سەناتتىڭ كەزەكتى جالپى وتىرىسى پالاتا بيۋروسى كۇن تارتىبىنە ەنگىزبەگەن ۇيىمداستىرۋ ماسەلەلەرىنەن باستالدى. وتىرىستى اشىپ, جۇرگىزگەن سەنات توراعاسى قاسىم-جومارت توقاەۆ ولاردى ءوزى ايتىپ وتىردى.
الدىمەن توراعا سەنات دەپۋتاتى بولىپ تاعايىندالعان داريعا نازارباەۆانى جاڭا قىزمەتىمەن قۇتتىقتادى. ودان كەيىن ەلباسىنىڭ جارلىعىمەن نۇرلان ورازاليننىڭ دەپۋتاتتىق وكىلەتتىگى توقتاتىلاتىنى جاريالاندى. نۇرلان مىرقاسىم ۇلىنا سەنات دەپۋتاتتىعىن ابىرويمەن اتقارعانى ءۇشىن ريزاشىلىعىمىزدى ءبىلدىرەمىز. پالاتا بيۋروسىنىڭ شەشىمىمەن ول پرەزيدەنتتىڭ رەفورمالارىن زاڭنامالىق تۇرعىدا قامتاماسىز ەتۋگە جانە قازاقستاندىق پارلامەنتاريزمدى دامىتۋعا قوسقان ۇلەسى ءۇشىن سەناتتىڭ قۇرمەت گراموتاسىمەن ماراپاتتالدى, دەدى ق.توقاەۆ.
ودان ءارى توراعا سەنات دەپۋتاتتارىنىڭ قۇرامىنداعى وزگەرىستەرگە بايلانىستى وتىرىستىڭ كۇن ءتارتىبىنە ەنگىزىلەتىن ۇيىمداستىرۋ ماسەلەلەرىن جاريالادى. الدىمەن ءوزىنىڭ اتىنا سەناتورلار اسقار بەيسەنباەۆتىڭ, يكرام ادىربەكوۆتىڭ, تالعاتبەك ابايدىلديننىڭ, اقان بيجانوۆتىڭ اتىنان اتقارىپ جۇرگەن قىزمەتتەرىنەن بوساتۋ تۋرالى ءوتىنىش تۇسكەنىن ايتتى. ءسويتىپ, ا.بەيسەنباەۆ – سەنات توراعاسىنىڭ ورىنباسارى, ي.ادىربەكوۆ – حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى, ت.ابايدىلدين – ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى, ا.بيجانوۆ – الەۋمەتتىك-مادەني دامۋ جانە عىلىم كوميتەتىنىڭ ءتوراعاسى قىزمەتتەرىنەن سەناتورلار-
دىڭ داۋىس بەرۋىمەن بوساتىلدى.
سەنات توراعاسىنىڭ ورىنباسارى قىزمەتىنە قاسىم-جومارت كەمەل ۇلى بەكتاس بەكنازاروۆتى ۇسىندى. پالاتا دەپۋتاتتارى بۇل كانديداتۋرانى ءبىراۋىزدان قولدادى. بوساعان كوميتەت توراعالىعىنا ءتيىسىنشە داريعا نازارباەۆا, اسقار بەيسەنباەۆ, بىرعانىم ءايتىموۆا سايلاندى. ال توراعا قىزمەتىنەن بوساعان سەناتورلار ءوزدەرىنىڭ قالاۋىمەن بۇرىن باسشىلىق جاساعان كوميتەتتەردىڭ ءمۇشەسى بولدى. سونىمەن قاتار, سەناتور مارات تاعىموۆ ءوزىنىڭ ءوتىنىشى بويىنشا ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنەن كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنە اۋىستى.
ءسويتىپ, جاڭا باسشىلار بەلگىلى بولعاننان كەيىن وتىرىس كۇن ءتارتىبىندەگى ماسەلەلەردى قاراۋعا كوشتى. الدىمەن الماتى وبلىسىنان جاڭادان سايلانعان سەناتور نۇرلان قىلىشباەۆتى پالاتا الەۋمەتتىك دامۋ جانە عىلىم كوميتەتىنە مۇشە ەتىپ سايلادى.
كۇن تارتىبىندەگى ەكىنشى ءماسەلە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ جاڭا مۇشەلەرىن تاعايىنداۋعا ارنالدى. سەنات تاعايىنداعان بۇرىنعى مۇشەلەردىڭ وكىلەتتىك مەرزىمدەرى اياقتالۋىنا بايلانىستى ەسەپ كوميتەتىنىڭ ەكى جاڭا مۇشەلەرى ەتىپ توراعا الەكساندر گورياينوۆتى جانە تالعات جاقاندى بەس جىلعا تاعايىنداۋدى ۇسىندى. ەكى كانديداتۋرانى دا سەنات قولدادى.
كۇن تارتىبىندەگى سوڭعى ماسەلە – قازاقستان مەن اۋعانستان ۇكىمەتتەرى اراسىنداعى ازاماتتىق قورعانىس, توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى زاڭ جوباسىن قابىلداۋعا ارنالدى. بۇل ماسەلە بويىنشا ىشكى ىستەر ءمينيسترى قالمۇحانبەت قاسىموۆ بايانداما جاساپ, زاڭ جوباسىنىڭ قاجەتتىلىگى تۋرالى ايتىپ بەردى. كەلىسىمگە ەكى ەلدىڭ مەملەكەت باسشىلارىنىڭ قاتىسۋىمەن 2015 جىلعى 20 قاراشادا استانادا قول قويىلعان. اتالعان كەلىسىمنىڭ كۇشىنە ەنۋى ءتوتەنشە جاعدايلارعا مونيتورينگ جانە بولجاۋ جاساۋ سالاسىندا تاجىريبە الماسۋعا, قاۋىپ تۋىنداعان جاعدايدا تۇرعىنداردى دايىنداۋعا, ەكى مەملەكەتتىڭ وقۋ ورىندارىندا ازاماتتىق قۇقىق قورعاۋ سالاسىنداعى مامانداردى وقىتۋ جانە تۇراقتى نەگىزدە ءبىرلەسكەن كونفەرەنتسيالار مەن سەمينارلار وتكىزۋگە ءمۇمكىندىك بەرەدى, دەدى مينيستر.
سەناتورلار اراسىنان سەرگەي پلوتنيكوۆ اۋعانستاننىڭ ازاماتتىق قورعانىس سالاسىنىڭ ماماندارىن دايارلاۋ مەن قايتا وقىتۋ قازاقستاننىڭ قاي قالاسىنداعى قانداي جوو-دا ىسكە اسىرىلاتىن بولادى جانە ونىڭ شىعىندارىن كىم كوتەرەدى دەپ سۇرادى. ق.قاسىموۆ وعان مامانداردىڭ كوكشەتاۋدىڭ تەحنيكالىق ينستيتۋتىندا وقىلاتىنىن, ال شىعىندار حالىقارالىق ۇيىمداردان ارنايى بولىنگەن گرانتتاردىڭ ەسەبىنەن جابىلاتىنىن ايتتى.
بۇدان باسقا سۇراقتار بولماعان سوڭ قوسىمشا بايانداما جاساۋ ءۇشىن ءسوزدى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ مۇشەسى مۇحتار التىنباەۆ الدى. سەناتور كەلىسىمدە توتەنشە جاعدايلاردىڭ اركەلكى تۇرلەرىن ەسكەرە وتىرىپ, ولاردىڭ الدىن الۋ جانە جويۋعا ارنالعان ناقتى ءىس-شارالاردىڭ تىزبەسى كورسەتىلگەنىن جانە كوميتەتتە ونىڭ جان-جاقتى قارالعانىن جەتكىزدى. زاڭ جوباسىن تالقىلاۋدا سەناتور گەورگي كيم ءسويلەپ, ونىڭ مەملەكەت باسشىسى كوزدەگەن قازاقستان مەن اۋعانستان اراسىنداعى ىنتىماقتاستىقتى تەرەڭدەتە ءتۇسۋ ماسەلەسىنە ىقپال ەتەتىنىن ايتا كەلىپ, ارىپتەستەرىنەن قولداۋدى ءوتىندى. ءسويتىپ, زاڭ قابىلداندى.
كۇن تارتىبىندەگى ماسەلەلەر اياقتالعان سوڭ سەناتورلار ورتالىق اتقارۋشى ورگاندارعا ارناعان وزدەرىنىڭ دەپۋتاتتىق ساۋالدارىن جاريالادى.
جاقسىباي سامرات,
«ەگەمەن قازاقستان»