قىركۇيەكتىڭ 20-سى كۇنى «IWF» حالىقارالىق اۋىر اتلەتيكا فەدەراتسياسى اتقارۋشى كوميتەتىنىڭ وتىرىسى ءوتتى. وتىرىس بارىسىندا بەيجىڭ مەن لوندون وليمپياداسىندا دوپينگ قولداندى دەگەن ايىپپەن سپورتتان شەتتەتىلگەن سپورتشىلاردىڭ تاعدىرلارى تالقىعا سالىندى, – دەپ حابارلايدى baq.kz پورتالى.
قازاقستان اۋىر اتلەتيكا فەدەراتسياسىنىڭ باس حاتشىسى ومار ءمۇستافيننىڭ ايتۋىنشا, قازاقستان قۇراماسى وسى جىلدىڭ اياعىنا دەيىن بارلىق ۇلكەن جارىستارعا قاتىسۋ مۇمكىندىكتەرىنەن ايىرىلمادى. الداعى ۋاقىتتا قازاق اۋىر اتلەتتەرىن ەكى ءىرى تۋرنير كۇتىپ تۇر. ءبىرى – مالايزيادا قازان ايىندا وتەتىن جاستار اراسىنداعى الەم چەمپيوناتى بولسا, ەكىنشىسى – جاستار اراسىنداعى توكيوداعى ازيا چەمپيوناتى.
قازان ايىنىڭ 18 كۇنى حالىقارالىق وليمپيادا كوميتەتىنىڭ تارتىپتىك كەڭەسى دوپينگ قولداندى دەگەن ايىپ تاعىلعان قازاقستاندىق سپورتشىلارعا – يليا يلينگە, مايا مانەزاعا, چينشانلو مەن پودوبەدوۆاعا ناقتى شەشىم شىعارادى.
سونىمەن قاتار ومار مۇستافين ەگەر اۋىر اتلەتشىلەرگە تاعىلعان ايىپتىڭ بارلىعى راستالعان جاعدايدا قانداي جازا قولدانىلاتىنى جونىندە دە ايتتى.
حالىقارالىق وليمپيادا كوميتەتىنىڭ تارتىپتىك كەڭەسىنىڭ قۇزىرەتىنە سايكەس سپورتشىلار جەتىستىكتەرىنەن ايىرىلادى نەمەسە سول قالپىندا قالادى. ەگەر كوميسسيا ايىپتى دەپ تاپسا, سپورتشىلار مەدالدارىنان ايىرىلادى. ودان بولەك كەڭەس قوسىمشا جازالاۋ ءىس-شارالارىن قاراستىرمايدى.