن دارحان تولەگەنوۆتىڭ كارتيناسى گران-پري جۇل­دەسىن يەلەندى. بالالارعا ارنالعان فيلمدەر اراسىندا گەرمانيالىق رەجيسسەر ارەندا اگەنتتىڭ «راففي – مەنىڭ دوسىم» ءفيلمى باس جۇلدەگە لايىق دەپ تانىلدى. «Esquire تاڭداۋى» اتتى ارنايى جۇلدە «ۆ لۋچاح سولنتسا» ءفيلمىنىڭ رەجيسسەرى  ۆيتالي مانسكيگە (رەسەي – لاتۆيا – گەرمانيا – چەح رەسپۋبليكاسى – سولتۇستىك كورەيا) تابىستالدى. قازاقستاندىق پروديۋسەر ەرلان بەكحوجيننىڭ «نازارباەۆپەن باستى ماسەلەلەر تۋرالى» دەرەكتى ءفيلمى «تاريح جانە تۇلعا» اتتى ارنايى جۇلدەنى يەلەندى. ال ۇلتتىق «تۇلپار» سىيلىعىن «فيلم­گە جازىلعان ەڭ ۇزدىك مۋزىكا» ءۇشىن «قۇنان­باي» ءفيلمىنىڭ كومپوزيتورى تولەگەن مۇحامەت­جانوۆ, «ەڭ ۇزدىك ستسەناري» ءۇشىن  مارقۇم تالاسبەك اسەمقۇلوۆ, «ەڭ ۇزدىك ەر ادام ءرولى» ءۇشىن دوسحان جولجاقسىنوۆ جانە «ەڭ ۇزدىك قويۋشى-سۋرەتشى» بولعان رۋستام وديناەۆ يەلەندى. سونداي-اق, جوعارى دارەجەلى بۇل سىيلىق «اناعا اپارار جول» فيلمىندە ويناعان التىناي نوگەربەككە «ەڭ ۇزدىك ايەل بەينەسىن» جاساعانى ءۇشىن تابىستالدى. ۇلتتىق سىيلىق «ۇزدىك وپەراتورلىق جۇمىس» ءۇشىن قىرعىز كينو­سىنىڭ وكىلى حاسان قىدىراليەۆكە دە بۇيىر­دى. وسى ىرىكتەۋدە «ورتالىق ازياداعى ەڭ ۇز­دىك فيلم» اتالىمى بويىنشا قىرعىز رەس­پۋب­­ليكاسىنىڭ «اكە وسيەتى» ءفيلمى توپ جاردى. شەڭبەرىنە «شاكەن جۇلدىزدارىن» جانە ۇلتتىق بايقاۋدى قوسا سىيدىرعان «ەۋرازيا» كينوفەستيۆالى كينو الەمىنە جاڭا ەسىمدەردى تانىستىرۋىمەن دە پايدالى. اسىرەسە, ورتالىق ازياداعى تىنىستى سەزىنۋ ءۇشىن وتە قولايلى. ءومىردى زاماناۋي كينەماتوگرافيا تىلىمەن تانىعىسى كەلەتىندەر وسى بايقاۋ ارقىلى بۇگىنگى باعدار مەن ولشەمدى مەجەلەيدى. جىل وتكەن سايىن كينوفەستيۆالدىڭ كوركەمدىك كەڭىس­تىگىنىڭ كەڭەيە تۇسكەنى, ەركىن ويلى رەجيس­سەرلەردىڭ شىمىر يدەياعا قۇرىلعان تۋىندى­لارىندا ازاماتتىق ءۇن باسىم جاتاتىنى بايقاۋ سالماعىن ارتتىرىپ كەلەدى. ايگۇل احانبايقىزى, «ەگەمەن قازاقستان» الماتى