«ۇرلىق ءتۇبى – قورلىق» دەپ اتالارىمىز تەككە ايتپاسا كەرەك. الايدا, كۇزگى وراق ناۋقانى كەڭ قانات جايعان قاربالاس تۇستا استىق ۇرلاۋشىلاردىڭ تابەتى اشىلا تۇسەدى. سوندا «دانىككەننەن قۇنىققان جامان» دەمەكشى, ماڭداي تەرمەن وسىرىلگەن ەل ريزىعىن دالادا تەگىن جاتقان دۇنيەدەي كورەتىندەر جوق ەمەس. مىنە, سولاردىڭ ءبىرىن ءتارتىپ ساقشىلارى ەسىل اۋدانىندا ۇستادى. شارۋاشىلىقتىڭ بىرىنەن 300 كيلو ارپانى قولدى ەتىپ, جاعاسى جايلاۋدا كەتىپ بارا جاتقان جىرىندىنى «وراق-2016» جەدەل الدىن الۋ شاراسىنىڭ مۇشەلەرى تىرپ ەتكىزبەدى.
وسىلايشا جەر-جەرلەردە قۇرىلعان جەدەل توپ استىق جىمقىرۋدىڭ التى فاكتىسىن اشكەرەلەدى. سونداي-اق, جانار-جاعارماي ۇرلاۋدىڭ ءۇش, گەربيتسيد جىمقىرۋدىڭ ءبىر دەرەگى تىركەلدى.
– جەدەل الدىن الۋ رەيدتەرىنىڭ باستى ماقساتى – بيداي, قاتتى وتىن, اۋىل شارۋاشىلىعى تەحنيكالارىنىڭ قوسالقى بولشەكتەرىن ۇرلاۋدى بولدىرماۋ جانە نەمەسە ءىزىن سۋىتپاي اشۋ, – دەيدى ءوىىد كريمينالدىق پوليتسيا ءبولىمىنىڭ جەتەكشىسى ساعىندىق جانتەمىروۆ.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى