استانا اكىمدىگىندە «ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ ءىى پلەنۋمى ءوتتى. بۇعان دەيىنگى پلەنۋم وتىرىسىندا «ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ توراعاسىنىڭ مىندەتىن اتقارۋشى لاۋازىمىنا باقتىقوجا ىزمۇحامبەتوۆتىڭ كانديداتۋراسى ۇسىنىلىپ, ونى پرەزيديۋم مۇشەلەرى ءبىراۋىزدان ماقۇلداعان بولاتىن.
كەشەگى جيىننىڭ كۇن تارتىبىندە تورالقا مۇشەلەرى «ارداگەرلەر ۇيىمى» رقب توراعاسىنىڭ لاۋازىمىنا باقتىقوجا سالاحاتدين ۇلى ىزمۇحامبەتوۆتىڭ كانديداتۋراسىن ءبىراۋىزدان قولدادى.
ءسويتىپ, استانا قالالىق «قازاقستان رەسپۋبليكاسىنىڭ ارداگەرلەر ۇيىمى» رقب ورتالىق كەڭەسىنىڭ مۇشەسى جانە توراعاسى بولىپ پارلامەنت ءماجىلىسىنىڭ دەپۋتاتى ب.ىزمۇحامبەتوۆ سايلاندى. ەندى ول ءماجىلىس دەپۋتاتى بولا ءجۇرىپ, ارداگەرلەر كەڭەسى ءتوراعاسىنىڭ قىزمەتىن قوسا اتقارماق. ال جاۋاپتى حاتشى قىزمەتىنە ك.بەكماعانبەت سايلانسا, بۇعان دەيىن ول قىزمەتتى اتقارىپ كەلگەن ا.رجاۆسكي ءوز ەركىمەن جۇمىستان بوساتىلدى. جانە وسىعان دەيىن اتالعان كەڭەستىڭ توراعالىق قىزمەتىن ابىرويلى اتقارعان ءومىرزاق وزعانباەۆ «ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسى توراعاسىنىڭ ءبىرىنشى ورىنباسارى بولىپ تاعايىندالدى.
جيىن بارىسىندا ارداگەرلەردىڭ ماتەريالدىق جانە الەۋمەتتىك تۇرمىس جاعدايى, مەديتسينالىق, تاعى باسقا دا كومەك ءتۇرلەرىن جاقسارتۋ ماسەلەسى تۋرالى ۇسىنىس-پىكىرلەر قىزۋ تالقىعا ءتۇستى. ءتيىسىنشە, ونى شەشۋ جولدارى قاراستىرىلىپ, الداعى ۋاقىتتا ارداگەرلەرگە جەڭىلدىكتەر قاراستىرىلىپ جاتقانى تۋرالى دا ءسوز بولدى. ءوز كەزەگىندە ارداگەرلەر قاۋىمىنا قولداۋ كورسەتىپ, ۇيىمعا دەمەۋشىلىك جاساپ جۇرگەن كاسىپكەرلەرگە العىس ايتىلدى.
قورىتىندى ناتيجەسىندە كەڭەس مۇشەلەرى مەن جيىنعا قاتىسۋشىلار ۇيىم جۇمىسىن قاناعاتتانارلىق دەپ باعالادى. ايتا كەتەيىك, پلەنۋم جۇمىسىنا ورتالىق كەڭەستىڭ 81 مۇشەسىنەن بولەك, تەكسەرۋ كوميسسياسىنىڭ 7 مۇشەسى, ءتۇرلى مەملەكەتتىك ورگانداردىڭ وكىلدەرى مەن ارداگەرلەر قوزعالىسىنىڭ بەلسەندىلەرى قاتىستى.
راۋشان تاۋىرحانقىزى
استانا