وتكەن جىلعى جىلۋ بەرۋ ماۋسىمىندا ەلىمىزدىڭ جالپى تۇرعىن ءۇي سەكتورلارىندا 7616 ءورت تىركەلگەن بولسا, ونىڭ 73 پايىزى ءورت قاۋىپسىزدىگى قاعيدالارىن بۇزۋ سالدارىنان ورىن العان. قىستىڭ قىر استىنا تاياي تۇسۋىنە وراي, الداعى جىلۋ بەرۋ ماۋسىمىنىڭ قاۋىپسىزدىگىنە قاتىستى جيىن وتكىزگەن ءىىم توتەنشە جاعدايلار كوميتەتى توراعاسىنىڭ ءبىرىنشى ورىنباسارى ءسابيت بيتاەۆ وسىنداي دەرەكتەردى جاريالادى.
ونىڭ ايتۋىنشا, ءورت شىعۋ وقيعاسىنان جالپى سوماسى 1, 29 ملرد تەڭگە ماتەريالدىق شىعىن كەلگەن. سونىڭ سالدارىنان 370 ادام ءارتۇرلى دارەجەدە دەنە جاراقاتىن العان. ال ماماندار پىكىرىنشە, ءورت شىعۋىنىڭ نەگىزگى سەبەپتەرى وتتى ابايسىز پايدالانۋدان تۋىندايتىن كورىنەدى. سونىمەن قاتار, پەشتەردى ورناتۋ مەن پايدالانۋ كەزىندە ءورت قاۋىپسىزدىگى قاعيدالارىن ساقتاماۋ, ەلەكتر جابدىقتارىن مونتاجداۋ جانە تەحنيكالىق پايدالانۋ قاعيدالارىن بۇزۋ دا كەلەڭسىز وقيعالاردىڭ سانىن كوبەيتە تۇسەدى.
ءتىلسىز جاۋدىڭ الدىن الۋ ماقساتىندا بيىلعى جىلدا ۆەدومستۆو جەتەكشىلەرى بىرقاتار جاڭاشىل باستامالاردى قولعا العان. سونىڭ ءبىرى – اعىمداعى جىلدىڭ 15 قىركۇيەگىنەن رەسپۋبليكا بويىنشا ءورت قاۋىپسىزدىگى ايلىعىنىڭ وتكىزىلىپ جاتقانى بولدى. ايلىق شارا اياسىندا جەرگىلىكتى جەرلەردەگى حالىققا ءۇيدى پەش پەن ەلەكتر جىلىتۋ قۇرالدارى ارقىلى جىلىتۋ مەن پايدالانۋ كەزىندە قاۋىپسىزدىك قاعيدالارىن ساقتاۋعا جانە ءورت ورىن العان جاعدايدا ورىندالۋى ءتيىس امالداردى ۇيرەتۋگە باعىتتالعان. وسى ماقساتپەن ماماندار اۋلالاردى ارالاپ, جەرگىلىكتى اتقارۋشى ورگاندار ارقىلى تۇرعىندارمەن ءجيى-ءجيى جيىندار وتكىزۋدە. سونداي-اق, الەۋمەتتىك قاۋىپ-قاتەر توپتارىنداعى ادامدارمەن دە جۇمىس ءجۇرگىزىلۋدە. ولاردىڭ قۇرامىنا ءمۇگەدەكتەر, جالعىزباستى جانە قارت ادامدار ەنەدى.
ايتا كەتەيىك, بۇل شاراعا وقۋ ورىندارىندا وقىتۋشى قۇرامنىڭ قاتىسۋىمەن مەكتەپ وقۋشىلارىمەن اڭگىمەلەسۋلەر مەن ءدارىستەر, ينتەراكتيۆتىك ساباقتار ۇيىمداستىرىلىپ, ارنايى بەينەروليكتەر كورسەتىلۋدە.
«ەگەمەن-اقپارات»