ەلورداداعى ورتالىق كوممۋنيكاتسيالار قىزمەتىندە وتكەن جيىندا قر ۇلتتىق مۋزەيىنىڭ ديرەكتورى دارحان مىڭباي سالانى جەتىلدىرۋ ماقساتىندا, جۇيەنى يننوۆاتسيالىق دامىتۋ مەن باسەكەگە قابىلەتتىلىگىن ارتتىرۋ جولىندا ەلىمىزدەگى مۋزەي قىزمەتىن جاڭعىرتۋ بويىنشا جۇمىستار جۇرگىزىلىپ جاتقانىن باياندادى.
ۇلتتىق مۋزەي ديرەكتورىنىڭ ايتۋىنشا, مۋزەي جاس ۇرپاقتى تاربيەلەيتىن ورىنعا اينالىپ كەلەدى. سونداي-اق, مادەني وشاقتاردىڭ كەلۋشىلەرگە قىزمەت كورسەتۋ فورماتى وزگەرۋدە. «ءبىز قازىرگى تاڭدا شەتەلدىك ارىپتەستەرىمىزبەن بايلانىس ورناتۋدامىز. ەلباسىنىڭ ۇلتتىق مۋزەيدى الەمدىك مۋزەيگە اينالدىرۋ كەرەك دەگەن تاپسىرماسى بار. وسى ماقساتتى جۇزەگە اسىرۋ ءۇشىن الەمنىڭ جەتەكشى ەلدەرىنىڭ مۋزەيلەرىمەن كەلىسىم-شارتقا وتىردىق. ول ەلدەردىڭ قاتارىندا كورەيا, قىتاي, رەسەي, فرانتسيا, يتاليا ءتىپتى, ۆەتنام ەلدەرىنىڭ مۋزەيلەرى بار»-دەگەن ديرەكتور مادەني نىسان اشىلعالى بەرى 4 مىڭنان استام ادام اقىلى تۇردە كىرگەنىن اتاپ ءوتتى. سونداي-اق, بۇگىنگە دەيىن ۇلتتىق مۋزەيگە 27 مىڭنان استام شەتەلدىك كەلگەن. د.مىڭباي شەتەلدىكتەر كەلگەن كەزدە ولارعا سايكەسىنشە قىزمەت كورسەتەتىن, ءۇش تىلدە بايانداپ بەرەتىن اۋديوگيدتەردىڭ بار ەكەنىن حابارلادى. ديرەكتور جاقىن بولاشاقتا مۋزەي شەتەلدىكتەرگە قىتاي, تۇرىك تىلدەرىندە قىزمەت كورسەتە باستايتىنىن دا العا تارتتى.
ايتا كەتەيىك, ۇلتتىق مۋزەيدە وبلىستىق مۋزەيلەردىڭ كورمەلەرى ۇيىمداستىرىلۋدا. سونداي-اق, «ۇلتتىق مۋزەي سەنىڭ قالاڭدا» دەگەن اكتسيا اياسىندا ۇلتتىق مۋزەي ءوز جادىگەرلەرىن وبلىستىق مۋزەي كورمەلەرى ارقىلى تۇرعىندارعا ۇسىنۋدى باستادى.
ايگۇل سەيىلوۆا