بۇرناعى كۇنى تۇندە ريو-دە-جانەيروداعى «ماراكانا» ستاديونىندا پاراليمپيالىق ويىنداردىڭ سالتاناتتى جابىلۋ ءراسىمى بولىپ ءوتتى. ويىندار قىركۇيەكتىڭ 7-سىنەن 18-ىنە دەيىنگى ارالىقتا ءوتتى.
جابىلۋ ءراسىمىنىڭ قويىلىمى برازيليا حالقىنىڭ ءان اۋەنى الەمىنە ارنالدى. جينالعاندار الدىندا وسى ەلدىڭ بەلگىلى ءانشىلەرى ونەر كورسەتتى. سولاردىڭ ءىشىندە تۋعاننان قولدارى جوق مۋزىكانت جوناتان باستوس تا بولدى. ول الەمگە ءوزىنىڭ بارلىق كومپوزيتسيالارىن اياعىنىڭ باشپايلارىمەن وينايتىنىمەن تانىلعان.
شارا باسىندا كورەرمەندەر مەن قاتىسۋشىلار سەنبى كۇنى جارىس بارىسىندا قاتتى قۇلاپ, اۋرۋحاناعا بارار جولدا جانتاسىلىم ەتكەن يراندىق 48 جاستاعى ۆەلوشاباندوز باحمان گولبارنەجاد ۇنسىزدىكپەن ەسكە الدى. وسى قايعىلى وقيعاعا بايلانىستى ويىندار ۇيىمداستىرۋ كوميتەتىنىڭ باسشىسى كارلوس نۋزمان مەن حالىقارالىق پاراليمپيالىق كوميتەتتىڭ پرەزيدەنتى فيليپ كرەيۆەن يران كومانداسى مەن مارقۇمنىڭ وتباسىنا كوڭىل ايتتى.
«ماقسات ورىندالدى... برازيليا ەشقاشان بەرىلمەيدى», دەپ مالىمدەدى ءوزىنىڭ سوزىندە نۋزمان ەلدە وليمپيادا مەن پاراليمپيادانى دايىنداۋدىڭ وتە قيىن جاعدايدا وتكەنىن مەڭزەي كەلىپ.
ءوز كەزەگىندە كرەيۆەن برازيليالىقتارعا جىلى قۇشاق جايعاندارى ءۇشىن العىس سەزىمىن ءبىلدىردى. ول سونداي-اق جارىستارعا قاتىسقان مۇمكىندىكتەرى شەكتەۋلى سپورتشىلاردىڭ ءبارىنىڭ كەرەمەت قاسيەتتەرى جونىندە ايتىپ ءوتتى. سودان كەيىن كوميتەتتىڭ ويىنداردى جاقسى ۇيىمداستىرىپ, جوعارى دەڭگەيدە وتكىزگەنى ءۇشىن ريونى ءوزىنىڭ ەڭ جوعارى ناگراداسى – وردەنمەن ماراپاتتايتىنىن جەتكىزدى. سوڭىندا كرەيۆەن ءان سالىپ, ويىنداردى جابىق دەپ جاريالادى. ال پاراليمپيالىق جالاۋ كەلەسى ويىنداردىڭ يەسى – توكيوعا سالتاناتتى جاعدايدا تابىس ەتىلدى.
پاراليمپيالىق ويىندار 107 التىن, 81 كۇمىس, 51 قولا, بارلىعى 239 مەدال العان قىتاي قۇراماسىنىڭ ايقىن جەڭىسىمەن اياقتالدى. ەكىنشى ورىن 64 التىن, 39 كۇمىس, 44 قولا, بارلىعى 147 مەدال جيناعان ۇلىبريتانيا قۇراماسىنا بۇيىردى. ءۇشىنشى ورىنعا 41 التىن, 37 كۇمىس, 39 قولا, جالپى 117 مەدالى بار ۋكراينا كومانداسى شىقتى. بۇدان ءارى العاشقى وندىقتى اقش, اۆستراليا, گەرمانيا, نيدەرلاند, برازيليا, يتاليا جانە پولشا كوماندالارى قۇرادى.
بۇرىنعى كەڭەستىك ەلدەر اراسىنان 8 التىن, 6 كۇمىس, 17 قولا, بارلىعى 31 مەدال جيناپ, 16-ورىننان كورىنگەن وزبەكستان قۇراماسىن ەرەكشە اتاپ وتۋگە بولادى. بۇل ەلدەن ويىندارعا بارعان 32 سپورتشىنىڭ 31-ءى وسىلايشا مەدالمەن ورالدى. بۇدان بولەك, بەلارۋس – 19-شى, ليتۆا – 44-ءشى, لاتۆيا – 45-ءشى, ازەربايجان 48-ءشى ورىندارعا ورنالاستى. ال ويىنداردا 1 التىن, 1 كۇمىس مەدال العان قازاقستان قۇراماسى سلوۆەنيا سپورتشىلارىمەن بىرگە 58-59-شى ورىنداردى ءبولىستى.
مۇرات ايتقوجا