«قازاقستان» رترك» اق 2016 جىلدىڭ ءساۋىر ايىندا قازاقستان حالقى اسسامبلەياسىمەن بىرلەسىپ, مۇقتاج جاندارعا كومەك كورسەتۋ ماقساتىندا كەڭ اۋقىمدى «شىن جۇرەكتەن» قايىرىمدىلىق تەلەمارافونىن وتكىزگەن ەدى. كەشە وسىنىڭ جالعاسى رەتىندە بىرلەسكەن قايىرىمدىلىق تەلەمارافونى قايتا تىكەلەي ەفيرگە شىقتى.
قايىرىمدىلىق تەلەمارافونىنا قوعام قايراتكەرلەرى, حالىق قالاۋلىلارى, اقىن-جازۋشىلار, سپورتشىلار, دارىگەرلەر, سىرقاتتى جەڭگەن جاندار, سونىمەن قاتار بيىلعى ريو وليمپياداسى مەن پاراليمپيادا جۇلدەگەرلەرى قاتىسىپ, اكتسياعا قولداۋ ءبىلدىردى. سونداي-اق, قوستاناي, وسكەمەن, ورال, تاراز قالالارىنداعى ۇلتتىق ارنانىڭ فيليالدارى تىكەلەي ەفيرگە قوسىلعانىنا دا كۋا بولدىق. تىكەلەي ەفير بارىسىندا تەلەفون جانە الەۋمەتتىك جەلىلەر ارقىلى كومەك سۇراپ 948 ادام حابارلاسقان. «قازاقستان حالقى اسسامبلەياسىنىڭ قورى» قوعامدىق قورىنا 126 ادامنان حات كەلىپ تۇسكەن. ارنايى اشىلعان ankfond@mail.ru ەلەكتروندى پوشتاسىنا 213 حات جولدانعان. سونىمەن قاتار, #شىنجۇرەكتەن حەشتەگىن بەلگىلەپ, 37 ادام كوپشىلىكتەن كومەك سۇراعان.
العاشقى تەلەمارافون وتكەن سوڭ دا كورەرمەندەر تاراپىنان حات جازىپ, تەلەفون ارقىلى حابارلاسقاندار وتە كوپ بولعان. ءساۋىر ايىنان بۇگىنگى كۇنگە دەيىن تاعى 1000-نان استام ءوتىنىش كەلىپ تۇسكەندىكتەن, جوبانى ۇيىمداستىرۋشىلار شاراپاتتى شارانى تۇراقتى تۇردە, توقسان سايىن وتكىزىپ تۇرۋ تۋرالى شەشىم قابىلداعان. جىلاعانعا جۇبانىش, سۇرىنگەنگە سۇيەنىش بولۋ ادامگەرشىلىگىڭنىڭ ايعاعى شىعار. دەرتكە شالدىققان جاندارعا دەمەۋ بولعان قايىرىمدىلىق تەلەمارافونى الداعى ۋاقىتتا دا جالعاسىن تابادى.
راۋان قايدار,
«ەگەمەن قازاقستان»