قىرعىز رەسپۋبليكاسى قارۋلى كۇشتەرى باس شتابىنىڭ بالىقشى قالاسىنداعى «ەدەلۆەيس» پوليگونىندا شانحاي ىنتىماقتاستىق ۇيىمى مۇشە مەملەكەتتەرىنىڭ «بەيبىت ميسسيا-2016» بىرلەسكەن اسكەري لاڭكەستىككە قارسى كوماندالىق-شتابتىق وقۋ-جاتتىعۋىنىڭ رەسمي اشىلۋى ءوتتى.
سالتاناتتى ءىس-شاراعا بەس ەلدىڭ, ياعني قازاقستان رەسپۋبليكاسى, قىرعىز رەسپۋبليكاسى, قىتاي حالىق رەسپۋبليكاسى, رەسەي فەدەراتسياسى جانە ءتاجىكستان رەسپۋبليكاسى قارۋلى كۇشتەرىنىڭ اسكەري كونتينگەنتتەرى قاتىستى.
جالپى العاندا, وقۋ-جاتتىعۋعا 2 مىڭعا جۋىق اسكەري قىزمەتشى, شامامەن 300 بىرلىك اسكەري تەحنيكا جۇمىلدىرىلسا, ولاردىڭ ءبىرشاماسى جاڭعىرتىلعان جانە زاماناۋي قوندىرعىمەن جابدىقتالعان, سونداي-اق, قۇرلىق اسكەرلەرىنىڭ ءىس-قيمىلىن قالقالاۋدى قامتاماسىز ەتۋگە ارنالعان 40-قا جۋىق جاۋىنگەرلىك اۆياتسيا تارتىلدى.
«مۇنداي وقۋ-جاتتىعۋلاردىڭ وتكىزىلۋى قازىرگى زامان تالابىنا ساي ءارى شىۇ جاۋاپكەرشىلىگى وڭىرىندە جانە جالپى الەمدە قالىپتاسقان حالىقارالىق جاعداي نەگىزىندە ءوزىنىڭ وزەكتىلىگى مەن ماڭىزدىلىعىن تالاي ءمارتە دالەلدەگەن», – دەپ «بەيبىت ميسسيا-2016» بىرلەسكەن وقۋ-جاتتىعۋىنىڭ جەتەكشىسى پولكوۆنيك ر.مۇقامبەتوۆ ايتىپ ءوتتى. – وقۋ-جاتتىعۋدىڭ قويىلعان ماقساتتارىنا قول جەتكىزۋ ءۇشىن بىرگە بارىنشا كۇش-جىگەرىمىزدى سالاتىنىمىزعا سەنىمدىمىن. سەبەبى, قازىرگى وقۋ-جاتتىعۋلار «جاۋىزدىقتىڭ ءۇش كۇشىمەن», ياعني لاڭكەستىكپەن, ەكسترەميزممەن جانە سەپاراتيزممەن كۇرەسۋدەن باسقا, مەملەكەتتەرىمىز قارۋلى كۇشتەرىنىڭ اناعۇرلىم تىعىز اسكەري ىنتىماقتاستىعىنا ىقپال ەتەدى».
قازاقستاننان وقۋ-جاتتىعۋعا قازاقستان رەسپۋبليكاسى قارۋلى كۇشتەرى اەروۇتقىر اسكەرلەرىنىڭ اسكەري قىزمەتشىلەرى قاتىسۋدا.
«ەگەمەن-اقپارات»