قۇربان ايت مەرەكەسى كۇنى قوستانايدا جاڭا مەشىت جاماعاتقا ەسىگىن اشتى. بۇل قوستاناي وبلىسىنداعى ەڭ ءزاۋلىم مەشىت جانە وبلىس ورتالىعىنىڭ ءسانىن كەلتىرەتىن ساۋلەتتى ارحيتەكتۋرالىق عيماراتتاردىڭ بىرىنە اينالدى. وعان ءبىر مەزگىلدە 2200 ادام كىرىپ عيبادات جاساي الادى. وبلىس اكىمى ارحيمەد مۇحامبەتوۆ مەشىتتىڭ اشىلۋ سالتاناتىنداعى قۇتتىقتاۋ سوزىندە سوڭعى جىلدارى قازاق حالقى ءۇشىن اتا-بابامىز ۇستانعان يسلامنىڭ حانافي مازحاب باعىتىنىڭ حاق جولىنا بەت بۇرۋشىلاردىڭ كوبەيىپ كەلە جاتقاندىعىن اتاپ ءوتتى جانە مەشىتتىڭ جاستارعا رۋحاني تاربيە بەرەتىن جانە ءداستۇرلى ءدىنىمىزدى ناسيحاتتايتىن ورتالىققا اينالاتىنىنا سەنىم ءبىلدىردى.
– قازىرگى ۋاقىتتا مەشىتتەر تەك ءدىني مەكەمە ەمەس, رۋحاني ورتالىققا, تاربيە وشاعىنا اينالىپ كەلەدى. حالقىمىزدىڭ رۋحاني قۇندىلىقتارىن جاڭعىرتۋ جانە ساقتاۋ ءبىزدىڭ ەلىمىز تاۋەلسىزدىگىنىڭ قول جەتكىزگەن بىردەن-ءبىر جەتىستىگى بولىپ تابىلادى. سالت-ءداستۇرى مەن ادەت-عۇرپىنداعى, ءدىني سەنىمىندەگى ايىرماشىلىقتارعا قاراماستان ەلىمىزدەگى ءتۇرلى ۇلت مەن ۇلىستار ءبىر ورتاق ماقسات پەن قازاقستاننىڭ سەرپىندى دامۋىنا, تۋعان جەرىمىزدە بەيبىتشىلىك پەن ىرىس-بەرەكەنىڭ ساقتالۋىنا ۇمتىلىپ, ىنتىماقپەن ءومىر ءسۇرىپ وتىر», – دەدى ءوڭىر باسشىسى.
قازاقستان مۇسىلماندار ءدىني باسقارماسىنىڭ شەشىمىمەن مەشىتكە بەلگىلى ءدىن ۋاعىزداۋشى جانە قوستاناي, تورعاي وڭىرىندە يسلام قۇندىلىقتارىنىڭ تارالۋىنا ۇلكەن ۇلەس قوسقان ايماعانبەت كاجى سپان ۇلىنىڭ ەسىمى بەرىلدى. مەشىتتىڭ اشىلۋىنا قازاقستان مۇسىلماندارى ءدىني باسقارماسىنىڭ وكىلى كامالجان تۇردىباەۆ ارنايى كەلىپ قاتىسىپ, جاماعاتتى قۋانىشپەن قۇتتىقتادى.
مەشىتتىڭ 2010 جىلى باستالعان قۇرىلىسى قارجىنىڭ جوقتىعىنان ءبىراز ۋاقىت تۇرىپ قالعان بولاتىن. ۇستىمىزدەگى جىلدىڭ باسىندا ول قايتا قولعا الىنىپ, مامىر ايىنان قىركۇيەك ايىنا دەيىن قىزۋ جۇرگەن قۇرىلىس جۇمىستارىنىڭ ارقاسىندا دايىن بولدى. مەشىت قۇرىلىسى دەمەۋشىلەر بەرگەن قارجىعا سالىندى. مەشىت قۇرىلىسىن قارجىلاندىرۋعا اتاقتى كەن الىبى سوكولوۆ-سارىباي كەن ءوندىرىسى بىرلەستىگى, «توبىل» الەۋمەتتىك كاسىپكەرلىك كورپوراتسياسى, «قارقىن», «شولاقساي», «قاراسۋ», «موسكالەۆ» شارۋاشىلىقتارى, تاعى باسقا كوپتەگەن بيزنەس وكىلدەرى, قاراپايىم تۇرعىندار اتسالىستى.
مەشىت عيماراتى ءۇش قاباتتان تۇرادى, ءبىرىنشى قاباتىندا 1450 ادامعا ارنالعان ەرلەردىڭ عيبادات زالى ورنالاسقان. وسى قاباتتا نەكە قيۋ زالى, ەكىنشى قاباتىندا ايەلدەردىڭ عيبادات جاسايتىن زالى, ال كۇمبەزدىك قاباتىندا قوسالقى ورىن-جايلار بار.
جاڭا مەشىتتىڭ كەستەلەنگەن ميحرابى جانە الىستان جارقىرايتىن التىن تۇستەس باس كۇمبەزى, ويۋلانعان ەسىكتەرى, جۇمساق كىلەمدەرى ونىڭ ءسان-ساۋلەتىن ايشىقتاي تۇسەدى. عيماراتتىڭ جالپى الاڭى شامامەن 4 مىڭ شارشى مەتردەي. مۇناراسىنىڭ بيىكتىگى – 40 مەتردى, باس كۇمبەزىنىڭ بيىكتىگى – 25 مەتردى جانە ونىڭ ديامەترى 12 مەتردى قۇرايدى.
ءنازيرا جارىمبەتوۆا,
«ەگەمەن قازاقستان»
قوستاناي