بۇگىندە «باتىس» وڭىرلىك قولباسشىلىعى ساپىندا كوپتەگەن ۇلت وكىلدەرى وزدەرىنىڭ وتان الدىنداعى قىزمەتتەرىن ابىرويمەن اتقارىپ كەلەدى. ءبىز وڭىرلىك قولباسشىلىققا قاراستى بولىمشەلەردە بولىپ, اسكەريلەردىڭ بۇگىنگى تىنىس-تىرشىلىگىمەن تانىسقان ەدىك. اسكەريلەر ءداستۇر مەن ادەتكە ساي, ەلدىڭ تىنىشتىعى مەن قاۋىپسىزدىگىن ساقتاۋ جونىندەگى ءوز وي-پىكىرلەرىن ەمىن-ەركىن ورتاعا سالدى.
سولاردىڭ ءبىرى – «باتىس» وڭىرلىك قولباسشىلىعى بايلانىس قىزمەتىنىڭ باستىعى, ۋكراين ۇلتىنىڭ وكىلى گەننادي شكرەبكو. ول سولتۇستىك قازاقستان وڭىرىندە دۇنيەگە كەلگەن. – قازاقستان رەسپۋبليكاسىنىڭ ازاماتى بولۋ ءبىزدىڭ ماقتانىش سەزىمىمىزدى تۋعىزادى. ءارى بىزگە ۇلكەن مىندەتتەر جۇكتەيدى. بىرىنشىدەن, ازاماتتىلىق وتانىمىزدى شەكسىز سۇيە بىلۋگە, مەملەكەتتىك رامىزدەردى قۇرمەتتەۋگە داعدىلاندىرادى. ءارى بارشا قازاقستاندىقتارعا دەگەن سىيلاستىق سەزىمىن قالىپتاستىرۋعا العىشارت قالايدى. ەلىمىزدىڭ كونستيتۋتسياسىن قاستەرلەپ, زاڭدارىن قالتقىسىز ساقتاۋ جانە مەملەكەتىمىزدى قورعاۋعا ءبىر كىسىدەي ءازىر بولۋ – باستى پارىزىمىز, – دەدى ول گازەت تىلشىسىنە. پەتروپاۆل اسكەري ينستيتۋتىنىڭ تۇلەگى گ.شكرەبكونىڭ مەملەكەتتىك ءتىلدى ۇيرەنۋ جونىندەگى تالاپ-تىلەگى مەن قىزىعۋشىلىعى اتالعان وقۋ ورنىنىڭ قابىرعاسىندا ويانىپتى. مايور شەنىندەگى گەننادي الەكساندروۆيچ بىزبەن اڭگىمەسىندە ءتىل ۇيرەنۋ ساباقتارىنىڭ تيگىزگەن پايداسى مەن كومەگىن بۇگىندە اسكەري قىزمەتتە كەڭىنەن پايدالانىپ جۇرگەنىن جەتكىزدى. ءبارىمىز دە مەملەكەتتىك ءتىلدى بىلۋگە مىندەتتىمىز دەپ سانايدى اسكەري قىزمەتكەر.
ال كورەي ۇلتىنىڭ وكىلى 5517 اسكەري ءبولىمى كومانديرىنىڭ ورىنباسارى ۆياچەسلاۆ پاك كوپەتنوستى ەلىمىزدەگى تاتۋ-ءتاتتى تىرشىلىك پەن دوستىق قارىم-قاتىناستاردى جوعارى باعالايدى. ءارى وسىنداي بەيبىتسۇيگىش ەلودە قىزمەت ەتىپ جۇرگەنىن ماقتان تۇتادى. – مەنىڭ وزىمە جۇكتەلگەن سەنىم جۇگى دە سالماقتى. اتقارىپ جۇرگەن قىزمەتىمنىڭ جاۋاپكەرشىلىگى دە جوعارى. مەن «باتىس» وڭىرلىك قولباسشىلىعى ساپىندا كومانديردىڭ تاربيەلىك جانە الەۋمەتتىك قۇقىقتار جونىندەگى ورىنباسارى بولىپ قىزمەت ەتەمىن. مۇنىڭ ءوزى ماعان قاشاندا مەرەيلى مىندەتتەر جۇكتەيدى. سونىڭ ەڭ باستىسى, جەكە قۇراممەن مەملەكەتتىك-قۇقىقتىق دايىندىقتار بويىنشا ءدارىس بەرۋ دەپ ەسەپتەيمىن. بۇل دارىستەر جۇيەلى تۇردە جۇرگىزىلىپ كەلەدى. وعان تىڭداۋشىلار قاشاندا بەلسەندى تۇردە قاتىسىپ ءجۇر. ەشقايسىسى دا, ەنجارلىق, سەلسوقتىق كورسەتپەيدى. قىزمەت بارىسىندا ساربازداردى مۇمكىندىگىنشە بولۋى ىقتيمال ءتۇرلى قۇقىق بۇزۋشىلاردان ساقتاندىرىپ, ءتارتىپتى بۇزباۋعا, جارعى تالاپتارىن بۇلجىتپاي ساقتاۋعا شاقىرىپ وتىرامىن. بۇل ءىس-ارەكەتىم – ەلىمىزدىڭ ۇلتتىق قاۋىپسىزدىگى مەن بەرىكتىگىن نىعايتۋعا قوسقان ۇلەسىم, – دەيدى اعىنان جارىلا ءتىل قاتقان مايور ۆ.پاك. ء«وزىم تۋىپ-وسكەن قازاق جەرىنىڭ بولاشاعى مەن يگىلىگى ءۇشىن ءبىلىمىم مەن بىلىكتىلىگىمدى جانە كۇش-قايراتىم مەن جىگەرىمدى, بۇعان دەيىنگى جيناقتاعان تاجىريبەمدى سارقا جۇمساۋعا دايىنمىن», دەپ وي قورىتتى ۆياچەسلاۆ پاك.
ءبىزدىڭ كەلەسى ءبىر كەزدەسىپ, وي-پىكىر الماسقان كەيىپكەرىمىز – تاجىك ۇلتىنىڭ وكىلى جوراباي سۋلايمونوۆ بولدى. ول «باتىس» وڭىرلىك قولباسشىلىعى جاۋىنگەرلىك قىزمەتى باسقارماسىنىڭ اعا ساردارى. وڭتۇستىك قازاقستان وبلىسىندا دۇنيەگە كەلگەن. جيىرما جىلدان استام ۋاقىتتان بەرى اسكەريلەر ساپىندا قىزمەت اتقارىپ جۇرگەن پودپولكوۆنيك جوراباي اسادۋللا ۇلى قازاق ءتىلىن دە, ورىس ءتىلىن دە جەتىك مەڭگەرگەنىن بىردەن كورسەتتى. ەكى تىلگە دە سۋداي. ول «تىلگە قۇرمەت – ەلگە قۇرمەت» دەپ سانايدى ەكەن. نەسى بار, وتە ورىندى, وتە ورنىقتى كوزقاراس. سوناۋ ساياسي قۋعىن-سۇرگىن كەزەڭىندە, ۇلى وتان سوعىسى جىلدارىندا قازاق حالقىنىڭ كورمەگەن قيىنشىلىعى جوق. سوعان قاراماستان, قازاق جەرىنە ەرىكسىز اۋدارىلىپ, ەرىكسىز توعىتىلعان وزگە ۇلت وكىلدەرىنە قۇشاقتارىن ايقارا اشتى. ولارعا قولىنداعى بارىن ءبولىپ بەردى. ءبىز مۇنى قازاق ەلىنىڭ تاريحىنان جاقسى بىلەمىز دەيدى كەيىپكەرىمىز. جيىرما جىلدان بەرى قانداي قىزمەتتىڭ تىزگىنىن ۇستاسا دا جوراباي سول ۇجىم مۇشەلەرىنىڭ وزىنە دەگەن ىستىق ىقىلاسىن سەزىنە العانىن ماقتانىشپەن ايتتى. جوراباي سۋلايمونوۆتىڭ وتباسىندا مۋحامماد جانە تيمۋر ەسىمدى ۇلدار ءوسىپ كەلەدى. مىنەكەي, اسكەريلەر قاتارىندا ورتاق وتانىمىز – قازاقستان رەسپۋبليكاسىنىڭ قاۋىپسىزدىگى ءۇشىن جان اياماي ەڭبەكتەنىپ جۇرگەن وسىنداي ازاماتتار جەتەرلىك. قانداي ۇلت پەن ۇلىستىڭ وكىلى بولسىن ولاردىڭ تىلەكتەرى مەن نيەتتەرى ورتاق.
جازىپ العان تەمىر قۇسايىن,
«ەگەمەن قازاقستان» ورال