1993
* 4 مامىردا اباي اتىنداعى وپەرا جانە بالەت تەاترىندا اباي قورىنىڭ تۇساۋكەسەر ءراسىمى ءوتتى. جيىندا ءسوز سويلەگەن پرەزيدەنت نۇرسۇلتان نازارباەۆ 1995 جىلدى اباي جىلى رەتىندە اتاپ وتۋگە يۋنەسكو-عا ۇسىنىس جاساعانىن حابارلادى.
*8 مامىردا الماتىنىڭ باس الاڭىندا تاۋەلسىز قازاقستاننىڭ العاشقى اسكەري شەرۋى ءوتتى.
*11 مامىردا الماتىدا مەملەكەتتىڭ يدەولوگيالىق قىزمەتىنىڭ ماسەلەلەرى جونىندەگى رەسپۋبليكالىق كەڭەس وتكىزىلدى. كەڭەستە بايانداما جاساعان پرەزيدەنت ن.ءا.نازارباەۆ قازاقستان قوعامىنىڭ الدىندا تۇرعان ماڭىزدى مىندەتتەردىڭ ءبىرى ازاماتتىق كەلىسىم مەن ۇلتارالىق تاتۋلىقتىڭ نىعايۋى ەكەنىن جاريالادى. بايانداما ءماتىنى «ەگەمەن قازاقستان» گازەتىنىڭ 13 مامىرداعى نومىرىنە باسىلدى.
* 15 مامىردا قازاقستان رەسپۋبليكاسى جوعارعى كەڭەسى تورالقاسىنىڭ «قازاقشا جەر-سۋ اتتارىن, اتاۋلاردى ورىس تىلىندە ءدال جازۋدى تارتىپكە كەلتىرۋ جانە قازاقستان رەسپۋبليكاسى جەكەلەگەن اكىمشىلىك-اۋماقتىق مەكەندەرىنىڭ اتاۋلارىن وزگەرتۋ تۋرالى» قاۋلىسى جاريالاندى. قاۋلىعا سايكەس دجامبۋلسكايا, دجۋۆالينسكي, دجەزدى, دجەتىساي, چۋ, كۋرداي دەگەن سياقتى قولدان بۇزىلعان اتاۋلار, نوۆوروسسيا, يليچ, دزەرجينسكي, كالينين, ۆولودارسكي, ەرماك, اندرەەۆ, نوۆوترويتسكوە سياقتى كوپتەگەن اۋدان, ەلدى مەكەن اتتارى اۋىستىرىلىپ, حالقىمىزدىڭ ارداقتى ۇلدارىنىڭ ەسىمىمەن اتالاتىن تۇتاس اۋداندار, قازاقى توپونيميكانى قالپىنا كەلتىرگەن جاتىق تا جاراسىمدى اتاۋلار جەردىڭ ءسانىن كىرگىزىپ, ەلدىڭ كوڭىلىن كوتەرىپ تاستادى.
* 18 مامىردا پرەزيدەنت نۇرسۇلتان نازارباەۆتىڭ تۇرىكمەنستانعا رەسمي ساپارى باستالدى. ءۇش كۇنگە سوزىلعان رەسمي ساپار بارىسىنداعى ەلباسىنىڭ تۇرىكمەنستان پرەزيدەنتى س.نيازوۆپەن كەزدەسۋلەرى قازاقستان مەن تۇرىكمەنستان اراسىنداعى ءوزارا تۇسىنىستىك پەن سەنىمنىڭ جوعارى دەڭگەيىن كورسەتتى. سونداي-اق, وسى كۇنى «جاپپاي ساياسي قۋعىن-سۇرگىندەر قۇرباندارىن اقتاۋ تۋرالى» زاڭى باسپاسوزدە جاريالاندى.
*21 مامىردا الماتىدا قازاقستان ينجەنەرلەرىنىڭ ءى سەزى اشىلدى. سەزدە پرەزيدەنت ن.ءا.نازارباەۆ ءسوز سويلەدى. ەلباسى رەسپۋبليكا ينجەنەرلەرىنىڭ الدىندا تۇرعان ورتاق مىندەتتەردى اتاپ كورسەتتى.
* 25 مامىردا ءۇندىستان رەسپۋبليكاسىنىڭ پرەمەر-ءمينيسترى ناراسيمحا راو قازاقستانعا رەسمي ساپارمەن كەلدى. قازاقستان پرەزيدەنتى نۇرسۇلتان نازارباەۆ پەن ءۇندىستان ۇكىمەتىنىڭ باسشىسى ناراسيمحا راو باستاعان رەسمي دەلەگاتسيالاردىڭ كەلىسسوزى بارىسىندا ەلباسى ساۋدا-ەكونوميكالىق ىنتىماقتاستىقتىڭ ناقتى ماسەلەلەرىن شەشۋمەن اينالىساتىن ارناۋلى كوميسسيا قۇرۋ تۋرالى ءۇندى جاعىنىڭ ۇسىنىسىن قولدادى.
* 26 مامىردا پرەزيدەنت نۇرسۇلتان نازارباەۆ «وڭتۇستىك قازاقستان وبلىسىندا «ورداباسى» ۇلتتىق تاريحي-مادەني جانە تابيعي قورىعىن قۇرۋ تۋرالى» قاۋلىعا قول قويدى.
* 28 مامىردا كيەلى ورداباسى جەرىندە ۇلكەن جيىن ءوتتى. شىمكەنت قالاسىنا جاقىن جەردەگى قاسيەتتى ورداباسى بيىگىندە ەلىمىز تاۋەلسىزدىك العالى بەرگى وتكەن تويلاردىڭ شىرقاۋ بيىگىندەي بولعان ۇلى توي – تولە ءبيدى, قازىبەك ءبيدى, ايتەكە ءبيدى ەسكە الۋعا ارنالدى. ءجۇز ەلۋ مىڭعا تارتا ادام جينالعان تويعا قازاقستان, وزبەكستان جانە قىرعىزستان پرەزيدەنتتەرى قاتىستى. «ەگەمەن قازاقستان» گازەتىنىڭ 27 مامىرداعى ءنومىرى وسى تويعا ارنالدى.
* 1 ماۋسىمدا پرەزيدەنت الماتىعا قىسقا مەرزىمدى جۇمىس ساپارىمەن كەلگەن گرۋزيا پرەزيدەنتى ە.شەۆاردنادزەنى قابىلدادى.
* 5 ماۋسىمدا مينيسترلەر كابينەتىنىڭ شەشىمىمەن رەسپۋبليكالىق كوركەمونەر كوللەدجى مەن ت.جۇرگەنوۆ اتىنداعى الماتى مەملەكەتتىك تەاتر-كوركەمسۋرەت ينستيتۋتىنىڭ وسى سالاداعى فاكۋلتەتتەرى نەگىزىندە قازاق مەملەكەتتىك كوركەمونەر اكادەمياسى قۇرىلعانى جاريالاندى. ۇكىمەتتىڭ سول كۇنگى تاعى ءبىر قاۋلىسىمەن ت.جۇرگەنوۆ اتىنداعى الماتى مەملەكەتتىك تەاتر-كوركەمسۋرەت ينستيتۋتى وسى اتپەن قازاق مەملەكەتتىك تەاتر جانە كينو ينستيتۋتى بولىپ قايتا قۇرىلدى.
* 8 ماۋسىمدا قىرعىز رەسپۋبليكاسىنىڭ پرەزيدەنتى اسقار اقاەۆ قازاقستانعا كەلدى. پرەزيدەنتتەر – نۇرسۇلتان نازارباەۆ پەن اسقار اقاەۆ ەكى جاقتى قارىم-قاتىناستىڭ بارلىق سالالارىن ودان ءارى كەڭەيتىپ, تەرەڭدەتۋ ماسەلەلەرى بويىنشا اڭگىمەلەستى. اسقار اقاەۆ ۇلتتىق ۆاليۋتا – سوم ەنگىزىلگەننەن كەيىنگى ءوز رەسپۋبليكاسىنداعى ىشكى ساياسي جاعداي تۋرالى قازاقستان پرەزيدەنتىن حاباردار ەتتى.
*9 ماۋسىمدا پرەزيدەنت ن.ءا.نازارباەۆ «اتقارۋشى وكىمەتتىڭ ورتالىق ورگاندارىنىڭ جۇيەسىن رەتكە كەلتىرۋ تۋرالى», «مەملەكەتتىك باسقارۋ ورتالىق ورگاندارىنىڭ تىزبەسى تۋرالى» جانە «قازاقستان رەسپۋبليكاسى مينيسترلەر كابينەتىنىڭ قۇرامى تۋرالى» جارلىقتارىنا قول قويىلدى. بۇل جارلىقتار بويىنشا بىرقاتار قۇرىلىمدار ءوزارا قوسىلىپ, ۇكىمەت ىقشامدالا ءتۇستى.
* 14 ماۋسىمدا «قازاقستان رەسپۋبليكاسىنداعى بانكىلەر تۋرالى» زاڭ كۇشىنە ەندى.
*15 ماۋسىمدا مەملەكەتتىك ساياسات جونىندەگى ۇلتتىق كەڭەستىڭ ءبىرىنشى ءماجىلىسى ءوتتى. نۇرسۇلتان نازارباەۆ مەملەكەتتىك ساياساتتىڭ ءۇش باستى مىندەتى رەتىندە قوعامدى رەفورمالاۋدىڭ باسىم باعىتتارىن تالداپ جاساۋدا, حالىقتىڭ دەموكراتيالىق سانا-سەزىمىن تاربيەلەۋدە تۇراقتىلىقتى, ەتنوسارالىق كەلىسىمدى جانە ازاماتتىق تاتۋلىقتى قولداۋ جونىندەگى مەملەكەتتىك جانە باسقا قۇرىلىمداردىڭ كۇش-جىگەرىن ۇيلەستىرىپ وتىرۋدى اتاپ كورسەتتى.
*16 ماۋسىمدا پرەزيدەنت «قازاقستان رەسپۋبليكاسىنداعى قۇقىقتىق رەفورمانىڭ تيىمدىلىگىن ارتتىرۋ جونىندەگى شارالار تۋرالى» جارلىققا قول قويدى. جارلىق بويىنشا پرەزيدەنت پەن مينيسترلەر كابينەتىنىڭ زاڭ شىعارۋ باستاماسى رەتىندە دايىندالاتىن زاڭدار جوبالارىنىڭ باستى ازىرلەۋشىسى بولىپ ادىلەت مينيسترلىگى بەلگىلەندى.
* 17 ماۋسىمدا نۇرسۇلتان نازارباەۆتىڭ جارلىعىمەن پرەزيدەنت جانىنان قازاقستان رەسپۋبليكاسىنىڭ قاۋىپسىزدىك كەڭەسى قۇرىلدى. سونداي-اق, وسى كۇنى ەلباسى «قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ اسكەري ينستيتۋتىن قۇرۋ تۋرالى» جارلىعى شىقتى. بۇل ينستيتۋت ف.ە.دزەرجينسكي اتىنداعى الماتى جوعارى شەكارالىق كوماندالىق ۋچيليششەسى نەگىزىندە اشىلدى.
* 23 ماۋسىمدا مەملەكەت يەلىگىنەن الۋ مەن جەكەشەلەندىرۋدىڭ 1993-1995 جىلدارعا ارنالعان ۇلتتىق باعدارلاماسىن جۇزەگە اسىرۋ ماقساتىندا پرەزيدەنت جارلىعىمەن ينۆەستيتسيالىق جەكەشەلەندىرۋ كۋپوندارى تۋرالى ەرەجە كۇشىنە ەنگىزىلدى.
*3 شىلدەدە تالدىقورعان وڭىرىندە سالقام جاڭگىر حان مەن ءجالاڭتوس باتىر باستاعان ساربازداردىڭ وربۇلاق شايقاسىندا جوڭعارلارعا تويتارىس بەرگەن تاماشا جەڭىسىنىڭ 350 جىلدىعى اتالىپ ءوتتى. سول شايقاستا جاڭگىر حان 600 باتىرىمەن 50 مىڭ ادامدىق دۇشپان قولىن توقتاتقان. ال سامارقاننان ءجالاڭتوس ءباھادۇر باستاعان 20 مىڭ سارباز كومەككە كەلگەن سوڭ جوڭعاردىڭ 10 مىڭ ادامىنىڭ كوزى جويىلعان.