وتكەن دەمالىس كۇندەرى فۋتبولدان قازاقستان پرەمەر-ليگاسىنىڭ 27-تۋرى ويىندارى وينالدى. كوش باسىنداعى «استانا» سىرت الاڭدا «اقتوبەدەن» 2:1 ەسەبىمەن باسىم تۇسسە, ونىڭ باستى قارسىلاسى «قايرات» الماتىدا ءدال وسىنداي ەسەپپەن پاۆلوداردىڭ «ەرتىسىن» جەڭدى.
جالپى, سوڭعى جىلدارى ەل چەمپيوناتىندا «استانا» مەن «قايراتتىڭ» مەرەيى ۇستەم بولىپ تۇر. ءبىر كەزدەرى ايدارىنان جەل ەسكەن «اقتوبە» كومانداسىندا بۇگىندە بۇرىنعىداي مىنەز جوق. «ەرتىس» پەن «توبىلدىڭ» دا كورسەتىپ جۇرگەن قايراتى شامالى. سول سەبەپتى, وتاندىق جانكۇيەرلەر كوبىنە «استانا» مەن «قايراتتىڭ» ويىندارىنا ەرەكشە ءمان بەرىپ, قىزىعۋشىلىق تانىتىپ كەلەدى.
سونىمەن, بولگار مامانى ستانيمير ستويلوۆتىڭ شاكىرتتەرى كەزەكتى رەت چەمپيوندىق اتاقتارىن قورعاپ قالۋعا جاقىنداي ءتۇستى. «اقتوبەمەن» بولعان ويىندا تىزگىندى ءبىردەن قولدارىنا العان چەمپيوندار 11-مينۋتتا كونگولىق لەگيونەر جۋنيور كابانانگانىڭ كومەگىمەن ەسەپ اشتى. ال ەكىنشى تايمدا الاڭ يەلەرى جيناقىلىق تانىتىپ, جۇيەلى ويناي باستادى. ناتيجەسىندە 66-مينۋتتا ەگور سوروكين تارازى باسىن تەڭەستىرىپ كەتتى. ءار ويىنعا شەشۋشى ماتچ رەتىندە قارايتىن «استانا» ءۇشىن بۇل ەسەپتىڭ كوڭىل كونشىتپەيتىنى بەلگىلى. سوندىقتان, ەلوردالىقتار قارقىندارىن كۇشەيتىپ, تايلى-تۇياعىمەن شابۋىلعا شىقتى. بۇل ويىن تاكتيكاسى 87-مينۋتتا ءوز جەمىسىن بەرىپ, قورعاۋشى مارين انيچيچ جەڭىس گولىن سوقتى. وسى جەڭىستەن كەيىن «استانا» 62 ۇپايمەن تۋرنير كەستەسىندەگى كوشباسشىلىق ورنىن ساقتاپ قالدى.
بۇل تۋردا جەڭىسكە جەتكەن «قايرات» كومانداسى دا ازىرگە چەمپيوندىقتان ءۇمىتىن ۇزگەن جوق. ءوز الاڭىندا «ەرتىستى» قابىلداعان الماتىلىقتار 23-مينۋتتا العا شىقتى. گولدىڭ اۆتورى – چەمپيوناتتىڭ ۇزدىك مەرگەنى جەرار گوۋ. كەزدەسۋدىڭ 78-مينۋتىندا «ەرتىس» ساپىنان شوتا گريگالاشۆيلي ناتيجەلى سوققى جاساپ, ەسەپتى تەڭەستىردى. الايدا, ارادا بار بولعانى 3 مينۋت وتكەندە, «قايراتتىڭ» كاپيتانى باۋىرجان يسلامحان مەرگەندىگىمەن كوزگە ءتۇسىپ, كومانداسىنا جەڭىس سىيلادى. وسىلايشا, كاحابەر تسحادادزەنىڭ شاكىرتتەرى قورجىندارىنداعى ۇپاي سانىن 58-گە جەتكىزدى.
ءبىرىنشى التىلىقتىڭ تاعى ءبىر كەزدەسۋ شىمكەنتتىڭ «ورداباسى» مەن كوكشەتاۋدىڭ «وقجەتپەسى» اراسىندا ءوتتى. بۇل ويىندا شىمكەنتتىكتەر 1:0 ەسەبىمەن جەڭىسكە جەتىپ, 43 ۇپايمەن ءۇشىنشى ورىنعا جايعاستى.
پرەمەر-ليگادا قالۋ ءۇشىن تەر توگىپ جۇرگەن ەكىنشى التىلىقتىڭ ويىندارى دا تارتىسپەن وتۋدە. اسىرەسە, ورالدىڭ «اقجايىعى» قارسىلاس شاق كەلتىرەر ەمەس. بەينەبىر ماۋسىم سوڭىندا ەكىنشى تىنىسى اشىلعانداي اسەر قالدىرادى. قاتارىنان بەسىنشى رەت جەڭىسكە جەتكەن كوماندا ەڭ سوڭعى ورىننان جوعارى كوتەرىلدى. بۇل جولى ورالدىقتاردىڭ «قۇربانى» بولعان كوماندا – «اتىراۋ». باتىس دەربيىندە «اقجايىق» قوناقتا 2:1 ەسەبىمەن جەڭىسكە جەتتى.
تۋر بارىسىندا جانكۇيەرلەردىڭ نازارىن اۋدارعان كەلەسى ماتچ تالدىقورعاندا ءوتتى. سوڭعى مينۋتقا دەيىن جەڭىپ تۇرىپ, تورەشى قوسقان قوسىمشا ۋاقىتتا عانا قاقپاسىنا ەكى دوپ جىبەرىپ العان جەرگىلىكتى «جەتىسۋ» قاراعاندىنىڭ «شاحتەرىنە» ەسە جىبەردى. ال سىرت الاڭدا قوستانايدىڭ «توبىلىنان» 1:3 ەسەبىمەن جەڭىلگەن «تاراز» تۋرنير كەستەسىندەگى سوڭعى ورىنعا سىرعۋعا ءماجبۇر بولدى.
ەلامان قوڭىر,
جۋرناليست