ۋەفا ەۋروپا ليگاسى اياسىندا «استانا» فۋتبول كومانداسى ءوز الاڭىندا شۆەيتساريانىڭ «يانگ بويز» كومانداسىمەن ويناپ 0-0 ەسەبىمەن تەڭ ءتۇستى.
«استانا» ءا دەگەننەن-اق ويىن تىزگىنىن قولىنا الدى. الايدا, ستانيمير ستويلوۆتىڭ شاكىرتتەرى ءبىرىنشى تايمدا قارسىلاستىڭ قاقپاسىنا سان مارتە شابۋىل جاساعانمەن, گول سوعا المادى. بىردە دەسپوتوۆيچتىڭ شىرەنە تەپكەن دوبى قاقپا ماڭدايشاسىنان كەرى كەتسە, ال نەمانيا ماكسيموۆيچتىڭ باسپەن سوققان دوبى دىتتەگەن جەرىنە جەتپەدى. 16-مينۋتتا ابزال بەيسەبەكوۆتىڭ ەكى قورعاۋشىدان سىتىلىپ ءوتىپ, وڭ قاپتالدان اسىرعان ادەمى دوبىنا كابانانگا لايىقتى «جاۋاپ» بەرە المادى. 23-مينۋتتا شۆەيتساريالىق فۋتبولشى راۆە ارىپتەسىمەن ادەمى پاس الماسىپ, ەريچپەن بەتپە-بەت كەلدى. الايدا, ونىڭ اسىرا سالعان دوبى قاقپادان اسىپ كەتتى. 32-مينۋتتا №7 ءنومىرلى سۋلەيماني شامامەن 30-مەتردەي جەردەن ەريچ قورعاعان قاقپانى ءدال كوزدەگەن, قاقپاشىمىز ەكى قولىن توسىپ, ازەر دەگەندە قايتاردى. 40-مينۋتتا شومكو سول قاپتالدان ادەمى سوققى جاساپ, جانكۇيەردى «اھ» ۇرعىزدى. دوپ توعىزدىقتىڭ ماڭىنان كەتتى.
ويىننىڭ 2-تايمىندا شابۋىلدار كوپ جاسالمادى. ويىننىڭ 66-مينۋتىندا بەيسەبەكوۆ وڭ قاپتالدان ماكسيموۆيچكە پاس اسىرعان, الايدا سەرب فۋتبولشىسى دوپتى ىڭعايىنا كەلتىرە المادى. ال قوناقتاردىڭ 31 ءنومىرلى ويىنشىسى يۋيا كۋبونىڭ 89-مينۋتتا جاساعان جويقىن سوققىسى 21 مىڭ جانكۇيەردى ءدۇر سىلكىنتتى. ابىروي بولعاندا, دوپ قاقپانىڭ ۇستىنەن ءوتىپ كەتتى. وسىلايشا, كوزدى اشىپ-جۇمعانشا 90-مينۋت تا وتە شىقتى. قورىتىندى ەسەپ – 0:0. ءبىر قىزىعى, «استانا» ەۋرودودا سايىسىندا ءوز الاڭىندا قاتارىنان ون كەزدەسۋدە جەڭىلمەي كەلەدى. سوڭعى رەت ەلوردالىق ۇجىم «استانا-ارەنادا» 2014 جىلى يسپانيالىق «ۆيلياررەالدان» 0:3 ەسەبىمەن جەڭىلگەن ەدى.
بۇگىنگى ويىننىڭ ستاتيستيكاسى:
استانا - يانگ بويز - 0-0
سوققىلار 10 – 8
ءدال باعىتتالعانى 3 – 2
بۇرىشتاما 3 – 6
الماس ماناپوۆ, ەگەمەن قازاقستان