بۇگىن چەمپيوندار ليگاسى توپتىق كەزەڭىنىڭ ەكىنشى اينالىمى مارەسىنە جەتتى.
ا توبىنداعى اعىلشىننىڭ «ارسەنالى» ءوز الاڭىندا شۆەيتساريانىڭ «بازەل» كومانداسىن قابىلداپ, ويىننىڭ تاعدىرىن ءبىرىنشى تايمدا-اق شەشىپ قويدى. العاشقى 26 مينۋتتىڭ ىشىندە تەو ۋولكوتت دۋبل جاساپ, سول ناتيجە ماتچتىڭ سوڭىنا دەيىن ساقتالدى.
وسى توپتاعى ەكىنشى كەزدەسۋ بولگاريانىڭ رازگراد قالاسىندا ءوتتى. وندا جەرگىلىكتى «لۋدوگورەتس» فرانتسۋزداردىڭ «پسج» كومانداسىن قابىلداپ, 1:3 ەسەبىمەن جەڭىلدى. ماتچتىڭ باسىندا ەسەپ اشقان بولگارلار بۇل باسىمدىقتى تايم سوڭىنا دەيىن ساقتاپ قالا المادى. ال ەكىنشى تايمدا «لۋدوگورەتس» قورعاۋشىسى كوسمين موتسي ەسەپتى تەڭەستىرەتىن مۇمكىندىكتى جىبەرىپ الدى. 11 مەترلىك ايىپ دوبىن ورىنداعان ول «پسج» قاقپاشىسى الفونس ارەولادان ايلاسىن اسىرا المادى.
B توبىنداعى يتاليانىڭ «ناپولي» كومانداسى ءوز الاڭىندا پورتۋگاليالىق «بەنفيكانى» جەڭدى. ءبىرىنشى تايمدا بۇرىشتامادان بەرىلگەن دوپتى قاقپاعا باسپەن ءدال باعىتتاعان مارەك گامشيك ەسەپ اشتى. ال ماتچتىڭ ەكىنشى بولىگىندە الاڭ يەلەرى قارسىلاستار قاقپاسىنا نەبارى جەتى مينۋت ىشىندە قاتارىنان ءۇش گول سوعىپ ۇلگەردى. اركاديۋش ميليك پەنالتيدى ءساتتى ورىنداسا, دريس مەرتەنس دۋبل جاسادى. ويىن سوڭىنا قاراي «بەنفيكا» ساپىنان گونسالۋ گۋەدەش پەن ەدۋاردو سالۆيو ءبىر-ءبىر گولدان سوعىپ, ەسەپ ايىرماسىن قىسقارتتى.
تۇركيانىڭ «بەشيكتاش» كومانداسى كيەۆتىڭ «ديناموسىن» قابىلداپ, 1:1 ەسەبىمەن تەڭ وينادى. «بەشيكتاشتىڭ» جارتىلاي قورعاۋشىسى ريكاردۋ كۋارەجما ماتچتىڭ 28-مينۋتىندا ايىپ سوققىسىنان گول سوقتى. ال ويىننىڭ 65-مينۋتىندا «دينامو» ساپىنداعى ۆيكتور تسىگانكوۆ ەسەپتى تەڭەستىردى.
س توبىندا نەمىستىڭ «بورۋسسيا ميونحەنگلادباح» كومانداسى ءوز الاڭىندا يسپانيانىڭ «بارسەلوناسىن» قابىلدادى. 34-مينۋتتا نەمىستەر جىلدام شابۋىل ۇيىمداستىرىپ, تورگان ازار ەسەپ اشتى. ال ەكىنشى تايمدا «بارسەلونا» ويىنشىلارى الاڭ يەلەرىنىڭ ورەسكەل قاتەلىكتەرىن ءتيىمدى پايدالانا ءبىلدى. اردا تۋران ەسەپتى تەڭەستىرسە, جەڭىستى گولدى قورعاۋشى حەرارد پيكە سوقتى.
ءوز الاڭىندا اعىلشىننىڭ «مانچەستەر سيتي» كومانداسىن قابىلداعان شوتلانديانىڭ «سەلتيگى» كەرەمەت ويىن ورنەگىن كورسەتىپ, جانكۇيەرلەرىن قۋانىشقا بولەدى. ەكى كوماندا دا ناتيجەلى ويىن كورسەتىپ, ءبىرىنشى تايمدى 2:2 ەسەبىمەن اياقتادى. ويىن باستالا سالىمىمەن اعىلشىندار ورەسكەل قاتەلىككە بوي الدىرىپ, مۋسسا دەمبەلە 3-مينۋتتا ەسەپ اشتى. كوپ ۇزاماي «مانچەستەر ءسيتيدىڭ» جارتىلاي قورعاۋشىسى فەرناندينو ەسەپتى تەڭەستىردى. ال ويىننىڭ 20-مينۋتىندا «سەلتيك» قايتادان تىزگىندى ءوز قولىنا الدى. ولارعا راحيم ستەرلينگتىڭ اۆتوگولى كومەكتەستى. بىراق, وسىدان 8 مينۋتتان كەيىن اعىلشىن شابۋىلشىسى ءوز قاتەلىگىن تۇزەپ, ەسەپتى قايتا تەڭەستىردى. ەكىنشى تايمدا مۋسسا دەمبەلە تاعى ءبىر گول سوعىپ دۋبل جاسادى. كەزدەسۋدە سوڭعى گولدى 55-مينۋتتا نوليتو سوقتى, ءسويتىپ ماتچ 3:3 ەسەبىمەن تەڭ اياقتالدى.
D توبىندا ءمادريدتىڭ «اتلەتيكوسى» ميۋنحەننىڭ «باۆاريا» كومانداسىن قابىلدادى. بۇل كەزدەسۋ چەمپيوندار ليگاسىنىڭ وتكەن ماۋسىمداعى جارتىلاي فينالدىق ويىنىن ەسكە ءتۇسىردى. ول كەزدە يسپانيالىقتار ەكى ماتچ قورىتىندىسى بويىنشا نەمىستەردى جارىس جولىنان شىعارىپ تاستاعان بولاتىن. «باۆاريا» دوپقا يەلىك ەتۋدە باسىمدىق تانىتقانىمەن, «اتلەتيكو» قاقپاعا كوبىرەك سوققى باعىتتاي ءبىلدى. وسىلايشا, ويىننىڭ 35-مينۋتىندا ياننيك فەررەيرا-كارراسكو تۋرا سوققىسىمەن ەسەپ اشتى. قالعان ۋاقىتتا «اتلەتيكو» ويىنشىلارى ساۋاتتى قورعانىپ, قارسىلاستارىنا ەشبىر مۇمكىندىك بەرمەدى. ءتىپتى, 84-مينۋتتا ولار ەسەپ ايىرماسىن كوبەيتۋگە مۇمكىندىك الدى. الايدا, انتۋان گريزمانن پەنالتيدەن ءمۇلت كەتتى.
وسى توپتاعى رەسەيدىڭ «روستوۆى» گوللانديانىڭ «پسۆ» كومانداسىن قابىلداپ, 2:2 ەسەبىمەن تەڭ ءتۇستى. ءتورت گولدىڭ بارلىعى ءبىرىنشى تايمدا سوعىلدى. «روستوۆ» ساپىندا دميتري پولوز دۋبل جاساسا, قارسىلاستار كومانداسىنان دەۆي پروپپەر مەن ليۋك دە يونگ گول سوقتى.
سونىمەن قاتار, E, F, G, H توپتارىندا وتكەن ەكىنشى اينالىم ويىندارىنىڭ ناتيجەلەرىن نازارلارىڭىزعا ۇسىنامىز:
«موناكو» — «بايەر» — 1:1 (گليك, 90+4 — چيچاريتو, 74); تسسكا — «توتتەنحەم» — 0:1 (سون, 71); «بورۋسسيا» (د) — «رەال» (م) — 2:2 (وبامەيانگ, 43, شيۋررلە, 87 – رونالدۋ, 17, ۆاران, 68); «سپورتينگ» — «لەگيا» — 2:0 (رۋيس, 28, دوست, 37); «لەستەر» – «پورتۋ» — 1:0 (سليماني, 25); «كوپەنگاگەن» — «بريۋگگە» — 4:0 (دەنسۆيل, 53 (اگ), ديلەيني, 64, سانتاندەر, 64, يورگەنسەن, 90+2); «دينامو» (زاگرەب) – «يۋۆەنتۋس» — 0:4 (پيانيچ, 24, يگۋاين, 31, ديبالا, 57, سەمپەر, 85 (اگ)); «سەۆيليا» — «ليون» — 1:0 (بەن يەددەر, 53).
ايدار ورىسباەۆ