اقتوبە قالاسىندا قازاقستان دراما تەاترلارىنىڭ ءححىV رەسپۋبليكالىق فەستيۆالى ءوتىپ جاتىر. بۇل مادەني شارانى مادەنيەت جانە سپورت مينيسترلىگى وبلىس اكىمدىگىمەن بىرلەسىپ ۇيىمداستىرعان. فەستيۆالدىڭ ماقساتى ەلىمىزدە تەاتر ونەرىن ناسيحاتتاۋ, ونى دامىتۋ, دارىندى اكتەرلەر مەن رەجيسسەرلەردى ىنتالاندىرۋ, قازىرگى زامانعى ساحنا ونەرىندەگى جاڭا باعىتتاردى انىقتاۋ, وسكەلەڭ ۇرپاقتى پاتريوتيزم رۋحىندا ءتاربيەلەۋگە اتسالىسۋ بولىپ تابىلادى. بيىلعى فەستيۆالدىڭ ەرەكشەلىگى – قازاقستان حالقىنىڭ باستى يگىلىگى سانالاتىن ەل تاۋەلسىزدىگىنىڭ 25 جىلدىعى اياسىندا ءوتۋى دەۋ ورىندى بولماق.
درامالىق تەاترلار فەستيۆالىن ۇيىمداستىرۋدىڭ ماقساتى مەن ءمانى جايىندا قازىلار القاسى مەن ۇيىمداستىرۋ كوميتەتى وكىلدەرىنىڭ قاتىسۋىمەن وتكەن باسپاسوز ءماسليحاتىندا جان-جاقتى ايتىلدى. مادەنيەت جانە سپورت مينيسترلىگى باسقارما باسشىسىنىڭ مىندەتىن اتقارۋشى گۇلنافيس مىرزاشەۆا بۇل مادەني شارانىڭ 1992 جىلدان بەرى ەلىمىزدىڭ بارلىق قالالارىندا ۇيىمداستىرىلعانىن, ال, اقتوبەدە وسىمەن ەكىنشى رەت وتكىزىلىپ وتىرعانىن تىلگە تيەك ەتە كەلىپ, فەستيۆالعا قاتىسۋشى تەاترلاردىڭ كلاسسيكالىق سپەكتاكلدەرمەن بىرگە, وتاندىق اۆتورلار تۋىندىلارىن كورەرمەندەر نازارىنا ۇسىناتىنىن جەتكىزدى. ول, سونداي-اق, ىرىكتەۋگە 30 تەاتردان ءوتىنىم تۇسكەنىن, سولاردىڭ اراسىنان بۇل جولعى فەستيۆالعا سەگىز تەاتردىڭ جولداما العانىن, ءبىر تەاتردىڭ كونكۋرستان تىس قاتىسىپ وتىرعانىن ايتتى. اسىرەسە, جاس رەجيسسەرلەردىڭ قويىلىمدارىنا باسىمدىق بەرىلگەنىن, قويىلىمدار ەركىن تاقىرىپتا بولاتىنىن اتاپ ءوتتى.
م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى, قازاقستان رەسپۋبليكاسىنىڭ ەڭبەك ءسىڭىرگەن قايراتكەرى ەرلان ءبىلال فەستيۆالدىڭ تەاترلاردىڭ قويعان سپەكتاكلدەرىن باعالاۋ ارقىلى ولاردىڭ قانداي دەڭگەيگە كوتەرىلگەنىن, اكتەرلەردىڭ قانشالىقتى شىعارماشىلىعى شىڭدالعانىن ساراپتاۋعا ءمۇمكىندىك تۋعىزاتىنىن جەتكىزدى.
فەستيۆالدى كىرىسپە ءسوز سويلەپ اشقان وبلىس اكىمىنىڭ ورىنباسارى اسقار بياحمەتوۆ مادەني شارانىڭ ەل تاۋەلسىزدىگىنىڭ 25 جىلدىعى اياسىندا ۇيىمداستىرىلىپ وتىرعانىن ايتا كەلىپ, بۇل شارانىڭ ونەرى مەن ءوندىرىسى دامىعان وڭىردە وتكىزىلۋى ۇلكەن جاۋاپتى دا مەرەيلى ءمىندەت جۇكتەيتىنىن اتاپ ءوتتى. ال سالتاناتتى ساتتە ءسوز العان مادەنيەت جانە سپورت مينيسترلىگى باسقارما باسشىسىنىڭ مىندەتىن اتقارۋشى گۇلنافيس مىرزاشەۆا مادەنيەت جانە سپورت ءمينيسترى ارىستانبەك مۇحامەدي ۇلىنىڭ قۇتتىقتاۋ حاتىن وقىپ بەردى, فەستيۆالعا قاتىسۋشىلارعا شىعارماشىلىق تابىس تىلەدى.
فەستيۆال شىمىلدىعى سولتۇستىك قازاقستان وبلىستىق س.مۇقانوۆ اتىنداعى قازاق مۋزىكالىق دراما تەاترى ساحنالاعان ق.تولىباي ۇلىنىڭ «داۋىلپاز بابا – قوجابەرگەن» سپەكتاكلىمەن اشىلدى. سپەكتاكلدىڭ رەجيسسەرى – باتىربەك شامبەتوۆ.
فەستيۆال كۇندەرى كورەرمەندەر تاريحىمىزدان سىر شەرتەتىن قۇندى قويىلىمدارمەن قاتار, دراماتۋرگيا كلاسسيكتەرى ۋ.شەكسپير, ا.چەحوۆ, ن.گوگول, ش.ايتماتوۆ سىندى اۆتورلاردىڭ تۋىندىلارىمەن دە تانىسا الادى. اقتوبەلىكتەر ءتورت كۇن بويى ساحنا ونەرىنەن ادەمى اسەر الىپ, اكتەرلەردىڭ شىعارماشىلىق شەبەرلىگىنە ءتانتى بولادى دەگەن ۇمىتتەمىز.
ساتىبالدى ءساۋىرباي,
«ەگەمەن قازاقستان»
اقتوبە