كەشە پرەزيدەنت جانىنداعى ورتالىق كوممۋنيكاتسيالار قىزمەتىندە «قۋاتتى ءوڭىر – قۋاتتى قازاقستان» تاقىرىبىمەن اتىراۋ وبلىسىنىڭ استانا قالاسىنداعى كۇندەرىنىڭ وتۋىنە وراي بريفينگ ۇيىمداستىرىلدى.
بريفينگتە اتىراۋ وبلىسى اكىمىنىڭ ورىنباسارى الىبەك ناۋتيەۆ ءبىرىنشى كەزەكتە ءوڭىردىڭ دامۋى, اتقارىلىپ جاتقان جۇمىستار جونىندە كەڭىنەن اڭگىمەلەپ بەردى.
– اتىراۋ وبلىسى – الەۋمەتتىك-ەكونوميكالىق دامۋ كورسەتكىشتەرى قارقىندى ءوسىپ كەلە جاتقان ايماقتاردىڭ ءبىرى. تەك مۇناي ءوندىرىسى عانا ەمەس, وزگە دە ءتۇرلى سالالاردا ءىلگەرىلەۋشىلىك بار. وبلىستىڭ جالپى وڭىرلىك ءونىمى وسى جىلدىڭ ءبىرىنشى توقسانىندا 1,18 ترلن تەڭگەنى قۇراسا, ونەركاسىپ ءونىمىنىڭ كولەمى 2,52 ترلن تەڭگەگە جەتتى. ايماقتا يندۋستريالىق-يننوۆاتسيالىق دامۋ باعدارلاماسى شەڭبەرىندە 5,1 مىڭ جۇمىس ورنى قۇرىلدى, سونداي-اق, جالپى قۇنى 2,5 ترلن تەڭگەنى قۇرايتىن 49 ينۆەستيتسيالىق جوبا ىسكە اسىرىلۋدا. نەگىزگى كاپيتالعا ينۆەستيتسيا كولەمى 53,1 پايىزعا ءوسىپ, 1 093,1 ملرد تەڭگەنى قۇرادى. وسى كەزەڭگە دەيىن 273,8 مىڭ شارشى مەتر تۇرعىن ءۇي ىسكە قوسىلدى. بۇل باعىتتاعى جۇمىستار ودان ءارى جالعاسا بەرمەك. وسى جىلدىڭ 1 قىركۇيەگىنە مەملەكەتتىك بيۋدجەتكە 503,5 ملرد تەڭگە سالىق پەن باسقا دا مىندەتتى تولەمدەر ءتۇستى, – دەدى وبلىس اكىمىنىڭ ورىنباسارى. ونىڭ ايتۋىنشا, نەگىزگى سالادا اتىراۋ مۇناي وڭدەۋ زاۋىتى جۇمىس ىستەۋدە. بۇل زاۋىت جاڭعىرتۋدان وتكەن. «تەڭىزشەۆرويل» كومپانياسى 30 ملرد دوللارعا جۋىق قارجىعا جاڭعىرتۋدىڭ ءۇشىنشى كەزەڭىن باستاماق. ال قاشاعان جوباسى قازان ايىندا ىسكە قوسىلادى دەپ كۇتىلۋدە.
سونىمەن قاتار, ول الەۋمەتتىك سالالارداعى اتقارىلىپ وتىرعان جۇمىستارعا توقتالا كەلىپ, ءبىلىم بەرۋ سەكتورىنداعى يگى ىستەردى اتاپ ءوتتى.
– وبلىستا 192 مەكتەپ بار. وسى مەكتەپتەرگە ءبىرىنشى سىنىپقا بارعان بالالار 100 پايىز وقۋلىقتارمەن قامتاماسىز ەتىلدى. مۇنان بولەك, 1-4-سىنىپ وقۋشىلارىن تەگىن تاماقپەن قامتاماسىز ەتۋ ءۇشىن وبلىس بيۋدجەتىنەن 1 ملرد 190 ملن تەڭگە ءبولىندى. سونىڭ ناتيجەسىندە 51 مىڭ 560 بالا تەگىن تاماقپەن قامتاماسىز ەتىلەتىن بولادى. ارينە, وبلىستا ءبىلىم سالاسىنداعى پروبلەمالى ماسەلەلەر دە جوق ەمەس. اپاتتى جاعدايداعى 6 مەكتەپ بار. ونىڭ 5-ەۋىنىڭ قۇرىلىسى باستالىپ, ۇشەۋىنىڭ قۇرىلىسى بيىل اياقتالادى. بىرەۋى 2017 جىلدىڭ سوڭىندا تولىق بىتەدى. وسىلايشا, اپاتتى مەكتەپتەردەن ارىلامىز, – دەدى ءا.ناۋتيەۆ.
ال اتىراۋ وبلىستىق اۋىل شارۋاشىلىعى باسقارماسىنىڭ باسشىسى سىرىم رىسقاليەۆ ءوز كەزەگىندە وڭىردە اتالعان سالاعا قاتىستى جۇيەلى جۇمىستار جۇرگىزىلىپ وتىرعانىن, سونىڭ ناتيجەسىندە بىرقاتار كورسەتكىشتەرگە قول جەتكىزىلگەنىن, 17-18 قىركۇيەكتە استانادا وتەتىن جارمەڭكەگە قىزۋ دايىندىقپەن كەلگەندەرىن جەتكىزدى.
– بۇرىن اتىراۋ وبلىسى استاناعا تەك بالىق ونىمدەرىن جىبەرەتىن بولسا, ەندى ەلوردالىقتارعا اۋىل شارۋاشىلىعى ونىمدەرىمىزدى ۇسىنا الامىز. ولاردىڭ ىشىندە كوكونىس, ءسۇت, ەت ونىمدەرى, جۇمىرتقا, شۇجىق, سالاتتار بار, – دەدى باسقارما باسشىسى. ونىڭ ايتۋىنشا, بيىل اتىراۋلىقتار استاناعا مول تارتۋمەن كەلىپ وتىرعان كورىنەدى. ناقتىلاي ايتقاندا, اتىراۋلىقتار استاناعا 36 تاۋار وندىرۋشىلەردىڭ قاتىسۋىمەن 90 توننادان استام ءونىم اكەلگەن.
– اتىراۋ وبلىسى جەرگىلىكتى ءوندىرۋشىلەردىڭ ونىمدەرىن ەلورداعا اكەلدى. كەشە عانا جۇك تيەلگەن 14 جۇك كولىگى قالاعا جەتتى. ءبىزدىڭ اكەلگەن ءونىمدەرىمىز 90 توننادان اسادى. ونىڭ ىشىندەگى نەگىزگى ءونىم – بالىق 36 توننانى قۇرايدى. مۇنان بولەك, 38 توننا باقشا داقىلدارىن, ءسۇت, ەت ونىمدەرىن جانە جۇمىرتقا اكەلدىك», – دەدى ول. باسقارما باسشىسىنىڭ سوزىنە قاراعاندا, وڭىردە سوڭعى 3-4 جىلدا اۋىل شارۋاشىلىعى سالاسىنا 17 ملرد تەڭگەگە جۋىق قاراجات ءبولىنىپ, 14 جوبا ىسكە اسقان. ءوڭىردى ءسۇت ونىمدەرىمەن قامتاماسىز ەتۋ دە ءبىرشاما جاقسارعان. سونداي-اق, وسىدان 3 جىل بۇرىن وڭىردە ىشكى نارىقتى جۇمىرتقامەن قامتاماسىز ەتۋ 13 پايىز عانا بولسا, بۇگىندە بۇل كورسەتكىش 100 پايىزدان اسىپ وتىر, – دەدى ول.
سونىمەن, بۇگىن جانە ەرتەڭ, ياعني 17-18 قىركۇيەكتە اتىراۋ وبلىسىنىڭ استاناداعى كۇندەرى وتەدى. شارا بارىسىندا اتىراۋ وبلىسى بويىنشا 260-قا جۋىق ونەرپاز, 10 شىعارماشىلىق توپ ءوز ونەرلەرىن ۇسىنادى. ولاردىڭ ىشىندە د.نۇرپەيىسوۆا اتىنداعى اكادەميالىق ۇلت اسپاپتار وركەسترى, ن.ءجانتورين اتىنداعى وبلىستىق فيلارمونيا, م.وتەمىس ۇلى اتىنداعى قازاق دراما تەاترىنىڭ ۇجىمى, سونىمەن قاتار, اتىراۋ وبلىستىق تاريحي-ولكەتانۋ مۋزەيى بار.
جوعارىدا اتالعان ۇجىمداردىڭ قاتىسۋىمەن بۇگىن ساعات 18:00-دە بەيبىتشىلىك جانە كەلىسىم سارايىندا «عاسىرلاردان سىر شەرتكەن – اتىراۋ» اتتى كورمە ۇيىمداستىرىلادى, ال 19:00-دە وسى سارايدا گالا-كونتسەرت كوپشىلىك نازارىنا ۇسىنىلادى. 18 قىركۇيەكتە ەلورداداعى جاستار سارايىندا ش.ايتماتوۆتىڭ «ماڭگۇرت» اتتى پەساسى قويىلادى.
جولدىباي بازار,
«ەگەمەن قازاقستان»