قىزىلجار وڭىرىندە باسپانالى بولۋ باقىتىنا يە بولۋشىلاردىڭ قاتارى جىل وتكەن سايىن ارتىپ كەلەدى. بۇرىندارى جىلىنا 100-120 مىڭ شارشى مەتر باسپانا پايدالانۋعا بەرىلسە, بيىلعى مەجە 185 مىڭ شارشى مەتردى قۇراپ, بىلتىرعىعا قاراعاندا 32 پايىزعا ارتتى. دەمەك, ءبىر مىڭعا جۋىق وتباسى قۋانىشقا بولەنەدى دەگەن ءسوز. بۇگىنگى كۇنى وبلىس ورتالىعىنان شەتكەرىلەۋ جەردە جاڭادان بوي كوتەرگەن «بەرەكە» شاعىن اۋدانى قالاشىقتان اۋمايدى. مۇندا زاماناۋي تالاپقا ساي تۇرعىزىلعان 15 كوپ قاباتتى ءۇي مەن 720 ورىندى نازارباەۆ زياتكەرلىك مەكتەبى جانە مامانداندىرىلعان حالىققا قىزمەت كورسەتۋ ورتالىعى ەرەكشە ءسان بەرەدى. ەندى قۇرىش قولدى قۇرىلىسشىلار جىل اياعىنا دەيىن 11 كوپ قاباتتى تۇرعىن ءۇيدى پايدالانۋعا بەرۋدى جوسپارلاپ وتىر. وبلىس اكىمى ە.سۇلتانوۆ ەكپىندى قۇرىلىس الاڭدارىندا بولىپ, ماسەلەنىڭ ءمان-جايىمەن تانىستى.
قۇرىلىس نىساندارىنىڭ باسىم بولىگى وسىندا ورنالاسقاندىقتان, قاداعالاۋ كۇشتى. 55, 75, 90 پاتەرلى ءۇش عيماراتتىڭ قۇرىلىسىن مەملەكەتتىك تاپسىرىس شەڭبەرىندە ءجۇرگىزىپ جاتقان «پمك-5», «وسنوۆانيە», «سترويكومپانيا» سەرىكتەستىكتەرىنىڭ قيمىلى شيراق. ىشكى ارلەۋ جۇمىستارىنىڭ قىزۋ قارقىنمەن جۇرگىزىلىپ جاتقانىنا قاراعاندا مەرزىمىندە تاپسىرىلارىنا ەش ءشۇبا كەلتىرۋگە بولمايدى. جۇمىس ەكى اۋىسىمدا ۇيىمداستىرىلىپ, 300-دەي ادام تارتىلعان. «پمك-5» جشس ديرەكتورىنىڭ ورىنباسارى التاي الىباەۆ ەسىك, تەرەزە جاقتاۋلارىن, گاز قوندىرعىلارى مەن تەلەفون جەلىلەرىن ورناتۋ ىسىمەن اينالىسىپ جاتقاندارىن جەتكىزدى.
بەس قاباتتى 80 پاتەرلى تۇرعىن ءۇي گرافيكتەن كەشەۋىلدەگەن. قىركۇيەكتە تاپسىرىلۋعا ءتيىستى عيماراتتىڭ قۇرىلىس جۇمىستارى ءالى كۇنگە دەيىن ءبىرىنشى قاباتتان جوعارى كوتەرىلمەگەن. بۇل كورىنىسكە كوڭىلى تولماعان ءوڭىر باسشىسى مەردىگەر كومپانياعا قۇرىلىستىڭ قارقىنىن كۇشەيتۋدى تاپسىردى.
يۋبيلەينىي شاعىن اۋدانىندا بوي كوتەرگەن بەس تۇرعىن ءۇيدىڭ ەكەۋى تەحنيكالىق قاداعالاۋدان ءوتىپ, قۋانىشتى كۇندى 198 وتباسى مۇشەلەرى تاعاتسىزدانا كۇتىپ وتىر. بۇدان بولەك ەكى عيمارات تۇرعىزىلۋدا. ال, 2008 جىلدان بەرى «ساقالدى قۇرىلىسقا» اينالىپ, پاتەر كەزەگىندە تۇرۋشىلاردىڭ زىقىسىن شىعارعان 126 پاتەرلى 9 قاباتتى باسپانا جۇتىنىپ شىعا كەلگەن.
«زووۆەتسناب» جشس دە قۇرىلىس اۋقىمىن كەڭەيتۋمەن جۇيەلى اينالىسىپ كەلەدى. وتاندىق جانە ەۋرازيالىق ەكونوميكالىق وداققا مۇشە ەلدەردە وندىرىلگەن ۆەتەرينارلىق ءدارى-دارمەكتەردى ساتۋمەن بىرنەشە دۇكەن, ۆەتەرينارلىق قوسىن اينالىسادى. كاسىپورىن باسشىلىعى جۇمىسشى-قىزمەتكەرلەرگە ارناپ سپورتتىق جاتتىعۋ زالىن ىسكە قوسقان.
جاڭا قونىسقا كوشكەن دارىندى بالالارعا مامانداندىرىلعان “لورد” مەكتەپ-ليتسەيىنىڭ عيماراتتارىندا 212 وقۋشى ءدارىس الادى.
سولتۇستىك قازاقستان وبلىسى
ومىر ەسقالي,
«ەگەمەن قازاقستان»
سۋرەتتى تۇسىرگەن
تالعات تانىباەۆ