قازاقستان رەسپۋبليكاسىنىڭ سىرتقى ىستەر مينيسترلىگى ەلىمىزدىڭ باس رەداكتورلار كلۋبىمەن بىرلەسىپ ۇستىمىزدەگى جىلدىڭ مامىر-شىلدە ايلارىندا «قازاقستان حالىقارالىق باق كوزىمەن» اتتى ءۇشىنشى كونكۋرس ۇيىمداستىرعان بولاتىن. بايقاۋعا ۇسىنىلعان 60 ۇسىنىمنىڭ ىشىنەن فرانتسيا, اقش, تۇركيا, يوردانيا جانە رەسەيدىڭ وكىلدەرى بولىپ تابىلاتىن بەس جۋرناليست جەڭىمپاز اتاندى.
مينيسترلىكتە ماراپاتتالعان «The Huffington Post», «The Washington Times», «The Jordan Times», «ەنيچاگ» گازەتتەرىنىڭ تىلشىلەرى كورىكتى بۋراباي ايماعىندا قوناقتا بولىپ, قازاقستاننىڭ ءىنجۋ-مارجاندارىنىڭ عاجايىپتارىمەن تانىستى. ولار ەل ماقتانىشىنا اينالعان بەس جۇلدىزدى «Rixos Borovoe» وتەلىنە ورنالاستىرىلدى.
ساپار بارىسىندا اقمولا وبلىستىق تۋريزم باسقارماسى «بۋراباي – قازاقستاننىڭ ءىنجۋ-مارجانى» اتالاتىن اقپاراتتىق-جارنامالىق تۋر ۇيىمداستىردى. سونداي-اق, شەتەلدىك جۋرناليستەر «بۋراباي-دامۋ» جاۋاپكەرشىلىگى شەكتەۋلى سەرىكتەستىگىنىڭ «ۆيزيت ورتالىعىن», بۋرابايداعى تابيعات مۋزەيىن, «ابىلاي حان مەموريالدىق-تانىمدىق الاڭىن» ارالاپ, مادەني-ساۋلەت كەشەنىنىڭ, «ابىلاي حان ورداسى» ەكسپوزيتسيالىق كورمە زالىنىڭ, «ايناكول» جانە «الەم» وتەلدەرىنىڭ قوناقجايلىق راسىمدەرىنە كۋا بولدى.
قوناقتار بۋراباي ايماعىن سالت ءجۇرىپ ساياحاتتاۋداعى, قىمىز بەن ىستىق باۋىرساقتان ءدام تاتقانداعى اسەرلەرىن ريزاشىلىقپەن ايتىپ جاتتى. ءاردايىم جۇمىس بارىسىنداعى جۋرناليستەر قايتالانباس تابيعات كورىنىستەرىن سۋرەتكە ءتۇسىرىپ, جەرگىلىكتى تۇرعىندارمەن ەمەن-جارقىن سۇحبات جۇرگىزدى. ولار قازاقستاننىڭ تۋريستىك الەۋەتىنە جوعارى باعاسىن بەردى.
ساپار سوڭىندا اقمولا وبلىستىق تۋريزم باسقارماسىنىڭ باسشىسى شىناربەك باتىرحانوۆ پەن دەلەگاتسيا جەتەكشىسى, قر سىرتقى ىستەر مينيسترلىگىنىڭ وكىلى ايمان تورەبەكوۆا قوناقتارعا «ەكسپو-2017» حالىقارالىق كورمەسىنە ارنايى دايىندالعان قازاقستاندىق برەند – اعاش ىدىس جيىنتىقتارىن سىي-سياپات رەتىندە ۇسىندى. بۇعان قوسا, بايقاۋدىڭ جەڭىمپاز جۋرناليستەرى الەمنىڭ 100 مەملەكەتىنەن رەسمي وكىلدەر قاتىساتىن كورمەگە شاقىرۋ بيلەتتەرىمەن ماراپاتتالدى.
باقبەرگەن امالبەك,
«ەگەمەن قازاقستان»
اقمولا وبلىسى