جەتىسۋ ونەرىنىڭ جاۋھارلارى

وتكەن سەنبىدە ەلورداعا «قۋاتتى ءوڭىر – قۋاتتى قازاقستان» اكتسياسى اياسىندا الماتى وبلىسىنىڭ دەلەگاتسيا­سى كەلگەن ەدى. بۇل كۇندەرى وبلىستىق تاۋار وندىرۋشىلەردىڭ اۋىلشارۋاشىلىق جارمەڭكەسى, كىتاپ پەن ساندىك-قولدانبالى ونەر كورمەلەرى, ءوڭىر ارتىستەرىنىڭ قاتىسۋىمەن مەرەكەلىك كونتسەرتتەر مەن ءتۇرلى سپەكتاكلدەر قويىلدى. سونىمەن قوسا الماتى وبلىسىنىڭ وكىلدەرى مادەني باعدارلامالارىن ۇسىنىپ, قالا تۇرعىندارى مەن قوناقتارىنىڭ كوڭىلىن ءبىر سەرپىلتىپ تاستادى. سونىڭ ءبىرى كونگرەسس-حولل سارايىندا شىعارماشىلىق ۇجىمنىڭ قاتىسۋىمەن وتكەن «جەتىسۋ – جۇماق مەكەنىم» اتتى گالا-كونتسەرتى. اتالعان كونتسەرتتىك باعدارلاما شەڭبەرىندە «ارناۋ», «ءان شاشۋ», «كوكشولاق», «جان اعا», «كوزىڭنىڭ ءمولدىرىن-اي», «ءدۇلد ۇلىم», «ساۋلەم-اي», «جەتىسۋ», «تالدى ارۋلارى», «ەلگە تىلەك», «حالىق دوستىعى» (قازاق, ورىس, كورەي, تاتار, ۇيعىر, چەشەن, ۋكراين, وزبەك ۇلتتارىنىڭ) بيلەرى مەن يتاليان اندەرىنەن «پوپۋرري», «ءبىرجان-سارا» وپەراسىنان ۇزىندىلەر تاماشالاندى. دانا حالقىمىز «ءان – كوڭىلدىڭ اجارى», «ءان ءومىر ۇزارتادى» دەپ تە جاتادى. بۇل جولى تىڭدارمان قاۋىم ءاربىر ءاندى قوسىلا شىرقاپ, جەتىسۋ ءوڭىرىنىڭ جاۋھار جىرلارىنا دەگەن سارى كوبەلەك ساعىنىشتارىن ەرەكشە تولقىنىسپەن سەزىنگەندەي ەدى. ونى نۇر توگىلگەن جۇزدەرىنەن, شابىتتانعان كوڭىلدەرىنەن اڭعارۋعا بولاتىن. وسىندايدا حاكىم ابايدىڭ: «قۇلاقتان كىرىپ, بويدى الار, اسەم ءان مەن ءتاتتى كۇي», دەگەن ولەڭ جولدارى ەرىكسىز ەسكە تۇسەدى. قىسقاسى, بۇل يگى شارا قالا تۇرعىندارىن مارە-سارە قۋانىشقا بولەپ, ەرەكشە دەمالىس سىيلادى.  «ەگەمەن-اقپارات» سۋرەتتەردى تۇسىرگەن ورىنباي بالمۇرات, «ەگەمەن قازاقستان»