بوكستان قازاقستاننىڭ جاستار قۇراما كومانداسى گەرمانيانىڭ ودەردەگى فرانكفۋرت قالاسىندا وتكەن ءداستۇرلى براندەنبۋرگ كۋبوگى تۋرنيرىنەن 4 التىن, 3 كۇمىس جانە 2 قولا مەدال الىپ كەلدى. بوكسشىلاردىڭ وسى جەڭىسىنە بايلانىستى قۇرامانىڭ باس جاتتىقتىرۋشىسى عالىم كەنجەباەۆ گەرمانيادا كەزەكتى رەت وتكەن تۋرنير تۋرالى اڭگىمەلەپ بەردى.
– ءتۋرنيردىڭ ءوتۋ دەڭگەيى قالاي بولدى؟
– بيىلعى تۋرنير وتە جاقسى ءوتتى. وعان قاتىسۋشى ەلدەر ەڭ مىقتى دەگەن بوكسشىلارىن اكەلدى. ءبىزدىڭ ەلدەن وسى دوداعا 9 سپورتشى قاتىسىپ, سونىڭ تورتەۋى جەڭىمپاز اتاندى. اتاپ ايتقاندا, 49 كيلوداعى رۋستام حاميدوۆ, 52 كيلو سالماقتاعى ايدوس اراپوۆ, 75 كيلوداعى بەك نۇرماعامبەت جانە 81 كيلوعا دەيىنگى سالماقتاعى بەكزات نۇرداۋلەتوۆ جەڭىمپاز اتاندى. جالپىكوماندالىق ەسەپتە قازاقستان كومانداسى ەكىنشى ورىن الدى. ءبىرىنشى ورىندى بەس التىن ءجۇلدەمەن رەسەي بوكسشىلارى يەلەنسە, ءۇشىنشى ورىنعا ءبىر التىن مەدال جەڭىپ العان گەرمانيا قۇراماسى كوتەرىلدى.
بۇرىن بوكسى جاقسى دامىعان ەلدەر باسقالارىن قالپاقپەن ۇرىپ الامىن دەپ كەلەتىن. ال قازىر جاعداي مۇلدەم باسقاشا. تۋرنيردە باسەكەلەستەر كوپ بولدى. سونىڭ ىشىندە سولتۇستىك كورشىمىز تۋرالى ايتقىم كەلەدى. رەسەيدىڭ جاستار قۇراماسى قانداي تۋرنيرگە, جارىسقا بولسىن جاقسى دايىندىقپەن باراتىندارىن تاعى ءبىر رەت بايقاتتى. بيىل قاراشا ايىندا سانكت-پەتەربۋرگتە جاستار اراسىندا الەم چەمپيوناتى وتەدى. رەسەي وسى دوداعا شىنداپ كىرىسكەن سياقتى. ءبىزدىڭ كوماندا دا وسى چەمپيوناتقا دايىندىقتى باستاپ كەتتى. قازىر قۇرامادا قۇرمەت تۇعىرىنا كوتەرىلۋگە اسىعىپ جۇرگەن بوكسشىلار بارشىلىق.
جالپى, الەم بويىنشا جىل سايىن تالانتتى, تالاپتى جاستار كوبەيىپ جاتىر. بۇل بوكس سياقتى سپورت تۇرلەرىنىڭ جىلدام دامىپ كەلە جاتقانىن كورسەتەدى. قازىر الەمدە سپورتتىڭ وسى ءتۇرىن ۇلتتىق سپورتقا اينالدىرعان ەلدەر كوپ. سول ءۇشىن ءبىز براندەنبۋرگ كۋبوگى تۋرنيرىندە الەم چەمپيوناتىنا قاتىساتىن كوماندالاردى زەرتتەپ كوردىك. ال جاھاندىق جارىستا ءبىزدىڭ باستى قارسىلاسىمىز رەسەي مەن كۋبانىڭ قۇرامالارى بولادى. بيىلعى سىندا كۋبالىقتار بولعان جوق. ءبىراق ءبىز ولاردى رەسەيدىڭ اناپا قالاسىندا وتكەن تۋرنيردە كورگەنبىز.
– قۇراما ءجيى وزگەرىپ تۇرا ما؟
– ءيا, ءجيى وزگەرەدى. كوماندانىڭ رەزەرۆى تاعى بار. جاڭا ايتقانىمداي, ءبىزدىڭ ەلدە بوكس جاقسى دامىپ كەلەدى. بوكس فەدەراتسياسى جاستار بوكسىن دامىتۋ ءۇشىن قولدا بار مۇمكىندىكتەردىڭ ءبارىن جاساپ وتىر. سپورتتىڭ وسى تۇرىنە ەلىمىزدە ۇلكەن ءمان بەرىلەدى. ەلىمىزدە بوكس ورتالىقتارى, سپورت كەشەندەرى بار. ولار كوبەيە بەرەدى. سپورت كەشەندەرىنىڭ كوبەيگەنى جاستارعا جاقسى. قازىر ءوز باسىم كوشەدە بوس جۇرمەي, سپورت الاڭدارىنا باراتىن جاستاردىڭ تالايىن كورىپ ءجۇرمىن. مەنىڭ ويىمشا, دانيار ەلەۋسىنوۆتىڭ التىن مەدالى, ادىلبەك نيازىمبەتوۆ, ۆاسيلي لەۆيت, يۆان دىچكو مەن داريعا شاكىموۆانىڭ ءجۇلدەلەرى جاستارعا جاقسى اسەر ەتۋدە. ءبىر وكىنىشتىسى, ءبىزدىڭ ەلدە اۋىر سالماقتاعى جاستار از. وسى جاعى پروبلەما بولىپ تۇر. سوندىقتان اۋىلدارعا بارىپ, ەل-ەلدى ارالاپ, اۋىر سالماقتاعى جاستاردى ىزدەۋىمىز كەرەك.
– كوماندا الەم چەمپيوناتىنان باسقا تاعى قانداي جارىستارعا قاتىسادى؟ جالپى, الداعى جوسپارى قانداي؟
– ۋكراينادا اعايىندى كليچكولاردىڭ ءتۋرنيرى وتەدى. سوعان بوكسشىلاردى تاعى ىرىكتەيمىز. وعان كىمنىڭ باراتىنىن شەشەمىز. جەڭىل سالماقتا باسقا بوكسشىلار باراتىن شىعار. ءبىزدە جەڭىل سالماقتا باسەكە كۇشتى. شارشى الاڭنىڭ شاڭىن قاعىپ, ءوزىن كورسەتكىسى كەلەتىن جاستار كوپ. ولار جاس بولعان سوڭ, جەڭىسكە دەگەن جىگەرى, ۇمتىلىسى بار. ال براندەنبۋرگ كۋبوگى تۋرنيرىنە قاتىسقان 75 جانە 81 كيلوعا دەيىنگى سالماقتاعى بوكسشىلار سول كۇيىندە قالادى. سودان كەيىن قازان ايىندا حالىقارالىق اۋەسقوي بوكس قاۋىمداستىعىنىڭ اكادەمياسىندا وتەتىن جيىنعا قاتىسامىز. ال قاراشادا الەم چەمپيوناتىنا سوڭعى دايىندىقتى جۇرگىزەمىز. چەمپيونات 14-26 قاراشا كۇندەرى وتەدى.
اڭگىمەلەسكەن
داستان كەنجالين,
«ەگەمەن قازاقستان»
استانا